د فلسطین روغتیايي چارواکو ویلي، چې د یکشنبې په ورځ په غزه کې د اسراییل په هوايي بریدونو کې د ماشومانو په ګډون ۱۹ کسان وژل شوي دي. د روغتیايي چارواکو په وینا؛ دغه ماشومان د دیر البلاح په مرکزي ښار کې په یوه کور کې له خپلې مور سره یو ځای وژل شوي دي.
د اسراییل پوځ تر اوسه د وژل شویو ماشومانو په اړه څه نه دي ویلي.
اسراییل پوځ ویلي، چې په دغو بریدونو کې یې په جنوبي ښار خان یونس کې چې په وروستیو اونیو کې د سختو نښتو ډګر و، پر اسراییل د بریدونو کې کارول شوي راکټ لانچرونه له منځه وړي او ۲۰ فلسطینیان یې وژلي دي.
په همدې حال کې په دې وروستیو ورځو کې د اسراییل او حماس تر منځ د شخړو پای ته رسولو او د غزې د یرغمل شویو کسانو د بېرته ستنولو لپاره د یوې موافقې د تر لاسه کولو لپاره ډیپلوماتیکې هڅې ګړندۍ شوي دي.
په پام کې ده، چې د امریکا، مصر او قطر په منځګړیتوب خبرې اترې روانه اونۍ په قاهره کې دوام وکړي.
تمه ده، چې د بهرنیو چارو وزیر انتوني بلینکن به د اسراییل له لومړي وزیر بنیامین نتنیاهو او نورو لوړ پوړو اسراییلي چارواکو سره هم خبرې وکړي.
د نتنیاهو دفتر د شنبې په ورځ په یوه بیان کې وویل چې "محتاطه خوشبیني" شته، چې یوې موافقې ته به ورسیږي او دا چې امریکایي چارواکو هم د خبرو اترو هرکلی کړی دی.
په ورته وخت کې حماس د امریکایانو خوشبینانه څرګندونې "دروغ" وبللې او نتنیاهو یې تورن کړ، چې د خبرو اترو د ګډوډولو لپاره نوي شرایط رامنځته کوي.
