د بښنې نړۍوال سازمان یو ځل بیا له طالبانو وغوښتل چې فهیم عظیمي له بند څخه خوشې کړي

AP ۱۴۰۳ غبرگولی ۲۸

د بښنې نړۍوال سازمان د دوشنبې په ورځ (د غبرګولي ۲۸مه) یو ځل بیا له طالبانو وغوښتل، څو د روزنې د برخې فعال فهیم عظیمي له قید او شرط پرته له بند څخه خوشې کړي.
دغه اداره د عظیمي نیول او محاکمه کول ناعادلانه بولي او زیاتوي، چې د نوموړي نیول د بشري حقونو د نړۍوالو قوانینو خلاف کار دی.

د بښنې نړۍوال سازمان پر اېکس ټولنیزې شبکې خپرې کړې اعلامیه کې لیکلي: «احمد فهیم عظیمي په دروغو، د طالبانو پر ضد فعالیت تورن شوی او د طالبانو د یوې ناعادلانه محکمې له لارې په یو کال بند محکوم شوی دی.»
دغې ادارې تر دې وړاندې د طالبانو د استخباراتو له مشر عبدالحق وثیق څخه د یو پرانیستي لیک له لارې غوښتي و، څو احمد فهیم عظیمي له قید او شرط پرته له بند څخه خوشې کړي.
د بښنې نړۍوال سازمان ویلي و، چې د روزنې د برخې یاد فعال او کورنۍ یې د طالبانو پرضد د فعالیتونو تورونه رد کړي دي.
د فرانټ لاین د بشري حقونو سازمان د روان کال د غویي په میاشت کې ویلي و، چې طالبانو د احمد فهیم عظیمي او د هغه د کورنۍ له حضور پرته نوموړی په یو کال بند محکوم کړی دی.
طالبانو په ټول هېواد کې څه باندې ۳۰۰ بندیان د لوی اختر په مناسبت له بند څخه خوشې کړل، خو عظیمي په دغو خوشې شویو کسانو که نه و.
احمد فهیم عظیمي د ۱۴۰۲ کال د تلې په میاشت کې د طالبانو د استخباراتو له لوري د کابل په کارته چهار کې ونیول شو او د څرخي پله بندخونې ته انتقال کړ.
ویل کیږي، چې ښاغلی عظیمي د ښځو د روزنې له امله بندي شوی دی.

نور خبرونه

رادیو