د طالبانو امربالمعروف وزارت وايي، چې د دې ډلې محتسبانو د میدان وردګو په جلګې ولسوالۍ کې د شیعه ګانو لپاره «اصلاحي غونډه» جوړه کړې. طالبانو ويلي، چې محستبانو په دې ناسته کې غوښتنه کړې، چې ښځې دي حجاب مراعت او د امربالمعروف غوښتنو او لارښوونو ته دي غوږ ونيسي.
د طالبانو د امربالمعروف وزارت د شنبې په ورځ په يوې خبرپاڼه کې ویلي، چې په دې غونډه کې علماوو، قومي مشرانو او ځوانان ګډون کړی و.
په اعلاميه کې ويل شوي، چې د ښځو حجاب يو «الهي امر» دی او د هغې په رعايتولو سره «د نیکۍ مخه خلاصیږي او د بدو کارونو مخه نيول کيږي.»
په خبرپاڼه کې راغلي، چې د طالبانو محتسبانو له شیعه علماوو غوښتي، چې د جوماتونو د منبرونو له لارې دي خپل د مذهب پیروان د امربالمعروف ادارې د سپارښتنونو عملي کولو ته را وبولي.
طالبانو ویلي، چې د غونډې ګډونوالو ژمنه وکړه، چې «وړاندیزونه به په بشپړه توګه عملي کوي.»
طالبانو په افغانستان کې د خپلو حکومتونو په جريان کې د شیعه مذهب پر پیروانو بندیزونه لګولي دي.
په دې وروستیو کې د محرم په ورځو کې طالبانو د افغانستان په یو شمېر ښارونو کې د عاشورا د ماتم مراسم محدود کړل او د طالبانو ځواکونو له ماتم کوونکو سره ناوړه چلند وکړ.
دې ډلې تېر کال هم د شیعه عالمانو هغه غوښتنه رد کړه، چې د پوهنتون په نصاب کې دې جعفري فقه شامله شي.
