سېلاب خیریه بنسټ نن د ننګرهار په مرکز جلال اباد کې د ۱۳۰ زلمیانو او پېغلو ډلیز واده وکړ. د دغه بنسټ مشر سید احمد سېلاب وايي، ننګرهار د افغانستان په کچه واحد ولايت دی چې خسرګنۍ خپلو زومانو ته ولور او ټول لګښتونه وبښل.
سید احمد سېلاب زیاتوي، چې هر زوم ته يې د کور لپاره شاوخوا دوه سوه اجناس اخيستي دي چې ټولې اړتياوې پرې پوره کيږي.
دې مراسمو کې څو خسرانو وویل، له کالونو راهیسې يې لورڼه ورکړې وې، خو زومانو يې د ولور او د واده د لګښت توان نه درلود، خو د سېلاب خیریه په غوښتنه يې خپلو زومانو ته ولورونه او نور لګښتونه وبښل.
دوی له والدينو وغوښتل چې له ولور او نورو ناوړه دودونو څخه ډډه وکړي.
سېلاب خیریه بنسټ پر ننګرهار سربېره نورو ولایتونو کې کې هم ورته ډله ییز ودونه کړي دي.
دغه بنسټ د هغو ځوانانو سره مرسته کوي، چې ولور او نورو مراسمو ترسره کولو توان ونه لري.
د طالبانو د لوړو زدکړو وزیر د عالي تحصیلاتو او پوهنې وزیرانو په نړیواله څلور ورځنۍ ناسته کې د ګدون لپاره د روسیې کازان ښار ته ورسېد. طالبان وايي، ندامحمد نديم به په دې ناسته کې د بېلابيلو هېوادونو له وزيرانو او په روسيه کې له افغان محصلينو سره وګوري.
د طالبانو د لوړو زدکړو وزارت ویاند ضياء الله هاشمي ند دې سفر اړوند پر خپله اېکس پاڼه په يوه ويډيو کې ويلي، چې دغه غونډه د روسيې په کازان کې جوړيږي، چې د نړۍ د لوزړو زدکړو او پوهنې وزیران پکې ګډون کوي.
هاشمي زياتوي، چې په دې ناسته کې به طالب وزير ندامحمد نديم د نړۍ د لوړو زدکړو له وزيرانو سره پر لیدونو سربېره د روسيې د عالي تحصیلاتو له مرکزونو او هلته د افغان محصلینو سره د هغوی د ستونزو د اورېدو او حل په موخه هم وګوري.
ندا محمد ندیم تېر کال هم په دغه غونډه کې ګډون کړی و.
تر دې مخکی د طالبانو د پوهنې وزارت هم ويلي و، چې د دغه وزارت سرپرست حبیب الله اغا د پوهنې په نړیواله څلور ورځنۍ غونډه کې د ګدون لپاره روسیې ته رسېدلی دی.
په تېرو څلورو ورځو کې دا د طالبانو دريم وزیر دی، چې روسیې ته په سفر ځي؛ تر دوی وړاندې د طالبانو د کار او ټولنیزو چارو وزیر عبدالمنان عمري هم په اقتصادي غونډه کې د ګډون لپاره د روسیې سن پترزبورګ ته تللی.
خو د طالبانو د پوهنې او لوزړو زدکړو وزیران پر داسې مهال په یوه نړیواله غونډه کې برخه اخلي، چې شاوخوا درې کاله کېږی د لوړو زدکړو او د شپږم ټولګي پورته د ټولو نجونو لپاره پر زدکړو یې بندیز لګېدلی دی.
د حامد کرزي او اشرف غني په ګډون پخوانیو افغان چارواکو د کرېکټ شل اوره نړیوال جام کې د افغان لوبډلې د دویم پرلپسې بري مبارکي افغان ولس ته ورکړه. دا اول ځل دی چې افغان لوبډله نوی زیلنډ ماتوي، خو د څو ګړیو تېرېدو سره هم کوم طالب چارواکي افغان ملت د دې بري مبارکي نه ده ور کړې.
حامد کرزي په خپل ټولنیز رسنۍ اېکس کې د مبارکۍ ترڅنګ لیکلي چې په راتلوونکي سیالیو کې افغان لوبډلې ته د نورې بریا هیله کړې ده.
اشرف غني بیا په اېکس کې لیکلی« ټولو هېوادوالو ، پېغلو او ځوانانو او په تېره د ملي لوبډلې اتلانو ته مبارکي وایم.»
پر پخوانیو ولسمشرانو سربېره د ملي روغې جوړې عالي شورا پخواني مشر عبدالله عبدالله په خپلو ټولنیزو شبکو کې د یادښتونو د خپرولو سره افغانستان ولس ته د نوي زیلنډ پر وړاندې د افغان لوبډلې د دې بریا مبارکي ورکړې
د مالې پخواني وزیر عمر زاخېلوال، ملي امنیت پخوانی رییس رحمت الله نبیل تو د ننګرهار پخواني والي ضیاالحق امرخیل او ځینې نورو افغان سیاستوالو په خپلو ټولنیزو شبکو کې افغان ولس ته د کرېکټ وروستۍ بریا مبارکي ویلې ده.
د کرېکټ له دې بریا ساعتونونه تیریږي خو د طالبانو له لوی ویاند ذبیح الله مجاهد نیولې تر نورو طالب چارواکو تر اوسه هیڅ کومه یوه غبرګون نه دی ښودلی.
افغانستان د ۲۰۲۴ کال په نړیوال شل اوره جام کرېکټ سیالیو کې په خپله دویمه لوبه کې نیوزیلنډ ته د ۸۴ منډو په توپیر ماتې ورکړه.
دا لومړی ځل دی چې افغانستان د نوي زیلنډ کرېکټ لوبډلې ته ماته ور کوي.
دا په روان جام کې د یوګانډا تر ماتولو وروسته د افغان لوبډلې دویمه پرلپسې بریا ده.
افغانستان به خپله درېیمه لوبه د جون پر ۱۴مه نېټه له پاپ اونیوګېني یا پياېنجي سره او څلورمه هغه به د جون میاشتې پر ۱۸مه له ویسټ انډيز سره کوي.
د افغانستان د کرکټ ملي لوبډلې لوبغاړی رحمان الله ګربز د نوي زیلنډ خلاف د لوبې غوره لوبغاړی شو.
نوموړي د افغانستان لپاره په دوو لوبو کې د یوګانډا او نوي زیلنډ پر وړاندې ۱۵۶ منډې وکړې او د نړیوال جام د غوره توپ وهونکو په کتار کې ونومول شو.
د امریکا له لوري ارون جونز او ابراهیم ځدراڼ په ګربز پسې دي.
د افغان کرکټ د ملي لوبډلې تېز توپ اچوونکی فضل الحق فاروقي د ۲۰۲۴ کال په کرېکټ نړیوال جام د نهو ویکټو اخیستو سره د غوره توپ اچوونکو د جدول په سر کې دی.
راشد خان ارمان په ۶ وېکټو دوهم او د سریلانکا نووان توشارا د ۵ وېکټو په اخیستو دریم ځای لري.
د ایران د بهرنیو چارو وزارت سرپرست وايي، «د نیواکګرو د نیواک له امله افغانستان وروسته پاتې او له اقتصادي ستونزو سره مخ دی.» علي باقري دا خبره د افغانستان په هکله د مسکو فارمټ د تماس ډلې غونډې ته کړې ده، چې په تهران کې د روسیې، چین، ایران او پاکستان د چارواکو ترمنځ نن جوړه ده.
علي باقري نن په خپل پیغام کې زیاته کړې، چې له افغانستان درې کلونه کېږي چې نیواکګر وتلي، خو له امله یې د افغانستان ګاونډیان هم له ستونزو سره مخ دي.
هغه په دې برخه کې مشخص ټکی نه دی په ګوته کړی، خو د طالبانو په واکمنېدو سره په تر یو میلیون ډېر افغانان ایران ته کډوال شول.
نوموړی د افغانستان شتمني کنګل کېدل همد دغه هېواد د پرمختګ خنډ بولي.
په تهران کې د مسکو فارمټ په چوکاټ کې د تماس ډلې یو ورځنۍ غونډه د افغانستان په هکله د ملګرو ملتونو په مشرۍ د دوحې ناستې په درشل کې ده.
د تهران غونډې ګډونوال غواړي د افغانستان په اړه سیمه ییز متحدین د دوحې ناستې ته حپر دریځونه سره همغږي کړي.
طالبان وايي، د تهران ناستې ته بلل شوي وو، خو دوی نه دي ورغلي.
د روسیې د بهرنیو چارو مرستیال وزیر خبر ورکړ، د سن پترزبرګ د اقتصادي فورم په څنډه کې د روسیې او طالبانو ترمنځ دوه اړخیزه غونډه نه ده پلان شوې. الکساندر پانکین وویل: «موږ به یوازې د هغه ګردي مېزکې په غونډه کې برخه اخلو، چې د طالبانو د کار او ټولنیزو چارو وزیر هم پکې حضور ولري.»
د طالبانو د کار او ټولنیزو چارو وزیر عبدالمنان عمري د سن پترزبورګ په اقتصادي فورم کې د ګډون لپاره د یوه پلاوي په مشرۍ روسیې ته تللی دی.
الکساندر پانکین د دې پوښتنې په ځواب کې، چې ایا د روسیې او طالبانو ترمنځ به دوه اړخیزه ناسته وشي، وویل: «نه، موږ به د کار د وزیر او د پلاوي د مشر په شتون کې په یوه غونډه کې خبرې وکړو.»
عبدالمنان عمري سن پترزبورګ ته د خپل سفر په ترڅ کې وویل، دا ډله چمتو ده، چې له روسیې سره د امنیتي اړیکو پر پراخولو خبرې وکړي.
هغه زیاته کړه طالبان دې ته انتظار باسي، چې د روسیې د ترهګريزو سازمانونو له نوملړ یې نوم لرې شي.
روسیې له دې مخکې ویلي و، چې د دغه هېواد د ترهګرو سازمانونو له لېست د طالبانو د نوم پر ایستلو غور کوي.
الکساندر پانکين د تاس خبري اژانس سره په مرکه کې وړاندي وکړ، چې د طالبانو ډله دي يوازي د افغانستان په نوم ياد شي.
د ده په وینا دا يو حقیقت دی، چې طالبان پر افغانستان کنټرول لري.
یوشمېر افغان زدهکوونکې نجونې وايي، چې له ۱۰۰۰ ورځو تېرېدو وروسته لا هم طالب مشرانو د دوی د برخلیک په اړه پرېکړه نه ده کړې. دغه بندیز څو ورځې وروسته له هغه پر افغان زدهکوونکو نجونو ولګول شو، چې طالبانو یو ځلې بیا پر افغانستان ولکه ټینګه کړه.
د بشري حقونو د څار بنسټ د نجونو پر زدهکړو د لګول شوي بندیز په اړه په یوې خبرپاڼه کې ویلي، چې افغانستان به تر ډېره ښځینه مسلکي کدرونه و نه لري او دغه ستونزه به تر ډېره د دغه هېواد بنسټیزې چارې نورې هم ویجاړې کړي.
په کابل کې په مستعار نوم عزیزه چې په ۲۰۲۱ کال کې د لسم ټولګي زدهکوونکې وه افغانستان انټرنشنل پښتو ته یې د ټیلیفون په لیکه وویل، چې که طالبانو دغه بندیز نه و لګولی؛ نو هغه به اوس د کابل یا کوم بل پوهنتون کې زدهکړیاله وای او لوړې زدهکړې به یې کولې.
هغه وړاندې وايي، طالبانو د ټولو نجونو هیلې له خاورو سره خاورې کړې، دوی په ټوله کې د پرمختګ، علم او پوهې دښمنان دي.
له شپږم ټولګي پورته د نجونو پر زدهکړو د طالبانو لهخوا لګول شوي بندیز یو شمېر کورنۍ اړ اېستې، چې د خپلو ماشومانو د هېلو د پوره کېدو لپاره ګاونډیو هېوادونو ته کډه وکړي؛ خو دغه کډوال په نورو هېوادونو کې هم نهیلي شول او د دوی هیلې پوره نه شوې.
په اسلام اباد کې افغان کډواله مریم افغانستان انټرنشنل پښتو ته وویل: موږ د دې لپاره هجرت وکړ، چې زه او زما دوه نورې خویندې له تعلیمه بې برخې پاتې نه شو؛ خو دلته هم زموږ لپاره د درس او تعلیم زمینه نه ده برابره، لومړی خو مهاجرو ته اجازه نه شته چې د پاکستان په ښوونځیو کې زدهکړې وکړي او په هغو ښونځیو کې چې ورته اجازه ورکړل کېږي، هلته بیا میاشتیني فیسونه دومره لوړ دي چې زموږ په شان خلک یې د ادا کولو وس نه لري.
په ټوله کې افغان نجونې نهیلي شوې او ډېرې یې په رواني ناروغیو هم اخته شوې دي.
په اسلام اباد کې یوه پخوانۍ افغانه ښوونکې زرلښته وايي، دلته هره افغانه نجلۍ چې زه ورسره مخامخ شوې یم په یو ډول رواني ناروغۍ اخته شوې او د ژورو فکرونو له امله خوشاله ژوند نه لري.
مېرمن زرلښته وايي، دلته مېشت افغانان تر اوسه په دې نه دي توانیدلي چې نړۍوالو بنسټونو ته قناعت ورکړي چې له تعلیمه د پاتې شویو نجونو لپاره د تعلیم زمینه برابره کړي،.
هغه وايي، دلته له افغانستانه ګڼې ښوونکې او نارینه ښوونکي کډه شوي؛ خو تر اوسه د دوی لپاره داسې اسانتیا نه ده برابره شوې چې د نجونو لپاره د ښوونځیو په جوړولو د هغوی مړاوې هیلې راژوندۍ کړي.
که څه هم چې طالب چارواکو تل د نجونو د ښونځیو د تړل کېدو لپاره راز، راز پلمې کړې؛ خو داسې ښکاري چې د دغې ډلې په واکمنۍ کې به دغه تړل شوي ښوونځي نه پرانېستل کېږي، خو د هر کال په تېریدو سره افغانستان د ښځينه کدرونو له فارغېدو بې برخې پاتې کېږي چې د دغې تشې ډکول بیا ډېرو کلونو ته اړتیا لري.