د روسیې ځانګړی استازی: د ترهګرو ډلو له نوملړه د طالبانو د نوم لرې کولو بهیر ښه روان دی
د افغانستان لپاره د روسیې ځانګړی استازی ضمیر کابلوف وایي، د روسیې د ترهګرو ډلو له نوملړه د طالبانو د نوم لرې کولو بهیر په ښه توګه روان دی.
د افغانستان لپاره د روسیې ځانګړی استازی ضمیر کابلوف وایي، د روسیې د ترهګرو ډلو له نوملړه د طالبانو د نوم لرې کولو بهیر په ښه توګه روان دی.
ښاغلي کابلوف د تاس خبري اژانس سره په مرکه کې د دغې پوښتنې په ځواب کې چې څه وخت به طالبان د ترهګرو ډلو له نوملړه واېستل شي، وویل:«کله چې ټول پړاوونه بشپړ شي. لا هم په دې برخه کې کار دوام لري.»
تر دې وړاندې د افغانستان په چارو کې د روسیې د ولسمشر ځانګړي استازي ویلي و، چې د بهرنیو چارو او عدلیې وزارت ولادیمیر پوتین ته خبر ورکړی چې طالبان کولای شي د ممنوعه سازمانونو له نوملړه ووځي.
د روسیې د بهرنیو چارو وزیر سرګي لاوروف ویلي، چې روسیه د دغه هېواد د ترهګریز سازمانونو له نوملړه د طالبانو نومونه باسي.
د روسیې ولسمشر ولادیمیر پوتین د شانګهای همکاریو ناستې په پای کې وویل، چې طالبان په افغانستان کې واک کنټرولوي او له دې اړخه هغوی « د ترهګرۍ پر وړاندې مبارزه کې زموږ متحدین دي.»
خو د طالبانو مخالفینو خبرداری ورکړی، چې د روسیې د ترهګرو ډلو له نوملړه د طالبانو اېستل به منځنۍ اسیا او نورو هېوادونو ته د ترهګرۍ د خورېدو په مانا وي.
