د طالبانو تر واک لاندې ملي ټلویزیون راپور ورکړی، چې په پنجشیر کې د لومړي ځل لپاره د زمردو درې ورځنی نندارتون پرانیستل شو. په خبر کې راغلي، چې د دغه نندارتون موخه د قېمتي او نیمه قېمتي ډبرو لپاره د بازار موندل هم دي.
د طالبانو تر واک لاندې باختر اژانس د پنجشیر لپاره د طالبانو د والي محمد اغا حکیم له قوله ویلي، چې د دغه نندارتون د جوړېدو موخه د پنجشیر زمردو ته د کورنیو او بهرنیو سوداګرو پام را اړول دي.
د طالبانو د صنعت او سوداګرۍ وزارت د (چنګاښ په څلورمه) د یوې خبرپاڼې په خپرولو سره ویلي و، چې په پنجشیر کې به د لومړي ځل لپاره د زمردو درې ورځنی نندارتون جوړوي.
دغه وزارت هغه مهال ویلي و، چې دغه نندارتون د خصوصي سکټور په همکارۍ جوړېږي، چې موخه یې د قېمتي او نیمه قېمتي ډبرو د صادراتو وده، د لاسي صنایعو د کلتور پراختیا او پانګونې ته د خلکو رابلل دي.
پنجشېر کې د طالبانو د کانونو رياست د روان لمریز کال په سر کې ويلي و، چې په تېر یوه کال کې یې له درې میلیونو ۶ لکه او ۲۹ زرو د زياتو ډالرو په ارزښت د پنجشېر څه باندې ۵۰ زره قیراطه زمرود پلورلي.
دغه ریاست دا هم ویلي و، له یادې اندازې زمرودو څخه د دوی له ۱۰ سلنې ونډې یې ۳ لکه او ۶۲ زره ۹۷۷ډالره عواید ترلاسه کړي.
د طالبانو د سوداګرۍ وزارت دوه اوونۍ وړاندې ویلي و، په دغه نندارتون کې به د زمردو او قیمتي ډبرو تر څنګ د کرنې برخې تولیدي توکي، د رمل جوړولو دودیز بوټي او غالۍ هم نندارې وړاندې شي.
واک ته د طالبانو له رسېدو وروسته له افغانستان سره بهرنۍ مرستې کمې شوې، دغې ډلې د خپلو مالي اړتیاوو د پوره کولو لپاره د دوامدار عاید د یوې سرچینې په توګه د کانونو او قېمتي ډبرو په استخراج پانګونه وکړه.
د افغانستان د کانونو کېندنه او خرڅلاو د تېر افغان حکومت د چارواکو له سختو نیوکو سره مخ شوی دی. د افغانستان مخکني ولسمشر محمد اشرف غني ویلي وو چې د طالبانو له لوري د کانونو کېندنه مشروع نه ده او معلومه نه ده چې عواید یې چیرته ځي.
