د سوریې دولتي رسنیو د یوې پوځي سرچینې په حواله ویلي، چې د دوشنبې په ورځ د سوریې حلب ښار ته څېرمه د اسرايیل په هوايي برید کې ګڼ شمېر کسان وژل شوي. دغه برید له یوې اونۍ څخه په کمه موده کې پر دغه هېواد د اسراییل دویم برید دی.
سرچینې پرته له دې، چې د برید او مرګ ژوبلې په اړه نور جزییات ورکړي وویل، چې برید د شپې شاوخوا ۱۲:۳۰ بجې شوی دی.
د سوریې د دولتي رسنیو په وینا؛ اسرايیل د می میاشتې په ۲۹مه د سوریې په مرکزي سیمه او همدارنګه د بنیاس په ساحلي ښار هوايي بریدونه کړي وو، چې یو ماشوم یې وژلی او لس ملکیان یې ټپیان کړي وو.
اسراییل له کلونو راهیسې په سوریه کې د ایران پورې تړلو ډلو باندې بریدونه کوي.
ایران له ۲۰۱۱ کال راهیسې د سوریې په کورنۍ جګړه کې د ولسمشر بشارالاسد ملاتړ کوي او په دغه هېواد کې نیابتي ډلې لري.
د اپریل په میاشت کې ایران په سوریه کې د دغه هېواد پر سفارت د اسراییل له احتمالي برید وروسته پر اسراییل د توغندیو بریدونه وکړل.
د اسراییل په برید کې د یو جنرال په ګډون څو ایراني وکړي وژل شوي وو.
