د امریکا د عدلیې وزارت اعلان کړی، چې د محمد شهباز خان په نوم یو پاکستانی، چې په کاناډا کې اوسيږي، په نیویارک کې د یهودانو پر یوه مرکز د داعش لپاره د وسله وال برید په پلانولو تورن شو. محمد شهباز خان د چهارشنبې په ورځ په کاناډا کې ونیول شو.
د امريکا د عدليې وزارت د جمعې په ورځ (د وږي ١٦مه) په يوه خبرپاڼه کې ليکلي، ټاکل شوې وه محمد شهباز خان دغه بريد د اکتوبر په اوومه پر اسراييل د حماس د بريد د کليزې په شاوخوا کې په نيويارک کې ترسره کړي.
د خپرو شويو معلوماتو له مخې، نوموړي په نيويارک کې د يهودانو پر يوه مرکز د ډزو نيت درلود.
دغه پاکستانی وګړی تېره چهارشنبه د کاناډا په کبک کې ونیول شو.
د امریکا د عدلیې وزارت وايي، محمد شهباز خان چې په شازب جادون مشهور و، د ایف بي ای او کاناډايي امنیتي چارواکو په همکارۍ پېژندل شوی دی.
دغه وزارت ټینګار کړی، چې امریکا به له خپلو کورنیو او نړیوالو شریکانو سره د داعش او نورو ترهګرو سازمانونو او د هغوی د ملاتړو له خوا له رامنځته شوي ګواښ سره د مقابلې لپاره ګډ کار ته دوام ورکړي.
د امریکا دفاع وزیر د اوکراین د ولسمشر په ځواب کې وايي، هیڅ داسې وړتیا نشته چې د روسیې پرضد د اوکراین جګړه د کیف په ګټه بدله کړي. ولادیمیر زیلنسکي پرون د اوکراین له لویدیځو متحدینو د روسیې په خاوره کې د بریدونو لپاره د لر واټنه وسلې د کارولو اجازه وغوښته.
ښاغلي زیلنسکي وویل، اوږد واټنه توغندي به د جګړې پای ته رسولو لپاره پر روسیې فشار راوړي.
خو د امریکا دفاع وزیر لویډ اسټین د اوکراین د ولسمشر له دې غوښتنې وروسته خبریالانو ته وویل، «هیڅ داسې وړتیا نشته چې د روسیې پرضد د اوکراین هڅو کې ټاکونکی رول ولوبوي.»
هغه دا هم وویل، چې اوکراین د اوږد واټنه توغندیو پر ځای ډرون کارولی او په روسیه کې اهداف په نښه کولی شي.
له دې سره د امریکا دفاع وزیر د روسیې پرضد جګړه کې د اوکراین لپاره د ۲۵۰ میلیون ډالرو امنیتي مرسته اعلان کړه.
هغه دا هم وویل ، چې امریکا او ملګري یې د اوکراین قوي ملاتړ جاري ساتي.
په جرمني کې د امریکا پوځي اډه کې د اوکراین له ولسمشر سره تر لیدنې وروسته پرون جرمني او کاناډا هم کییف ته د نورو تجهیزاتو ور کولو ژمنه وکړه.
دا لومړی ځل و چې ولادیمیر زیلنسکي هم د امریکا په کوربتوب د جرمني په رامسټین هوايي اډه کې د اوکراین د متحدینو په غونډه کې ګډون درلود، خومتحدینو یې د روسیې پر خاوره د اوږده واټن توغندیو د کارولو غوښتنه ونه منله.
پاول ډروف، روسی-فرانسوی میلیاردر او د ټیلیګرام اجراییوي مشر، چې د فرانسې د قضایي بنسټونو له خوا پر پیسو سپینولو او تنظیم شوو جرمونو تورن شوی، د دې قضیې په اړه په خپل لومړي غبرګون کې، پر هغه لګیدلي تورونه غندلي او ناسم یې بللي.
۳۹ کلن ډروف په فرانسه کې له نیول کېدو او د فرانسې د قضایي بنسټونو له خوا د صادر شوو تورونو وروسته د لومړي ځل لپاره د پنجشنبې په ماښام پر ټیلیګرام یو پیغام خپور کړ.
په دې اوږد پیغام کې، هغه لیکلي چې په ټیلیګرام کې د نورو خلکو د مینځپانګې خپرولو مسوولیت هغه ته راجع کول د "حیرانتیا" خبر ده.
تېره چهارشنبه، د ټیلیګرام مشر او مالک په رسمي ډول د فرانسې د قضایي بنسټونو له خوا تورن شو خو وروسته د ۵ میلیونه یورو په ضمانت خوشې شو او تر قضایی څارنې لاندې دی. نوموړي ته له فرانسې د وتلو اجازه هم نه ورکول کیږي.
د چهارشنبې په ماښام د پاریس یو څارنوال لور بیکو، په یوه اعلامیه کې وویل، چې له څلورو ورځو توقیف وروسته، ډروف د دوو څېړونکو قاضیانو له خوا د سازمان شویو جرمونو او پیسو سپینولو په ګډون په ګڼو سرغړونو تورن شوی دی.
ډروف څلور ورځې مخکې له باکو څخه د پاریس هوايي ډګر ته د رسېدو پر مهال ونیول شو.
نوموړي په خپل پیغام کې، هغه ادعاوې وغندلې چې ګواکې "ټلیګرام انارشیستۍ جنت دی" او هغه یې "بلکل دروغ" وبللې.
هغه ټینګار وکړ: "موږ هره ورځ په میلیونونو مضر پیغامونه او چینلونه لیرې کوو."
داعش معمولا د خپل ټیلیګرام چینل له لارې د وسله والو بریدونو مسؤلیت په غاړه اخلي.
د ډروف له خوشې کېدو څو ساعته مخکې، وال سټریټ ژورنال راپور ورکړ چې هغه شپږ کاله مخکې د فرانسې له ولسمشر ایمانویل مکرون سره لیدلي و او ماکرون ترې غوښتي وو چې د ټیلیګرام شرکت فرانسې ته انتقال کړي.
وال سټریټ ژورنال د چهارشنبه په ورځ لیکلي چې د دې غونډې یو کال دمخه د فرانسې امنیتي ادارې له متحده عربي اماراتو سره په ګډو عملیاتو کې د ډروف اې فون هیک کړی و ، ځکه چې فرانسوي چارواکي ټیلېګرام ته د داعش د لاسرسي او د بریدونو لپاره د کسانو ګمارنې په اړه ډیر اندیښمن و.
هغه لیکلي: "له همدې امله زما موخه دا ده چې په دې برخه کې د پام وړ پرمختګ څخه ځان ډاډمن کړم."
وال سټریټ ژورنال لیکي چې د نړۍ په ګوټ ګوټ کې حکومتونو هڅه کړې چې ډروف راجلب او کنټرول کړي او په دواړو مواردو کې اکثره ناکام شوي دي.
د حکومتونو له خوا د دې هڅو لامل پر ټیلیګرام د بیلابیلو ډلو څارنه او کنټرول دی، چې معمولا په کې د حکومت ضد لاریونو تنظیم کوونکي، د اسلامي اورپکو ډلې، د مخدره موادو قاچاقبران او سایبري جنایتکاران شامل دي.
ډروف ته د یو نږدې کس په وینا، د ټیلیګرام شرکت د کلونو لپاره دوی ته لیږل شوي فرعي غوښتنې او د محکمې حکمونه له پامه غورځولي او دا فرعي غوښتنې او فرمایشونه یې د شرکت بریښنالیک پته کې ساتلي دي.
وال سټریټ ژورنال لیکلي چې داسې نښې نشته چې د مکرون سره د ډروف پخوانۍ خبرې یا د هغه د ټلیفون هک کول د هغه له نېول کیدو سره تړاو ولري.
فرانسې او متحده عربي اماراتو په ۲۰۲۱ کې ډروف ته تابعیت ورکړ، او متحده عربي اماراتو په هغه کال د ټیلیګرام پلیټ فارم کې د ۷۵ ملیون ډالرو څخه ډیره پانګونه وکړه.
د اوکراین ولسمشر ولادیمیر زلېنسکي د جمعې په ورځ (د وږي ۱۶مه) له لویدیځو متحدینو څخه وغوښتل، چې د مسکو "سرې کرښې" له پامه وغورځوي او کییف ته اجازه ورکړي چې د روسیې په خاوره کې د بریدونو لپاره اوږد واټنه وسلې وکاروي.
همدا راز واشنګټن کییف ته د ۲۵۰ میلیون ډالرو په ارزښت د نورو وسلو ژمنه کړې.
زلېنسکي د جرمني په رامسټین هوايي اډه کې د امریکا په کوربه توب د اوکراین د متحدینو په یوې غونډه کې د لومړي ځل لپاره ښکاره شو او له متحدینو یې د روسیې پر خاوره د اوږده واټن وشتنې وسلو د کارولو غوښتنه وکړه. هغه دا کار د یوې بلې حل لارې په توګه وړاندې کړ چې پر روسیې فشار راوړي تر څو جګړه پای ته ورسوي.
زلېنسکي وویل: «موږ د اږد واټن ویشتونکو وسولو د کارولو وړتیا یوازې د اوکراین په نیولو شویو سیمو کې نه غواړو، موږ یې د روسیې خاورې دننه هم غواړو. هو، ترڅو روسیه سولې ته وهڅول شي.»
زلېنسکي د جمعې په ورځ په رامسټین کې په خپلو څرګندونو کې وویل: "د سرو ګرښو د رامنځ ته کولو لپاره د روسیې هڅې پایله نه ورکوي.»
دا په داسې حال کې ده، چې امریکا د نومبر په میاشت کې د جمهوري ریاست د ټاکنو لپاره تیاری نیسي چې کیدای شي د اوکراین لپاره سترې اغیزې ولري. د ډیموکراټانو کاندیدې کمالا هریس ژمنه کړې چې له اوکراین سره به ودریږي.
بل خوا، پخوانی ولسمشر ډونالډ ټرامپ چې د جمهوري غوښتونکو نوماند دی، ژمنه کړې، چې د اوکراین جګړه به سمدستي د سولې د احتمالي خبرو اترو سره حل کړي.
د پښتونخوا سر وزیر وايي، له اسلام اباده یې په دغه صوبه کې د سولې په اړه له افغان طالبانو سره د خبرو اترو اجازه غوښتې ده. علي امین ګنډاپور وايي، که حکومت ورته اجازه ورنه کړي، نو د سر وزیر په توګه به قومي مشرانو ته لارښونه وکړي چې له طالبانو سره خبرې وکړي.
علي امين ګنډاپور د پنجشنبې په ورځ د وږي په ١٥مه، له قومي مشرانو او د ګوندونو له استازو سره په ليدنه کې وويل: په دې صوبه کې سوله په يوه سوله ييز افغانستان پورې اړه لري.
هغه ټینګار وکړ، چې د اورپکۍ له منځه وړلو لپاره یوې مشخصې پالیسۍ او مهال ویش ته اړتیا ده.
د پښتونخوا سر وزیر اعتراف کړی چې ډېر ژر به په دې اړه د ایالتي عالي کمېټۍ غونډه راوبولي او له طالبانو سره به د سولې خبرو ته کېني.
ښاغلي ګنډاپور وویل: «د خلکو له ملاتړ پرته جګړه نه شي ګټل کېدای. "حکومت باید د دې ریاست له خلکو سره په همغږۍ د وسله والو پر ضد پوځي عملیات وکړي."
دغه پاکستاني چارواکي یادونه وکړه، چې حکومت باید د امنیتي ستونزو په اړه له قبایلي ولس سره مشورې وکړي او د حل لپاره یې عمل وکړي.
علي امین ګنډاپور چې د پاکستان د تحریک انصاف ګوند غړی دی، د قبایلي سیمو په اړه د دغه هېواد د لومړي وزیر شهباز شریف پر سیاستونو نیوکه وکړه او ویې ویل چې د تحریک انصاف د مشرانو پر ضد د دوسیو جوړول"بې انصافي" ده.
له دې مخکې د پاکستان د بهرنیو چارو د وزارت ویاندې ممتاز زهرا بلوچ د پنجشنبې په ورځ د وږي په ۱۵مه په یوه خبری غونډه کښې وویل: د دغه هېواد د ګاونډیانو په خلاف د ترهګرۍ لپاره د افغانستان د خاورې کارول یوازې د اسلام اباد د اندېښنې وړ خبره نه ده. "
هغې زیاته کړه چې پاکستان په افغانستان کې د ترهګرو ډلو د پټنځیو په اړه شواهد وړاندې کړي دي.
د پاکستان د بهرنیو چارو د وزارت ویاندې زیاته کړه، چې د ملګرو ملتونو په تازه راپور کې په افغانستان کې د ترهګرو ډلو فعالیتونه په ګوته شوي دي. هغې له افغان طالبانو هم وغوښتل چې د دغو ډلو پر وړاندې اقدام وکړي او ډاډ ورکړي چې دغه ډلې به پر پاکستان بریدونه نه کوي.
د پاکستان د بهرنیو چارو وزارت ویانده وايي، چې د ترهګرو لهخوا د افغانستان د خاورې کارونه یوازې د پاکستان اندېښنه نه ده. ممتاز زهرا بلوڅ وايي، پاکستان په افغانستان کې د ترهګرو ډلو د پټنځایونو په اړه شواهد او لاسوندونه وړاندې کړي دي.
د پاکستان د بهرنیو چارو وزارت ویاندې د پنجشنبې په ورځ (د وږي په ۱۵مه) یوې خبرې ناستې ته وویل، چې د ملګرو ملتونو په وروستیو راپورونو کې دا په ډاګه شوې چې ترهګرې ډلې د افغانستان د ننه فعالیتونه او مرکزونه لري.
مېرمن بلوڅ له طالبانو وغوښتل، چې په افغانستان کې د ترهګرو ډلو پر ضد ګام واخلي او دا ډاډ دې ورکړي چې دغه ډلې به نور په پاکستان کې بریدونه نه کوي.
تر دې وړاندې د افغانستان د پوځ لوی درستیز ویلي و، چې تحریک طالبان پاکستان (ټيټيپي) د پاکستان په خاوره کې ځینې سیمې په واک کې لري او له هماغو سیمو څخه خپل عملیاتونه پلان او پلي کوي.
فصیحالدین فطرت ویلي، چې پاکستان په افغانستان کې د ټيټيپي د حضور په اړه هیڅ ډول شواهد دوی ته نه دي وړاندې کړي.
د پاکستان د بهرنیو چارو وزارت ویاندې د افغانستان د لوی درستیز د خبرو په غبرګون کې وویل، چې پاکستان په ګڼ شمېر کې داسې شواهد وړاندې کړي چې ښيي ترهګرې ډلې همدا اوس په افغانستان کې پټنځایونه لري.
په افغانستان کې واک ته د طالبانو له رسېدو وروسته، د وسلهوالو ډلو په تېره بیا د تحریک طالبان پاکستان بریدونه پر پاکستاني ځواکونو زیات شوي دي.
پاکستاني چارواکو تل دا ویلي، چې طالبانو په افغانستان کې ټيټيپي وسلهوالو ته پناه ورکړې؛ خو طابانو تل دغه ادعاوې ردې کړې دي.
«زدهکړې د افغان نجونو حقه حق دی »
د پاکستان د بهرنیو چارو وزارت ویاندې په افغانستان کې د طالبانو لهخوا د نجونو پر زدهکړو د بندیز لګولو د یوې پوښتنې په ځواب کې وویل، په دې اړه د اسلام اباد دریځ روښانه دی.
هغې وویل: موږ پر دې باوري یو، چې د اسلام دین د حکمونو له مخې هر نارینه او ښځینه د زدهکړو حق لري.
مېرمن بلوڅ وویل، چې د اسلام په دین کې د ښځو د زدهکړو حقونه تضمین شوي او په وینا یې چې اسلام «د برابرۍ غوښتونکی» دین دی.
هغې دا هم وویل، د اسلام له نظره هره ښځه حق لري چې له تاوتریخوالي پرته ژوند وکړي.
د پاکستان د بهرنیو چارو وزارت ویاندې وویل:« د پاکستان اساسي قانون دغه حق مېرمنو ته ورکړی او موږ په هر ځای کې د ښځو لپاره د داسې حقونو غوښتونکي یو.»