داعش د جرمني په لویدیځ کې د چړې برید مسوولیت پر غاړه واخیست
داعش د یوې اعلامیې په خپرولو سره، د جرمني په لوېدیځ کې د زولینګن په ښار کې د چړې د برید مسوولیت منلی دی. په دغه برید کې درې تنه وژل شوي او اته تنه نور ټپیان شوي دي.
داعش د یوې اعلامیې په خپرولو سره، د جرمني په لوېدیځ کې د زولینګن په ښار کې د چړې د برید مسوولیت منلی دی. په دغه برید کې درې تنه وژل شوي او اته تنه نور ټپیان شوي دي.
تر دې مخکې جرمني چارواکو ویلي وو، چې دا هدفي برید و او د دې احتمال شته چې دا یو ترهګریز برید وي.
د نوردراین وستفالن د کورنیو چارو وزیر هربرت ریول دا برید "هدفي" بللی و.
د جرمني لوی څارنوال هم ویلي و، چې ښایي دغه برید د ترهګرۍ انګېزه ولري.
دا پېښه تېره شپه رامنځته شوې او بریدګر د یو کولتوري جشنوارې پر ګډونوالو د چاقو په وسیله برید کړی دی. برید کوونکی نیول شوی خو تر اوسه یې هویت نه دی څرګند.
برید د ښار په مرکز فرونهوف میدان کې شوی، چې شاوخوا یې دوکانونه، رستورانتونه او د پیر او پلور یو مرکز دی.
دغه برید جرمنانو کې د اندیښنې څپې راپارولي دي.
د روسیې او اوکراین حکومتونو د شنبې په ورځ وویل، چې د متحده عربي اماراتو په منځګړتوب هر یو هیواد ۱۱۵ بندیان تبادله کړي دي. پر اوکراین د روسیې له برید وروسته دا اووم ځل دی چې د دواړو هېوادونو ترمنځ د بندیانو تبادله د متحده عربي اماراتو په منځګړتوب ترسره کېږي.
د روسیې د دفاع وزارت وویل، چې تبادله شوي روسي بندیان د کرسک په سیمه کې د اوکرایني ځواکونو له خوا نیول شوي وو. دغه وزارت زیاته کړه، چې ټول تبادله شوي بندیان اوس په بلاروس کې دي او روسیې ته د هغوی د راستنیدو او د هغوی د درملنې لپاره لازم تدابیر نیول شوي دي.
ورته وخت کې د اوکراین ولسمشر ولادیمیر زلنسکي د شنبې په ورځ د یو شمېر خوشې شویو اوکرایني بندیانو عکسونه خپاره کړل چې د دغه هېواد بیرغ یې پر اوږو پروټ دی. زلنسکي وویل، چې دا کسان د اوکراین د سرحدي ساتونکو، سمندري او وسله والو ځواکونو غړي دي.
د متحده عربي اماراتو د بهرنیو چارو وزارت د روسیې او اوکراین ترمنځ د بندیانو د تبادلې د اسانتیا په برخه کې د خپل رول په تاییدولو سره وویل، چې د دغه هېواد په منځګړیتوب د تبادلې شویو بندیانو شمېر یو زرو ۷۸۸ تنو ته رسیدلی دی.
متحده عربي امارات په داسې حال کې چې د متحده ایالاتو د نږدې امنیتي متحد په توګه پیژندل کیږي، د روسیې او اوکراین ترمنځ د بندیانو په تبادله کې فعال رول لوبولی او له مسکو او کییف سره یې خپلې نږدې اړیکې ساتلي.
د متحده عربي اماراتو چارواکو وویل، چې نړۍوالو بېلابېلو لوبغاړو سره د دوی د خبرو وړتیا دوی ته دا اجازه ورکوي چې په اغیزمنه توګه د بیلابیلو اړخونو ترمنځ منځګړیتوب وکړي او نړۍواله همکاري او امنیت پیاوړی کړي.
د فرانسې په سويل کې د شنبې په ورځ (د وږي ۳ مه) د یو سنیګاک (د یهوديانو عبادت ځای) بهر په يوې چاودنه کې يو پولیس زخمي شوی. د فرانسې لومړي وزير ګابريل ايتيل دا چاودنه د «یهودیانو ضد کړيو کار» بللی دی.
د رسنیو د راپورونو له مخې، د فرانسې په سویل کې د لاګراند موتې ښار د بایس یاکوف سنیګاک د موټرونو په تم ځای کې دوو موټرو ته اور اچول شوی، چې له امله یې چاودنه شوې ده.
د لاګرانډي موتې ښاروال وویل، چې د څارنې کیمرې د یو کس تصويرونه اخيستي، چې د عبادت ځای څخه بهر موټرو ته اور اچوي.
د رسنیو د راپورونو له مخې «د بریدګرو سره د فلسطین بیرغ وو.»
د ټولنیزو رسنيو په نشر شويو تصويرونه کې په عبادت ځای کې لوګي او اور معلوميږي.
د فرانسې د کورنیو چارو وزیر ګیرالډ درمانین دا برید «په ښکاره ډول جنایتکاره» بللی او لیکلي یې دي، چې د فرانسې د ولسمشر ایمانویل مکرون په امر ټول ځواکونه د عاملینو د موندلو لپاره ګمارل شوي دي.
د فرانسې لومړي وزیر دغه چاودنه د «یهودانو ضد برید» د یادولو ترڅنګ وویل، چې د ترهګرۍ ضد څارنوالۍ دفتر څېړنې کوي.
هغه په خپله اېکس پاڼه ليکلي: «موږ به هيڅ وخت د یهوديت ضد تاوتريخوالي ته تسليم نه شو.»
ایتیل ژمنه وکړه، چې ژر به د یهودیانو د عبادت ځایونو ساتنې ته پام ډېر کړي.
چاودنه د یهودي «شبات» یا د استراحت د ورځې په جریان کې شوې، چې د جمعې له ماښام څخه تر شنبې ماښام پورې دوام کوي.
په دې وخت کې د دې مذهب ډیری پیروان معمولا د مذهبي چارو لپاره عبادت ځایونو ته ځي.
د پولیسو د یو چارواکي په وینا، د دې پېښې پر مهال هلته کوم مذهبي مراسم نه وو.
د فرانس ۲۴خبري شبکې د خبر له مخي، په دې چاودنه کې د عبادت ځای دوې دروازې زیانمنې شوې دي.
پولیسو د عبادت ځای شاوخوا سیمه کلابنده کړې ده.
دا چاودنه په داسې حال کې شوې، چې فرانسې او نور اروپايي هېوادونو د غزې د جګړې له امله لوړ امنیتي تدابیر نیولي دي.
د فرانسې د کورنیو چارو وزیر په دې وروستیو کې ويلي، چې حکومت يې د۲۰۲۴ کال په لومړۍ نیمایي کې په فرانسه کې د یهودیانو ضد کړونو ۸۸۷ پېښې ثبت کړي دي.
دا شمیر د ۲۰۲۳ د ورته مودې په پرتله نږدې درې برابره ډیر دی.
فرانسه د اسراییلو او امریکا څخه وروسته د یهودیانو ترټولو ډیر نفوس لري او همدارنګه په اروپایی ټولنه کې د مسلمانانو ترټولو لوی شمېر لرونکی هیواد هم دی.
د جرمني پولیسو د شنبې په ورځ (د وږي درېیمه) وویل، چې د زولینګن ښار په مرکز کې یې د برید په تړاو یو کس نیولی دی. د جرمني ځایي رسنیو د جمعې په ماښام راپور ورکړ، چې یو کس د دغه هېواد په لویدیځ کې په یو فسټیوال کې برید کړی، چې په پایله کې درې تنه وژل شوي او اته تنه نور ټپیان دي.
د جرمني پولیسو د شنبې په ورځ په یوې اعلامیه کې د دې پېښې لامل "نامعلوم" وباله او وې ویل، چې د برید په تړاو ل نیول شوي کس څخه څېړنې کوي.
دغه اعلامیه زیاته وي: «د دې برید د احتمالي لاملونو لپاره څیړنې روانې دي.»
رسنیو په خپلو راپورونو کې لیکلي، چې بریدګر پر هغو لارویانو برید کړی، چې د زولینګن مرکز ته د یو کولتوري فسټیوال د لیدو لپاره تلل.
د جرمني لوی څارنوال هم وویل، چې ښایي دغه برید د ترهګرۍ انګېزه ولري.
پولیسو د جمعې په ماښام وویل، چې بریدګر تښتیدلی او د لټون لپاره یې عملیات پیل شوي دي.
برید د ښار په مرکز فرونهوف میدان کې شوی، چې شاوخوا یې دوکانونه، رستورانتونه او د پیر او پلور یو مرکز دی.
د پاکستان لومړی وزیر د بلوچشتان په پشین کې د چاودنې غندلو سره وايي، «د ترهګرۍ ضد جګړه به یې روانه وي.» د پولیسو مرکز سره چاودنه کې ۲ ماشومان ووژل او د ۷ پولیسو په ګډون ۱۶ کسان ټپي شول. شهباز شریف په اعلامیه کې د دې برید قربانیانو سره خواخوږي ښيي او د ټپیانو د رغېدو هیله کوي.
د پاکستان رادیو د راپور له مخې، نوموړی په اعلامیه کې ټپیانو ته د ممکنه درملنې د برابریدو غوښتنه کوي.
ښاغلی شریف وایي، د دې پېښې عاملان باید وپېژندل او په سزا ورسول شي.
د پشین د پولیسو منظور بولدي وايي، موټرسیکل کې ایښي باروت نن په پشین کې د پولیسو مرکز سره نږدې وچاودېدل.
د هغه په خبره، په دې پېښه کې ۷ پولیس او ۹ ولسي وګړي ټپي شوي دي.
د پولیسو بل مشر مجیب رحمان وايي، دې چاودنه کې له دې سیمې تېرېدونکي دوه ماشومان هم ووژل شول.
د دې برید مسوولیت کومې ډلې نه دی منلی.
د نژادي تبعیض د له منځه وړلو په اړه د ملګرو ملتونو کمېټې په خپل دوره یي راپور کې، ایران کې د تېرو ۵ کلونو او ۱۳۹۸ د لړم له میاشتې راهیسې د اعتراضونو په ترڅ کې د توکمیزو او مذهبي لږکیو ناقانونه وژنې، شکنجې، جنسي تېري او ناوړه چلند د بشري حقونه له قانون څخه ستره سرغړونه بللې ده.
دغې کمېټې په خپل راپور کې چې د جمعې په ورځ (د وږي دویمه) خپور شو، په ایران کې د مذهبي لږکیو پر وړاندې د بشري حقونو سرغړونې او د امنیتي ځواکونو ناوړه چلند په اړه خپله ژوره اندېښنه څرکنده کړه، چې د ۱۳۹۸ کال لرم میاشت، ۱۴۰۰ کال چنګاښ میاشت او ۱۴۰۱ په وږي میاشت کې ترسره شوي.
دغې کمېټې ایران څخه وغوښتل، چې په دغو لاریونونو کې د حکومتي استازو له خوا د بشري حقوقو د سرغړونو د ادعاګانو په هکله سمدستي خپلواکه او بې پري څیړنې وکړي او قربانیانو ته دې د تاوان ورکولو امکانات برابر کړي.
کمیټې د هغو راپورونو په اړه خپله اندیښنه څرګنده کړه، چې لوی شمېر یې د قومي او مذهبي اقلیتونو قضایي او جنایي قضیې دي.
په راپور کې ټینګار شوی، چې دا اقلیتونه د عمومي او مبهم جرمونو لکه د مخدره توکو د قاچاق، اعدام او نورو سختو سزاګانو سره مخ دي.
د نژادي تبعیض د له منځه وړلو په اړه د ملګرو ملتونو کمیټې له ایران څخه وغوښتل، چې دغه قانون ته له سره کتنه وکړي او له خپلو قوانینو څخه هغه جنایتونه لرې کړي چې دقیق تعریف نه لري خو د اعدام سزا ورته ټاکل شوې.
د هرانا ویب پاڼې په خپل نوي راپور کې ویلي، چې د ایران قضایي څانګې د زمري په میاشت کې په هرو اوو ساعتونو کې په اوسط ډول یو کس اعدام کړی دی.
د دغه راپور له مخې، په تېره یوه میاشت کې لږ تر لږه ۱۰۶ کسان د ایران په زندانونو کې اعدام شوي دي.
