د پاکستان پوځ وايي، نن یې له ځمکې ځمکې ته توغېدونکی د شاهین دوه په نوم بالستیک توغندی په «بریالیتوب» سره وازمویه. د پوځ د عامه اړیکو په اعلامیه کې راغلي، د دې توغندي د توغولو موخه د ځواکونو روزل، د تخنیکي پارامیترونو د ځانګړنو باور سنجول او د سیستمونو د چارو ارزول و.
په اعلامیه کې راغلي چې د دې توغولو پر مهال پر پوځي قومندانانو سربېره د ستراتیژیکو څانګو انجینران او مشران هم وو.
د پاکستان ولسمشر، لومړي وزیر، د پوځ لوی درستیز او نورو مشرانو د دې بري له امله ساینسپوهانو او انجینرانو ته مبارکي ور کړې ده.
د پاکستان د کورنیو چارو وزیر محسن رضا نقوي د شاهین دوه توغندي ازمویلو ته په اشاره وايي: «زموږ انجینرانو او پوهانو بیا خپل مسلکي او تخنیکي تخصص ننداره کړ. د دوی په هڅو پاکستان توغندیزه ټیکنالوجۍ کې له یو بل مهم پړاو نه تېر شو.»
پاکستان د پوځي او دفاعي ځواک زیاتولو لپاره پرلپسې هڅه کوي، چې د توغندیو او وسلو برخه کې له خپل سیال هند سره یو شان اوسي.
د پاکستان پوځ د تېرې مۍ پر ۱۵ د د فتح دوه په نوم توغندی وازموی، چې ۴۰۰ کیلومتره لرې واټن ویشتلی شي.
پوځ وايي، دغه توغندی د توغندیو له دفاعي سیستمه تېر تېرېدلی او خپل هدف ویشتلی شي.
