پاکستاني رسنیو خبر ورکړی چې نن سهار د خیبرپښتونخوا په لکي مروت ولسوالۍ کې د سړک غاړې بمي چاودنې د پاکستاني پوځ یو موټر الووځولی چې له امله شپږ پوځیان وژل شوي. ويل کیږي له چاودنې وروسته جګړه هم شوې چې په پایله کې یې یو عسکر ټپي هم دی.
پاکستاني رسنیو نن یکشنبه د (غبرګولي ۲۰مه) د پوځ د ځينو سرچینو په حواله راپور ورکړی چې د لکي مروت ولسوالۍ په سلطان خیلو کچي کمر سیمه کې د پاکستان پوځ پر یوه کاروان برید شوی چې لومړی یو ګاډی د سړک غاړې په ماین الووځول شوی او وروسته پرې له څو خواو جګړه شوې چې له امله شپږ تنه پوځیان وژل شوي او بل ټپي دی.
په هغو انځورونو کې چې افغانستان انټرنشنل پښتو ترلاسه کړي، ښکاري چې الوځول شوی ګاډی یو مخ ویجاړ شوی او په ځمکه کې یې ژوره کنده ایستلې ده.
تر اوسه پورې د دغه برید مسوولیت چا په غاړه نه دی اخیستی خو په دغه سیمه کې تر دې وړاندې ورته پېښې او بریدونه د ټي ټي پي وسله والې ډلې ترسره کړي.
خپله پاکستاني پوځ په دې اړه په رسمي ډول کومه خبرپاڼه نه ده خپره کړې خو د پوځ ځینو سرچینو پاکستاني رسنیو ته دغه معلومات ورکړي.
