د اوکراین زاړه پوځیان د ځوانو سرتېرو مرستې ته سترګې په لار دي
۵۰ کلن اوکرایني سرتیري "بیل" چې په تیاره کې د خپل ټوپک سره پټ و، وویل، چې هیله لري چې د هغه ډیری ځوان هیوادوال د روسیې د یرغل په وړاندې جګړه کې د سرتېرو په توګه برخه واخلي.
د اوکراین پوځ د یو لوی او ښه مجهز دښمن سره مخامخ دی، خو د هغه په څیر په زړو سرتیرو تکیه کوي ترڅو د روسیې د بې رحمه بریدونو په وړاندې د هیواد دفاع وکړي.
دغه سرتیری چې د اوکراین په ختیځ کې په یوه روزنیز کمپ کې زدکړې ترلاسه کولې وویل: "ځوان نسل باید پوه شي چې زموږ او دوی پرته بل څوک دا کار (د اوکراین دفاع) نه کوي."
د اوکراین پوځ تر فشار لاندې دی چې لا ډیر سرتیري د جګړې لیکو ته واستوي ځکه چې د ۲۷ میاشتنۍ جګړې د پای څرک لا هم نه لګي او اوس د جګړې د لومړیو میاشتو په پرتله لږ کسان په خپله خوښه د جګړې لیکو ته ځي.
چارواکو په دې وروستیو کې عسکر ۍ ته د جذب مقررات بدل کړي او پر شرایطو د برابرو کسانو عمر یې ۲۵ کلنۍ ته راټیټ کړی. تر ۶۰ کلنۍ پورې نارینه د عسکرۍ لپاره پر شرایطو برابر دي. یو شمېر اوکرایني چارواکي اټکل کوي چې د اوکرایني سرتېرو اوسط عمر له ۴۰ کلونو ډېر دی.
رویټرز خبري اژانس ته د دونڅک په سیمه کې د ۳۳ میخانیکي لوا د روزنې غونډې ته لاسرسی ورکړل شوی، چې د مسکو ځواکونه ورو ورو په څو سیمو کې پرمختګ کوي.
سرتیرو ته په مختلفو مهارتونو کې روزنه ور کول کیږي چې د خندق پاکولو څخه نیولې د لویو لاریو او درنو جنګي وسلو تر کارولو پورې. ځینې سرتیري په نوو دندو ګمارل شوي او ځینې نور نوي له پوځ سره یوځای شوي.
د لوا یو چارواکي وویل، چې ډیری هغه نارینه چې اوس مهال روزنه ترلاسه کوي د ۵۰ کلونو څخه ډیر عمر لري مګر دوی د ځوانو سرتیرو په پرتله ډیره انګیزه لري.
هغه وویل: "دوی پوهیږي چې ولې دلته دي: د خپلو ماشومانو او لمسیانو لپاره."
