په اسیا تکواندو کې افغان لوبغاړی له «افغانو نجونو ته د زده کړو اجازه ورکړئ» شعار سره
د افغانستان د ای ټي ايف تکواندو ملي لوبډلې لوبغاړی سید انور حسيني د اسیا تکواندو په لسمه سيالۍ کې د « افغان نجونو ته د زده کړو اجازه ورکړئ» له شعار سره ګډون وکړ.
د افغانستان د ای ټي ايف تکواندو ملي لوبډلې لوبغاړی سید انور حسيني د اسیا تکواندو په لسمه سيالۍ کې د « افغان نجونو ته د زده کړو اجازه ورکړئ» له شعار سره ګډون وکړ.
دغه سیالۍ د ۲۰۲۴ کال د اګسټ له ۱۹مې څخه تر ۲۵مې نېټې د هند په بنګلور ښار کې د ۳۲ هېوادونو د لوبغاړو په ګډون ترسره شوې.
دغه افغان لوبغاړي د قزاقستان او هندي سیالانو پر وړاندې بریا خپله کړه او د کوریا له لوبغاړي سره یې په لوبه کې ماتې وخوړه.
سید انور حسیني تر دې مخکې د ۲۰۲۳ کال د سویلي اسیا په سیالیو کې د سپینو زرو مډال ګټلی و.
د طالبانو بهرنیو چارو وزارت په يوې اعلاميه کې ويلي، چې د دغه ډلې د بهرنيو چارو وزير اميرخان متقي د اسلامي هکاريو سازمان د بهرنيوو چارو وزيرانو په ۵۰ مه غونډه کې د ګډون په موخه د کامرون جمهوريت پلازمينې يادوندې ته ولاړ.
د طالبانو د بهرنیو چارو وزارت مرستيال ویاند حافظ ضيا احمد د سې شنبې په ورځ په يوه ويډيو پيغام کې ويلي، چې امیرخان متقي به په دې ناسته کې د ګډون ترڅنګ د اسلامي هېوادونو له وزيرانو سره هم دوه اړخيزې ناستې ولري.
نوموړي د دوه اړخيزو ناستو د مشخصو اجنډاو په اړه جزیيات نه دي ورکړي.
د اسلامي همکاريو سازمان د بهرنیو چارو وزيرانو دغه ناسته د اګسټ مياشتي په ۲۹ مه او ۳۰ مه د کامرون جمهوريت په کوربتوب تر سره کیږي.
د اسلامي همکاريو سازمان په وار - وار د افغانستان پر واکمنو طالبانو له دې امله نيوکې کړې دي، چې په هېواد کې يې د نجونو او مېرمنو پر زده کړو او کار بنديزونه لګولي دي.
د افغانستان لپاره د اسلامي همکاريو سازمان ځانګړي استازي طارق علي بخيت د روان ۲۰۲۴ کال په اپرېل مياشت کې د يوه پلاوي په مشرۍ کابل ته په سفر کې له طالب چارواکو سره په خبرو کې د ښځو د اساسي حقونو د تامين پر اړتيا ټينګار کړی وو.
په افغانستان کې طالب مشران وايي، چې د اسلامي شريعت په چوکاټ کې د ښځو حقونو ته ژمن دي.
د اسلامي همکاريو سازمان سره ۵۷ هېوادونه غړيتوب لري.
د دې سازمان موخه د مسلمانانو ټوليز غږ، د غړو هېوادونو د ملي ګټو ساتل، پرمختګ او په نړۍواله کچه د سوله ييزې فضا رامنځته کول دي.
دغه سازمان په ملګرو ملتونو کې یو دايمي غړی هم لري.
د طالبانو د هوا پېژندنې ادارې د افغانستان په ۱۱ ولایتونو کې د سختو اورښتونو، بادونو، دوړو، برېښنا او سېلابونو اټکل کړی دی. دغې ادارې په خپل اټکل کې ويلي، چې د وږي په ۷مه نېټه به په دې ولایتونو کې د باران کچه له ۱۵ تر ۳۰ ملي مترو پورې وي.
د طالبانو هوا پېژندنې ادارې د سې شنبې په ورځ خلکو ته په يوې خبرتيا کې ویلي، چې سبا ته په بدخشان، نورستان، کونړ، ننګرهار، لغمان، لوګر، میدان وردګ، غزني، پکتيا، پکتيکا او خوست ولایتونو کې د بارانو او سېلابونو اټکل شوی.
د طالبانو په دې اعلامیه کې راغلي، چې د سالنګونو په ګډون په شمال ختيځو، شمالي، سوېلي، ختيځو او مرکزي ولایتونو کې هم د بادونو، دوړو او خاورو د پېښېدو اټکل شته.
د دوی د معلوماتو له مخې؛ په بېلا بېلو سېمو کې به د باد د سرعت کچه په ساعت کې له ۵۰ څخه تر ۹۰ کیلومتره وي.
طالبانو ويالو او سیندونو ته نږدې اوسېدونکو ته خبر ورکړی، چې مخکې له مخکې دې خپل لومړني تدابير ونيسي.
دا په داسې حال کې ده، چې په دې وروستيو ورځو کې د کابل په لوېديځ او يو شمېر ولايتونو کې د سختو اورښتونو په پایله کې سېلابونه راوتلي، چې یو شمېر د استوګنې کورونه یې ویجاړ کړي وو.
د کابل د دشت برچي اوسېدونکو د سېلابونو د راوتلو او د خلکو کورونو ته د ور اوښتو زيانونو د ويډيو په لېږلو سره افغانستان انټرنشنل ته وويل، چې تر اوسه یې د طالبانو له پېښو سره د مبارزې وزارت له چارواکو هېڅ مرسته نه ده تر لاسه کړې.
د ملګرو ملتونو د بشري چارو د همغږۍ دفتر وايي، چې په افغانستان کې ۶۷ سلنه کورنۍ اوبو ته د لاس رسي له ستونزو سره مخ دی. دغه دفتر د سې شنبې په ورځ وویل، چې په افغانستان کې د هوا د تودوخې لوړېدو د اوبو کمښت لاپسې زیات کړی دی.
دغه سازمان د سې شنبې په ورځ (د وږي ۶ مه) په اېکس ټولنیزه شبکه کې په یوه یادښت کې لیکلي، چې کلیوالې کورنۍ د اوبو د تر لاسه کولو لپاره په اوسط ډول ۱۷ دقیقې مزل کوي او په ښار کې کورنۍ د تېر کال په پرتله دوه برابره پیسې ورکوي.
اوچا وايي، په ۲۰۲۱ کال کې به په افغانستان کې ۴۸ سلنه کورنۍ اوبو ته د لاسرسي له ستونزې سره مخ وې.
په دې وروستیو کې د افغانستان لپاره د اروپايي ټولنې استازي په دغه هېواد کې د اوبو د بحران په پراخېدو اندېښنه ښودلې او ویلي یې دي، چې وچکالي، ککړتیا او له اوبو ډېره ګټه اخیستنه د خلکو د اوبو سرچینې ګواښي.
د سې شنبې په ورځ د ملګرو ملتونو د بشري حقونو عالي کمېشنر ولکر ترک پر طالبانو غږ وکړ، چې سمدستي دې د امربالمعروف نوی قانون لغوه کړي. ښاغلي ترک په یوه خبري کنفرانس کې وویل؛ طالبان هڅه کوي چې له دې قانون سره د ښځې سیوری بې څېرې او بې غږه کړي.
د ملګرو ملتونو د بشري حقونو عالي کمېشنر زیاتوي، چې دغه قانون د طالبانو هغه سیاستونه پياوړې کوي چې ښځې په بشپړه توګه له عامه ژوند څخه حذف کوي.
ولکر ترک وویل، "دا قانون د ښځو غږونه خاموشوي، د هغوی فردي خپلواکي یې سلب کړي، او هغوي لکه سیوری بې څېرې او بې غږه کوي."
د ملګرو ملتونو د بشري حقونو عالي کمېشنر ټینګار کړی، چې په افغانستان کې د دغه قانون پلي کېدل "د زغم وړ نه دي".
د طالبانو هغه قانون چې پر ښځو سخت بندیزونه لګوي، د نړۍوالو سازمانونو او د نړۍ د هېوادونو غبرګونونه راپارولي دي.
د دغه قانون په غبرګون کې افغان ښځینه فعالانو د "د ښځې غږ عورت نه دی" تر نامه لاندې یو کمپاین پیل کړی او د ښځو پر وړاندې یې د طالبانو د نویو بندیزونو پر وړاندې د اقدام غوښتنه کړې ده.
د طالبانو امربالمعروف او نهې عن المنکر وزارت د نوي قانون له مخې په افغانستان کې د سوک وهنې پر ازادو سیالیو یا یا فري فايټ بنديز ولګول شو. د طالبانو په دغه مکتوب کې دغه سيالۍ د دوی د خوښې «اسلامي شریعت» سره په ټکر کې بلل شوې دي.
په افغانستان کې د طالبانو د بدني روزنې او ورزش ادارې مشر احمدالله وثیق د سې شنبې په ورځ طلوع نيوز خصوصي تلویزیون ته منلې، چې د دغې ډلې د امربالمعروف او نهې عن المنکر وزارت د رسمي مکتوب له مخي پر فري فايټ سياليو بنديز لګول شوی.
ښاغلي وثيق په خپلو خبرو کې ويلي: « فري فايټ سيالۍ له تاوتريخوالي ډکې دي او د لوبغاړو د مرګ ګواښ په کې ډېر دی.»
د طالبانو د امربالمعروف وزارت یو مکتوب، چې افغانستان انټرنشنل ـ پښتو تر لاسه کړی، پکې یې له ملا هبت الله غوښتي چې ځینې بندیزونو منظور کړي.
په دې مکتوب کې راغلي، چې پټۍ پرېکول، د ځانګړو ورځو لمانځل، په ادارو کې پر سرو قالینو ګرځېدل او ازادې سیالۍ د اسلام په دین کې نه شته.
دغه مکتوب شاوخوا درې میاشتې وړاندې د خالد حنفي په لاسلیک د دې ډلې مشر ملا هبت الله ته لېږل شوی او هغه هم منلی او توشیح کړی دی.
د طالبانو د امربالمعروف وزارت په دې مکتوب کې د بوکس ازادو سیالیو د بنديز اړوند لیکل شوي: « پر دې لوبه باندې ځکه بندیز دی، چې د سترګو د ړندېدو او دماغو د زخمي کېدو تر څنګ د مرګ خطر دی؛ نو په اسلامي شریعت کې دغه شان لوبه ناجایزه نه ده.»
د ازادو سیالیو یا فري فایټ یو شمېر افغان لوبغاړو د طالبانو دغه اقدام غندلی او غوښتنه یې کړې، چې پر دې پرېکړه له سره غور وکړي ځکه دوی به دې برخه کې ډېرې لاسته راوړني ولري.
طالبانو په خپله درې کلنه واکمنۍ کې د ورزش نورو لوبغاړو ته هم په شفاهي ډول د «شريعت د عملي کولو» لارښوونې کړي.
د طالبانو د امربالمعروف او نهې المنکر محتسبانو په ولایتونو کې د فوټبال له لوبغاړو هم غوښتي، چې ږيري پرېږدی او هم د لوبو پرمهال داسي لباس واغوندي، چې ټول بدن یې پټ وي.
په افغانستان کې واک ته د طالبانو په رسېدو د ښځو هر ډول ورزشي فعالیتونه هم بند شوي دي.
که څه هم افغان لوبغاړې له افغانستان بهر د فوټبال، کرېکټ، باسيکل ځغلونې او یو شمېر نورو برخو کې لوبډلې لري او فعالیتونه کوي؛ خو دغې ډلې څه موده مخکي په فرانسه کې د المپيک په سياليو کې د دريو افغان ښځينه لوبغاړو ګډون ته په اشارې ويلي و، چې دغه لوبغاړې د دوی استازولي نه کوي.