په واشنګټن کې د پاکستان سفیر مسعود خان د امریکا له متحدو ایالتونو وغوښتل، چې د جنوبي اسیا له هېوادونو سره متوازنې اړیکې جوړې کړي. ښاغلي خان په یوه امریکايي فکري خونې کې په خپله وینا کې له واشنګټن څخه وغوښتل چې "له هند سره له حده زیاته همغږي ونه کړي."
د پاکستان دولتي خبري اژانس د غبرګولي په ٢٠مه نېټه خبر ورکړ، چې د پاکستان سفير وويل، چې د امريکا او د جنوبي اسيا د هېوادونو ترمنځ د برابرو او متوازنو اړيکو ساتل به په سيمه کې د سولې او امنيت په ټينګښت کې مرسته وکړي.
مسعود خان وویل: "له هند سره د متحده ایالاتو د زیاته موافقه پالیسي د سویلي اسیا هېوادونو سره په اړیکو کې د ستراتیژیک توازن ساتلو لپاره د دې هېواد دودیزه پالیسي ردوي."
د پاکستان او امريکا تر منځ د اړيکو په اړه ښاغلي خان وويل، چې دواړو هېوادونو د امنيت، اقتصاد، روغتيا او تعليم په برخو کې خپلې اړيکې تازه کړې دي.
د پاکستان دا اندېښنه په داسې حال کې راپورته کیږي، چې امریکا په وروستیو کلونو کې له هند سره خپلې پوځي او اقتصادي همکارۍ زیاتې کړي دي.
پاکستاني سیاسي شنونکي وايي، چې واشنګټن له نوي ډیلي سره د نږدې اړیکو غوښتونکی دی، ځکه دغه هېواد ته په اسیا کې د چین د مقابلې په سترګه ګوري.
