د افغانستان د ښځو په چارو کې د امریکا ځانګړې استازې وایي، چې د ښځو پر وړاندې د طالبانو تګلارې جنسیتي ځورونو ته ورته دي. رینا امیري، له هېل ورځپانې سره په خبرو کې وویل، چې له طالبانو سره د اړیکو د عادي کولو شرط د دوی د افراطي سیاستونو پای ته رسول دي.
مېرمن امیري زیاتوي؛ د ښځو پر وړاندې د طالبانو تګلارې دا نظر پیاوړی کوي، چې طالبان هغه تګلارې مخته وړي چې د دې ډلې د لومړۍ واکمنۍ د پرځېدو لامل شوې.
رینا امیري وایي؛ امریکا د افغان نجونو د ملاتړ او د نړۍوالې ټولنې د منظم کولو په برخه کې له هرې شونې لارې کار اخلي، چې طالبانو ته خپل روښانه پیغام ورسوي.
نوموړې هېل امریکایي ورځپاڼې ته وویل، چې له طالبانو سره د اړیکو د عادي کولو شرط ددغې ډلې د افراطي تګلارو پایته رسول او په افغانستان کې د بشري حقونو د وضعیت ښه کېدل دي.
دا په داسې حال کې ده، چې د طالبانو مشر په دې وروستیو کې د «امر بالمعروف او نهې عن المنکر» په نامه لاندې نوی قانون توشېح کړی دی.
دغې ډلې په دې قانون کې د ښځو د غږ د (عورت) بللو په ګډون د ښځو پر وړاندې بیا پراخ بندیزونه لګولي دي.
د طالبانو د امربالمعروف دغه قانون د کورنیو او بهرنیو فعالانو له پراخو نیوکو سره مخ شو.
طالبانو بیا په یوه سخت غبرګون سره ټینګار وکړ، چې د نړۍوالو غندل او نیوکې د امربالمعروف د دغه قانون په پلي کولو کې هېڅ کومه اغېزه نه لري.
د یادې ډلې ویاند ذبیح الله مجاهد په دې اړه نیوکې د شریعت پر وړاندې سپکاوی بللی او د طالبانو د امربالمعروف وزیر محمد خالد حنفي بیا نیوکه کوونکي بې حیثیته وبلل.