د پاکستان مشهور خبریال احمد رشید د طالبانو د مشر وروستۍ څرګندونې د هغه د بې وسۍ نښه وبلله. احمد رشید اسوشیېټیډ پریس ته وویل چې د ملا هبت الله د یووالي غوښتنې د هغه مایوسي څرګنده کړه او دا چې د طالبانو مشر د هغو اصلي مسلو له حل کولو ډډه وکړه چې افغانان ورسره مخ دي.
د طالبانو مشر په کندهار کې د لوی اختر په ورځ په خپله ۲۳ دقیقه ییزه وینا کې د خپلو ځواکونو پر یووالي ټینګار وکړ او ویې ویل چې طالبان باید له تکبر، غرور او خپلمنځي اختلافاتو ډډه وکړي او که دوی یووالی ولري، ان کولای شي هغه هم ګوښه کړي.
هغه زياته کړه، چې په هېواد کې د خداى دين او د شريعت د پلي کولو هوډ لري، خو له يووالي پرته د شريعت پلي کېدل ناشوني دي.
احمد رشید چې د طالبانو او افغانستان په اړه یې څو کتابونه لیکلي دي وايي، که د طالبانو پر ځای وای، نو د ملا هبت الله خبرې به یې بې معنا بللې وې.
د ویلسن مرکز د سوېلي اسیا د انسټیټیوټ مشر مایکل کوګلمن وویل، د طالبانو د مشر ټینګار پر یووالي مهم و او دا چې «اخندزاده غواړي د طالبانو تر منځ هر ډول بې اتفاقي له منځه یوسي.» هغه زیاته کړه، طالبان نړېوالې موخې نه لري، خو د طالبانو مشر د افغانستان له پولو هاخوا فکر کوي.
د طالبانو د مشرانو تر منځ مخالفتونه تر ډېره بریده د نجونو او ښځو د زده کړو او کار، له سیمې او نړۍ سره د اړیکو او د حکومتولۍ پر مسلو دي. د طالبانو د بهرنیو چارو وزارت د سیاسي مرستیال عباس ستانکزي په ګډون د طالبانو یو شمېر سیاسي څېرو په وار، وار د دغې ډلې پر مشر له شپږم ټولګي پورته د نجونو د ښوونځیو د تړلو له امله نیوکې کړې دي.
د طالبانو د کورنیو چارو وزیر سراج الدین حقاني هم په نا مستقیمه توګه د طالبانو د مشر پر سیاستونو نیوکې کړې دي. خو د طالبانو مشر وايي، نیوکې باید عامې نه شي.
