د کابل - جلال اباد لار د غره د ښویېدنې له امله د ترافیکو پر مخ تړل شوې ده
سیمه ییزې سرچینې وايي، چې د کابل - جلال اباد لار په تنګي سیمه کې د څو ځایه غره ښویېدنې له امله د ترافیکو پرمخ تړل شوې او شدید باران لا هم روان دی.
سیمه ییزې سرچینې وايي، چې د کابل - جلال اباد لار په تنګي سیمه کې د څو ځایه غره ښویېدنې له امله د ترافیکو پرمخ تړل شوې او شدید باران لا هم روان دی.
د سمیع ګل په نوم د ټولنیزو شبکو یوه کارونکي د یوې ویډیو په خپرولو سره ویلي، چې نېږدې ماښام مهال یاده لاره تړل شوې ده.
نوموړي افغانستان انټرنشنل - پښتو ته ویلي، چې په سلګونه موټر د دواړو خواو څخه بند پاتې دي او باران لا هم روان دی.
همداراز د ننګرهار اوسېدونکی ډاکتر نجیب الله رحیمي چې دا مهال کابل ته پر لار دی، افغانستان انټرنشنل - پښتو ته وویل، چې څو ځایه غر ښویېدلې او سلګونه موټر پر سړک بند پاتې دي.
نوموړي زیاته کړه، چې تر دا مهال د لارې د خلاصون لپاره کوم اقدامات نه دي شوي.
د یادونې وړ ده، چې د کابل - جلال اباد لویه لار وخت ناوخت د شدیدو بارونونو پر مهال د غره د ښویېدنې له امله تړل کیږي.
د لغمان لپاره د طالبانو امنیه قوماندانۍ هم رسنیو ته د لارې بندښت تایید کړی.
