د طالبانو د ډلې مرستیال ویاند حمدالله فطرت ویلي، چې د طالبانو د بهرنیو چارو وزیر د کامرون جمهوريت پلازمېنه کې د اسلامي همکارۍ سازمان د بهرنيو چارو وزيرانو شورا د ۵۰مې ناستې په څنډو کې د بېلابېلو هېوادونو له استازو سره جلا، جلا ناستې لرلې دي.
نوموړي په اېکس پاڼه لیکلي، چې ښاغلي متقي د دغې ناستې په څنډو کې د سعودي عربستان، ترکيې، قطر، اذربايجان، عُمان، اندونيزيا، ایران، فلسطین، سومالیا او د یوشمېر نورو هېوادونو له استازو او د اسلامي همکارۍ سازمان اړوندو تخصصي ادارو له مسوولينو سره په جلا، جلا ډول لیدلي دي.نوموړي زیاته کړې، چې په دغو ناستو کې له اړوندو لوریو سره د دوه اړخيزو اړيکو پر پياوړتيا او په بېلابېلو ډګرونو کې د همکارۍ د نويو فُرصتونو پر رامنځته کولو مفصلې خبرې وشوې.تر دې وړاندې د طالبانو د بهرنیو چارو وزیر امیر خان متقي په کامرون کې د اسلامي همکاریو د سازمان د غونډې په څنډه کې د ښځو د پراختیا سازمان له اجرایوي مشرې افنان الشعيبي سره هم کتلي و.خو په دغه غونډه کې د طالبانو د بېرغ پر ځای د افغانستان درې رنګه ملي بېرغ ځړول شوی و او د اسلامي هېوادونو د بهرنیو چارو د وزیرانو په يو ځايي عکس کې د طالبانو د بهرنیو چارو وزیر ته اجازه نه وه ورکړل شوې.
د هغو اسنادو له مخې چې افغانستان انټرنشنل ته رسېدلي، له کلونو راهیسې د دولت یار په ولسوالۍ کې د «سردارخېلو» او «تایمني» قومونو ترمنځ د ځمکې پر سر شخړه روانه ده.
ويل کېږي، چې د دغو دوو قومونو ترمنځ پر شاوخوا اته سوه زره جريبه ځمکې شخړه ده.
د ځايي اوسېدونکو په خبره، په دې وروستيو کې په غور کې د طالبانو والي احمدشاه دين دوست د دې ډلې د قومونو او قبايلو د وزير نورالله نوري په ملتيا د دغو دوو قومونو ترمنځ د جګړې د مخنيوي اړوند پرېکړه کړې، چې د کشرو درې د کلي ټول اوسیدونکي دې خپل کورونه پریږدي او دغه کورونه او جایدادونه دې د سردارخیلو قوم ته وسپاري.
ځايي سرچينې وايي، چې د خلکو د شورا د معلوماتو له مخې، په کشرو کلي کې شاوخوا ٦٠٠ کورنۍ ژوند کوي.
دوی وايي: «په غور کې د طالبانو والي دغو کورنیو ته امر کړی، چې ژر تر ژره خپل کورونه پرېږدي او دا چې حق نه لري، چې کرنیز محصولات، وسایل او څاروي له ځانه سره یو سي.»
تر اوسه طالبانو د دې پېښې په اړه څه نه دي ویلي.
یو شمېر ځايي اوسېدونکي، چې د طالبانو له خوا «جبري ایستلو» ته اړ شوي، افغانستان انټرنشنل ته ځینې اسناد استولي او ادعا کوي، چې په دغه کلي کې له څو نسلونو او نږدې ۵۰۰ کلونو راهیسې ژوند کوي.
دوی وايي، چې د افغانستان د تاریخ کې د لومړيو وختونو د ملکیت سندونه لري؛ خو طالبان دا اسناد نه مني.
