د پښتون ژغورنې غورځنګ مشر منظور پښتین وايي: «نورې قربانۍ ورکوو، سل زره سرونه به مو لاړ شي، خو له خدای پرته به د دنیا هیڅ طاقت ته سر ټيټ نه کړو.» نوموړي دا خبره څو ګړۍ مخکې د پېښور بډه بېره کې د دې غورځنګ د وژل شوي غړي ګیله من وزیر تابوت ته راټولو شویو خلکو ته وکړه.
پښتین په خپله وینا کې دغه راز زیاته کړه، «د وطن خاوره په غلې پاتې کېدو نه ترلاسه کیږي او د وچ مټ په زور به یې ګټو.»
د پښتون ژغورنې غورځنګ مشر د ګیله من وزیر مړینې ته په اشارې سره وویل: «دې سړي مونږ ډېر غمجن کړي یو او په وطن بده ورځ ده، د ګیله من په جود کې تر اوسه هم هغه نښانونه شته چې په سپیو یې خوړلی و.»
نوموړي یو ځل بیا په ټينګار سره وویل، چې ګیله من وزیر «شهادت» قبول کړ، خو سر یې ټیټ نه کړ.
د پښتون ژغونې غورځنګ د مرکزي کمېټې غړی او شاعر ګیله من وزیر چې څو ورځې وړاندې په سر وهل شوی و، تېره شپه په روغتون کې مړ شو.
د ګیله من وزیر مړی له اسلام اباد څخه پېښور ته وړل شوی او تر هغه وروسته خپل پلرني ټاټوبي وزیرستان ته انتقالیږي.
د ګیله من وزیر مړینې زرګونه افغانان خپه کړي او له ډېرو پراخو غبرګونونو سره مخ شوی دی.
د یادولو ده، چې ګیله من وزیر د سیاسي مبارزې ترڅنګ شاعري هم کوله، چې د افغان وطن او ولس روانې ستونزې په کې بیان کړي دي.
