د پاکستاني طالبانو تحريک په يوه اعلاميه کې خپلو جنګياليو ته امر کړی، چې په پاکستان کې پراخ ډله ييز او ځانمرګي بريدونه وکړي. د ټي ټي پي مشر له خپلو کسانو غوښتي، چې پخوانیو سیمو ته ولاړ شي او خپلو عملیاتو ته دوام ورکړي.
سرچينو افغانستان انټرنشنل ـ پښتو ته ویلي، چې د پاکستاني طالبانو تحريک او افغان طالبانو ترمنځ هم اړيکې خرابې شوې دي.
سرچينه زياتوي، چې د پاکستاني طالبانو تحريک څو ورځې وړاندې خپل منځني ناسته کړې او پرېکړه یې کړې، چې د افغان طالبانو له لوري دې پر دوی لګېدلو بنديزونو ته نه ګوري او خپل بريدونه دې زيات کړي.
ویل کيږي، چې د افغان طالبانو په امر ټي ټي پي په پاکستان کې دننه لوی او ځانمرګي بريدونه بند کړي وو، چې له دې وروسته یې د بيا پيل خبرداری ورکړی.
د ټي ټي پي مشر خپلو قوماندانانو ته ویلي: « د افغان طالبانو له خوا پر دوی لګېدلي بندیزونه مه منئ، قوماندانو ته امر کوو هر څومره لوی بریدونه چې کولی شي، ترسره یې کړئ.»
د پاکستاني طالبانو تحريک په يوه تازه اعلاميه کې خپلو قوماندانانو ته د يوالي امر کړی او له هغوی يې هم غوښتي، چې: «له دې وروسته پر ډېورنډ کرښه د عملياتو اجازه لري، تر څو تشکيلاتو ته د ننوتلو لارې خلاصې شي.»
د پاکستاني طالبانو تحريک په اعلاميه کې راغلي، چې په نيول شويو سیمو کې دې د وسلو سره وګرځي: «هغه سرحدي سیمې، چې زموږ د قربانيو په برکت فتحه شوې دي مجاهدين دې مسلح پکې وګرځي.»
په دې اعلاميه کې ټي ټي پي خپلو قوماندانو او سرتېرو ته ويلي، که افغان طالبان یې په کور چاپه وهي او يا وسلې ځني اخلي نو په ګډه دې د خپل ځان او ناموس دفاع وکړي.
ټي ټي پي په دې اعلاميه کې خپلي چارې «دفاعي جهاد» بللې دي او وايي، چې په دې لاره کې د «امام اجازه» شرط نه ده او په سیمه کې ګاونډیانو ته باید د ګډون بلنې ورکول شي.
سرچينه وايي، چې د پاکستان طالبانو تحريک له لوري په مومندو ولسوالۍ د امنيتي ځواکونو پر یوې اډې لوی بريد پر دوی د لګېدلو بنديزو د ماتېدو پيل دی.
دوې ورځې وړاندې د پاکستان د طالبانو تحریک (ټيټيپي) په یوې خبرپاڼې کې ویلي وو، چې دوی د مومندو ولسوالۍ په غلنۍ سیمه کې د امنیتي ځواکونو پر یوې اډې برید کړی او امنیتي ځواکونو ته یې د پراخې مرګ ژوبلې د اړولو ادعا کړې.
د پاکستان ځینو امنیتي سرچینو هم برید تاييد کړی او ویلي یې دي، چې دوی تر دې مهاله دوه ځانمرګي بریدګر وژلي دي.
وروسته له هغې چې په افغانستان کې طالبان یو ځل بیا واک ته ورسېدل په پاکستان کې د پاکستاني طالبانو هلې ځلې پیاوړې او په دغه هېواد کې امنیتي وضعیت ګډ وډ شو.
د پاکستان د پوځ په ګډون سیاسي ادارې په پاکستان کې د خراب امنیتي وضعیت پړه پر افغان طالبانو اچولې ده او ویلي یې دي، چې ټي ټي پي د پټنځایونو په توګه د افغانستان خاوره کاروي؛ خو افغان طالبانو بیا دا ادعاوې رد کړې دي.
