په پاکستان کې د ماشومانو د پولیو شپږمه پېښه ثبت شوې
د پاکستان د بلوچستان صوبې د روغتیا ادارې د ماشومانو د پولیو د یوې پېښې د ثبتولو خبر ورکړی دی. دې ادارې د سې شنبې په ورځ وویل، دا په روان کال کې په پاکستان کې د پولیو شپږمه پېښه ده.
د پاکستان د بلوچستان صوبې د روغتیا ادارې د ماشومانو د پولیو د یوې پېښې د ثبتولو خبر ورکړی دی. دې ادارې د سې شنبې په ورځ وویل، دا په روان کال کې په پاکستان کې د پولیو شپږمه پېښه ده.
د جيو نيوز د خبر له مخې؛ د بلوچستان د روغتيا ادارې ويلي، چې د بلوچستان په عبدالله قلعه سيمه کې يو ۱۸ مياشتنی ماشوم په پوليو اخته شوی دی.
د پاکستان د روغتیا د ملي ادارې د راپور له مخې؛ په تېره یوه میاشت کې د پولیو د درېیو پېښو ثبتېدل په دغه هېواد کې د پولیو په تشخیص او مخنیوي کې د دوی پاتې کېدا ښيي.
افغانستان او پاکستان هغه دوه هېوادونه دي، چې تر اوسه په دې نه دي توانېدلي څو پولیو له منځه یوسي.
د پاکستان د لومړي وزیر شهباز شریف په مشرۍ کابینې په پښتونخوا او پلوچستان کې د وسلوالو پرضد د عزم استحکام په نامه د عملیاتو پیلول تایید کړل. خو پرون د پاکستان په پارلمان کې د اپوزسیون مشرانو د دې عملیاتو مخالفت وکړ او ویې ویل، چې د تېر په څېر به یوازې ولس ور سره زیانمن شي.
د جیو نیوز د خبر په بنسټ د اپوزیسیون مشرانو له نیوکو سره د پاکستان د لومړي وزیر شهباز شریف په مشرۍ کابینې نن د دې عملیاتو پیلول تایید کړل.
پخپله شهباز شریف نن د کابینې غونډې ته ویلي، چې د عزم استحکام د عملیاتو په تړاو نیوکې کیږي، خو دا عملیات د تېرو عملیاتو په څېر نه دي، بلکې د استخباراتي معلوماتو پر بنسټ به کیږي او د دغو عملیاتو پرمهال به هېڅ څوک نه بې کوره کیږي.
په همدې حال کې د پاکستان دفاع وزیر خواجه اصف په لاهور کې د خبریالانو یو غونډې ته ویلي، چې د عملیاتو مالي لکښت په برخه کې به څلور صوبې مرسته کوي.
خواجه اصف خبریالانو ته په ډاکه کړې چې «دا عملیات د سیاسي موخو لپاره نه کیږي بلکې ترهګري ختمول غواړو او د عملیاتو په اړه راپورته شویو پوښتونو او تشویشونو ته ځواب وایو.»
د پاکستان دفاع وزیر وايي د وسلوالو د له منځه وړلو لپاره یې له افغان طالبانو سره هم خبرې درلودې، خو ګټه یې ونه کړه: «زه خپله د خبرو اترو لپاره لاړم کابل ته لاړم او ژمنه یې وکړه چې د ترهګرۍ ضد جګړه کې به له پاکستان سره مرسته کوي خو دی ادعا کوي چې تروسه پورې افغانستان خپلې ژمنې نه دي پوره کړي. »
پاکستان تل ادعا کوي چې پاکستاني وسلوالې ډلې د دوی پرضد د افغانستان خاوره کاروي خو د پاکستاني چارواکو دا ادعا افغان طالبانو تل رد کړې ده.
د افغان طالبانو بیا ځلي واک ته رسېدو سره ډيورنډ کرښې ته څېرمه د طالبانو حضور پراخ شوی دی او بریدونه یې څو برابره زیات شوي دي.
د پاکستان لومړي وزیر او ددې هېواد د دفاع وزیر د عزم استحکام عملیاتو په اړه ډېر نور جزیات نه دي ورکړي او نه یې هم ددې عملیاتو د پیلولو نېټه ښودلې.
د تحریک انصاف ګوند او د پاکستان د پارلمان غړی اسد قیصر د اپوزسیون په نماینده ګۍ وايي، چې دوی د پوځ له خوا د تازه عملیاتو مخالف دي او دوی به هېچا ته اجازه ور نه کړي، چې په پښتونخوا کې بیا جنګ پیل کړي. هغه وايي، چې د عملیات له افغانستان سره د جنګ په معنا دي.
نوموړي د دوشنبې په ورځ د پاکستان په پارلمان کې حکومت او د پاکستان پوځ ته په اشارې سره وویل: "تاسو چې کومه طریقه خپله کړې او له افغانستان سره د دښمنۍ یو بل دور شروع کوئ، موږ ته قبوله نه ده".
د اسد قیصر په خبره؛ که چېرې هر څوک د دوی په سیمه کې بیا جګړه پیلوي دوی به د خپل ملت تر شا دریږي او په شریکه به یې مخالفت کوي.
هغه وویل: "که د هر چا دا فکر وي په خدای قسم چې اول به زموږ په جسدونو تېریږي او بیا به جګړه پیلوي، موږ څه بنګړي نه دي په لاس کړي".
نوموړي پر ملا فضل الرحمان او محمود خان اڅکزي غږ کړی، چې کولي شي له افغانستان سره رامنځته شوې ستونزه په اسانۍ او خبرو حل کړي.
د پاکستان پوځ تازه د عزم په نوم د خپلو مخالفو ډلو د ځپلو لپاره عملیات پیل کړي، چې له مخې یې په سرحدي سیمو کې خپل مخالفین ځپي.
دغه چاره د تحریک انصاف ګوند سربېره د پاکستان د ګڼو سیاسي ګوندونو او اشخاصو له منفي غبرګون سره مخ شوې ده.
د پاکستان ډان ورځپاڼې د دوشنبې په ورځ د خپلو سرچینو په حواله خبر ورکړی، چې د ډیورنډ کرښې ته څېرمه د پاکستاني پوله ساتو او وسله والو تر منځ جګړه پای ته رسېدلې ده. د ډان د خبر له مخې، دا نښتې د شنبې په ماښام د خیبر پښتونخوا په درېو سرحدي سیمو کې پیل شوې وې.
تر اوسه د پاکستان پوځ د دې نښتې په اړه څه نه دي ویلي.
ډان ورځپاڼې د دوشنبې په ورځ د جنګاښ په څلورمه نېټه د ځايي خلکو په حواله خبر ورکړ، چې په دې ورځ په دیر ولسوالۍ کې د ډزو تبادله نه ده شوې.
د دغه راپور له مخې، له دوه ورځنۍ جګړې وروسته وسلوال"په افغانستان کې خپلو خوندي ځایونو ته په شا شوي دي."
ډان لیکي، چې په دې نښتو کې دواړو لورو ته مرګ ژوبله اوښتې ده، خو د مرګ ژوبلې کره شمېر یې نه دی معلومه.
پاکستاني رسنیو هم راپور ورکړی، چې مشرانو، سیمه ییزو سیاستوالو او روڼ اندو د دوشنبې په ورځ یوه جرګه راوبلله چې په سیمه کې د امن او نظم د ساتلو لپاره د دایمي حل په اړه خبرې وکړي.
د طالبانو د کډوالو او راستنېدونکو چارو وزارت د معلوماتو له مخې یاد کډوال د نیمروز ولایت د ورېښمو پله او د ننګرهار د تورخم له لارو په زور او خپله خوښه له پاکستان او ایران څخه راستانه شوي.
د طالبانو د کډوالو او راستنېدونکو چارو وزارت د دوشنبې په ورځ د (چنګاښ درېیمه) په خپله اېکس پاڼه لیکلي، چې تېره ورځ په ایران کې مېشت ۱۰۴۱ تنه افغان کډوال د نیمروز ولایت د ورېښمو پله له لارې په خپله خوښه او زور هېواد ته راستانه شول.
دغه وزارت د نیمروز ولایت د ورېښمو بندر د سرحدي امر د معلوماتو له مخې لیکلي، په تازه راستانه شویو کسانو کې کورنۍ هم شاملي وی، چې ۴۸۶ تنه اړمن پيژندل شوي او د مرستو ترلاسه کولو په موخه د کډوالۍ نړېوال سازمان دفتر ته ورپيژندل شوي.
یاد وزارت وايي، په دغو راستانه شویو کسانو کې شپږ تنه بې سرپرسته ماشومان دي، چې د کورنیو موندلو په موخه (اېم پې او) موسسې ته سپارل شوي.
همدارنګه یاد وزارت زیاتوي چې په همدې ورځ ۸۱ تنه افغان کډوال د ننګرهار ولایت د تورخم له لارې هېواد ته راستانه شول.
یاد وزارت د تورخم سرحدي امریت د معلوماتو له مخې ویلي، چې ۱۶ کورنۍ چې د غړو شمېر یې ۸۱ تنو ته رسیږي د پاکستان حکومت له لوري په زور د تورخم له لارې راستنې کړل شوې.
طالبان وايي، یادې کورنۍ یې د مرستو ترلاسه کولو په موخه د ملګرو ملتونو عالي کمېشنرۍ او د کډوالۍ نړېوال سازمان دفترونو ته ورپيژندلې دي.
دا په داسې حال کې ده چې په ایران او پاکستان کې د افغان کډوالو پر ضد سخت ګامونه اخیستل کیږي.
د ایران د کورنیو چارو وزیر څو ورځې وړاندې ویلي، چې له خپله هېواده به ناقانونه وګړي وباسي او نور نه شي کولای چې دغسې خلک په خپل هېواد کې پرېږدي.
همدارنګه له پاکستانه هم په زور د افغان کډوالو د اېستلو لړۍ دوام لري.
د دغه هېواد چارواکو ویلي، چې د سلګونو شکمنو بانکي حسابونو د څېړلو لړۍ یې پيل کړې، او همدارنګه په مدرسو کې د افغان طالبانو په اړه به هم له سره کتنه وکړي.
د طالبانو د کډوالو او راستنېدونکو چارو وزارت وايي، له پاکستانه په جبري ډول افغان کډوال د سپین بولدک او تورخم له لارو راستانه شوي چې ۱۲ تنه په کې بندیان وو. د پاکستان حکومت وايي، دغه لړۍ به روانه ساتي.
د طالبانو د کډوالو او ستنېدونکو چارو وزارت د یکشنبې په ورځ د (چنګاښ درېیمه) په اېکس پاڼه لیکلي، چې تېره ورځ ۱۶۹ افغان کډوال د کندهار د سپین بولدک او د ننګرهار د تورخم له لارو د پاکستان حکومت له لوري په زور افغانستان ته ستانه کړل شوي.
د کډوالو وزارت د کندهار د سپین بولدک سرحدي امریت له قوله لیکلي، چې ۱۷ کورنۍ چې د غړو شمېر یې ۹۳ تنو رسیږي له همدې لارې هېواد ته راستانه شول.
دغه وزارت وایي، په زور راستنو شویو تازه کډوالو کې ۱۲ تنه هغه افغانان هم شامل دي چې د پاکستان په بېلابېلو بندخونو کې بندیان وو.
همدارنګه د کډوالو وزارت د تورخم د سرحدي امریت له قوله لیکلي، چې ۱۳ کورنۍ چې د غړو شمېر یې ۶۴ تنه وو، د تورخم له لارې راستنې شوې.
طالبان وايي، تازه راستانه شوي کډوال یې د مرستو ترلاسه کولو په موخه د ملګرو ملتونو د کډوالۍ عالي کمیشنرۍ او د کډوالۍ نړېوال سازمان ته ورپيژندلي دي.
دا په داسې حال کې ده چې پاکستاني رسنیو راپور ورکړی چې د روانې جون میاشتې تر ۲۱ مې نېټې له پاکستانه د ټولو ستنو شویو افغانانو شمیر شپږ لکه او ۲۰ زره او ۹۸۱ تنو رسېدلی او دا لړۍ لا هم روانه ده.