د طالبانو د حج او اوقافو وزارت وایي، چې د سعودي عربستان د حج وزیر د دغه وزارت سرپرست نور محمد ثاقب ته د نورو هېوادونو د وزیرانو په څېر د راتلونکي کال د حج وثیقه وسپارله.
دغه وزارت زیاتوي، چې دواړو لورو په راتلونکو کلونو کې د افغانستان د حاجیانو لپاره د ډېرو اسانتیاو په رامنځته کېدو ټينګار وکړ.
د طالبانو د حج او اوقافو وزارت د یوې خبرپاڼې په خپرولو سره ویلي، چې د سعودي د حج او عمرې وزارت سږ کال د حج د مراسمو له پای ته رسېدو وروسته د ټولو اسلامي هېوادونو د حج او اوقافو چارو وزیرانو په حضور کې د (ختامه مسک) تر نامه لاندې پروګرام جوړ کړ، چې د طالبانو وزیر هم پکې برخه اخیستې وه.د راپورونو له مخې؛ نور محمد ثاقب چې د ملګرو ملتونو د بندیزونو په نوملړ کې دی، د ملګرو ملتونو د بندیزونو د کمېټې له اجازې وروسته سعودي عربستان ته تللی دی.د طالبانو د کورنیو چارو وزیر سراج الدین حقاني، د ریاست الوزرا سیاسي مرستیال مولوي کبیر او د طالبانو د ملي امنیت ریاست مشر عبدالحق وثیق هم له همدې اجازې په ګټې اخیستنې مکې مکرمې ته د حج ادا کولو لپاره تللي دي.د طالبانو تر کنټرول لاندې د چارو ادارې یوه لوړ پوړي چارواکي د روان کال د وري په میاشت کې د نوم د نه ښودلو په شرط افغانستان انټرنشنل - پښتو ته ویلي وو، چې سږ کال به د ۳۰ زره حاجیانو له ونډې ۱۴ زره او دوه سوه د طالبانو غړي حج ته ځي.طالب چارواکو په داسې حال کې سږ کال د حج په مراسمو کې برخه واخیسته، چې د دغې ډلې د قاضی القضات په ګډون د حج و اوقاف وزیر او یو شمېر نورو مشرانو په سعودي عربستان کې د یکشنبې په ورځ اختر ونمانځه او په افغانستان کې نورو طالبانو دوشنبې د اختر ورځ ونمانځله.د افغانستان په تاریخ کې دا لومړی ځل دی، چې طالبان د سعودي عربستان پر ځای یوه ورځ وروسته اختر نمانځي.
