د طالبانو د ټرانسپورټ او هوایي چلند وزارت وایي، چې اوس د افغانستان له فضا په ۲۴ ساعتونو کې تر ۱۲۰ الوتکې تېریږي. ددغه وزارت ویاند امامالدین احمدي د طالبانو تر واک لاندې ملي ټلویزیون ته ویلي، چې له هرې الوتکې ۷۰۰ ډالره حق العبور اخیستل کیږي.
دا په داسې حال کې ده، چې د تېر حکومت په وروستیو کلونو کې بیا د افغانستان له فضا څخه کابو ۴۰۰ الوتنې کېدې، چې تر نیمایي زیات کموالی پکې راغلی دی.
د تېر حکومت د هوانوردۍ ادارې مشر قاسم وفایي زاده په ۲۰۲۰ کال کې ویلي و، چې په یوه کال کې څه باندې ۹۵ زره الوتکې د افغانستان له فضا څخه تېرې شوې دي.له دې سره، طالبانو بیا په ۲۰۲۳ کال کې ویلي و چې د یوه کال په ترڅ کې څه باندې ۲۵ زره الوتکې د افغانستان له فضا تېرې شوې دي او تر اته میلیارده افغانۍ عاید یې ترلاسه کړی.د طالبانو د ټرانسپورټ او هوایي چلند وزارت ویاند دغه راز وایي، چې افغانستان په نړیوالو معیارونو برابر ۵ هوايی ډګرونه لري.نوموړی زیاتوي، چې افغانستان پر دې نړیوالو هوایي ډګرونه سربېره ۲۲ نور فعال هوایي ډګرونه هم لري، چې په ورځ کې شل تر دېرشو الوتنې لري.د ښاغلي احمدي په خبره، له افغانستانه کام ایر او اریانا افغان هوایي شرکتونه او یو شمېر نور نړیوال شرکتونه بیا لکه ترکش، فلای دوبی، اېر انډیا، ریاض، ماهان، کېش او د تابان هوایي شرکتونه الوتنې لري.د نوموړي په وینا، اوسمهال له افغانستانه ایران، پاکستان، سعودي عربستان، چین، ازبکستان، روسیې، هند، دوبی، ابوظبي، ترکیې، قطر او کویټ ته مخامخ الوتنې کیږي.پر افغانستان د طالبانو له واکمنۍ وروسته ډېرو نړیوالو هوايي شرکتونو خپلې لارې بدلې کړې او افغانستان ته یې خپلې الوتنې بندې کړې.
