د ترکیې د سوداګرۍ وزیر عمر بولات وایي، چې که له ترکیې څخه ۲۵ زره افغان شپانه او کروندګر ولاړ شي، په دې هېواد کې به مالداري او کرنه ختمه شي. ښاغلي بولات صباح خبري اژانس ته ویلي، چې په ترکیه کې د کاریګرو کموالی دومره جدي دی، چې ان په بهرنیو کاریګرو هم دا ستونزه نه هواریږي.
د اردوغان د کابینې یاد غړی په داسې حال کې بهرنیو کاریګرو ته د ترکیې د اړتیا په اړه خبرې کوي، چې په وروستیو میاشتو کې د کډوالو پر وړاندې د دې هېواد د حکومت د سیاست په اړه د ترکي وګړو او مخالفو ګوندونو غبرګونونه زیات شوي دي.
عمر بولات دغه راز زیاته کړه: «د کاریګرو جدي کموالی شته او دا تشه په بهرنیو کاریګرو ډکولی نه شو. د بېلګې په توګه که له ترکیې څخه ۲۵ زره شپانه ولاړ شي، په دې هېواد کې زراعت او مالي نه پاتې کیږي».
د بولات دا خبرې په ټولنیزو رسنیو کې له بېلابېلو غبرګونونو سره مخ شوي دي.
د ټولنیزو شبکو یوه کاروونکي لیکلي: «حکومت په تېرو ۲۲ کلونو کې دومره ناسم ګامونه پورته کړي، چې که نن د افغانستان او سوریې وګړي نه وی او د غلام په څېر یې کار نه وی کړی، په هېواد کې به یو کروندګر هم نه و.»
د دې مرکې له خپرېدو او د خلکو له پراخو غبرګونونو څو ساعته وروسته د ترکیې د سوداګرۍ وزارت په یوې بیانیه کې توضیحات ورکړل، چې په ټولنیزو رسنیو کې د ښاغلي بولات خبرې «تحریف» شوي دي.
په بیانیه کې یو ځل بیا ټينګار شوی، چې ددې هېواد په ختیځو برخو کې د کاریګرو کموالی شته او دا تشه په افغان کډوالو ډکیږي.
د بیانیې له مخې؛ د کاریګرو کمښت بازارونه اغېزمن کوي.
