افغانستان کرېکټ بورډ د نيوزيلنډ پر وړاندې د يوازينۍ ټېسټ لوبې د تمريناتي کمپ لپاره د افغان لوبغاړو ۲۰ کسيز نوملړ اعلان کړ. افغان لوبډله به د حشمت الله شاهدي په لوبډلمشرۍ د اګسټ په ۲۸مه نېټه هندستان ته سفر وکړي.
د افغانستان کرېکټ بورډ د دوشنبې په ورځ په يوې اعلاميه کې ويلي، چې د نيوزيلنډ لوبډلې سره د ټېسټ لوبې لپاره به د افغان لوبغاړو دغه تمريناتې کمپ د اګسټ په ۲۹ مه نېټه د هند په ګرېټرنويډا کرېکټ لوبغالي کې پيل شي.
د بورډ په خبره، چې د دوی د غوراوي کمېټه به د تمريناتو پرمهال د نيوزيلنډ سره د ټېسټ لوبې لپاره ۱۵ افغان لوبغاړي غوره کړي.
کرېکټ بورډ په دې تمريناتي کمپ کې حشمت الله شهيدي (لوبډلمشر) ابراهيم ځدراڼ، رياض حسن، عبدالمالک، رحمت شاه، بهيرشاه محبوب، اکرام علي خېل (ويکټ ساتونکی)، شاهدالله کمال، ګلبدين نايب، افسر ځاځی (ويکټ ساتونکی)، عظمت الله عمرزی، ضیاء الرحمان اکبر، شمس الرحمان، قيس احمد، ظاهرخان، نجات مسعود، فريد احمد ملک، نويد ځدراڼ، خلیل احمد او یما عرب ټاکلي دي.
د کرېکټ بورډ مشر ميرويس اشرف هم د نيوزيلنډ پر وړاندي د يوازينۍ ټېسټ لوبې لپاره د افغان غوره لوبډلې د ټاکلو هيله ښودلې.
ښاغلی اشرف وايي: «په کورني کرېکټ کې مو ځينې ځوان او پياوړي لوبغاړي پېدا کړل، چې له نېکه مرغه اوس د ټېسټ په نوملړ کې هم ځای ورکړل شوی دی.»
د افغانستان او نيوزيلنډ دغه يوازينۍ ټېسټ لوبه به د هند په ګريټرنويډا لوبغالي کې د راتلونکې سپټمبر مياشتي په ۹ مه نېټه پيل د همدې مياشتي تر ۱۳ مې نېټې به دوام وکړي.
