پاکستاني پولیسو د تحریک انصاف ګوند یو شمېر جګپوړي مشران لکه ګوهر علي خان، عمومي مشر عمر ایوب خان او د دغه ګوند یو جګپوړی غړی شېر افضل مروت په اسلام اباد کې د پارلمان مخې ته د غونډې په جوړولو او له قانونه د سرغړونو په تور نیولي دي.
پاکستاني رسنیو راپور ورکړی، چې د اسلام اباد پولیسو د دوشنبې په ورځ (د وږي په ۱۹مه) ناوخته د تحریک انصاف یو شمېر نور مشران هم نیولي دي.
د شاه محمود قریشي زوی زین قریشي، عامر دوګر، شیخ وقاص اکرم، نعیم الرحمن، زبیر خان او د سنیانو د شورا د ګوند مشر صاحب زاده حمید هغه کسان دي چې د پولیسو لهخوا نیول شوي دي.
د راپورونو له مخې، د تحریک انصاف ګوند د مشرانو د نیولو بهیر د سه شنبې په ورځ (د وږي تر ۲۰مې) تر سهاره روان و.
د تحریک انصاف ګوند له څو میاشتې کرارۍ وروسته، د یکشنبې په ورځ په اسلام اباد کې ستره غونډه وربللې وه.
دغه غونډه په تاوتریخوالي واوښته او پولیسو د عمران د پلویانو د خورولو لپاره له اوښکې بهوونکي ګازه هم کار واخیست.
پولیسو ویلي، د تحریک انصاف ګوند مشران یې ځکه نیولي چې د غونډې د جوړولو د منعې فانون یې له پامه غورځولی و.
د تحریک انصاف ګوند مشران په داسې حال کې نیول کېږي، چې د دغه ګوند مشر عمران خان او د دغه ګوند مرستیال شاه محمود قریشي له تېر یوه کال څخه د راولپنډۍ په اډیاله زندان کې بندیان دي.
