بریتانیا د هغې افغان کورنۍ د ویزې غوښتنه رد کړه، چې غوښتل یې د خپل ۱۳کلن زوی سره یوځای شي
د بریتانیا د کورنیو چارو وزارت د هغې افغان کورنۍ د ویزې غوښتنه رد کړه، چې غوښتل یې د خپل ۱۳کلن زوی سره په لندن کې یوځای شي.
د بریتانیا د کورنیو چارو وزارت د هغې افغان کورنۍ د ویزې غوښتنه رد کړه، چې غوښتل یې د خپل ۱۳کلن زوی سره په لندن کې یوځای شي.
ګارډین ورځپاڼې راپور ورکړی، چې د احمد په مستعار نوم دغه ۱۳کلن ماشوم په ۲۰۲۱کال کې له خپل تره او ترور (عمه) سره لندن ته لېږدول شوی و.
د راپور له مخې، هغه مهال احمد لس کلن و.
احمد دا مهال په لندن کې له خپل تره او عمه سره اوسېږي.
د احمد عمه وایي، چې هغه خپله کورنۍ یادوي او خپلې کورنۍ ته اړتیا لري.
د احمد کورنۍ په ۲۰۲۳کال کې د ویزې لپاره غوښتنلیک استولی و، چې غوښتل یې د خپل زوی سره یوځای شي.
د کورنیو چارو وزارت دا هم وویل، چې د احمد کورنۍ په افغانستان کې له کوم ګواښ سره مخامخ نه ده.
د احمد پلار تر دې وړاندې ویلي و، چې هغه په افغانستان کې د لویدیځو دفترونو سره کار کاوه چې له امله یې اوس له ګواښ سره مخ شوی دی.
د احمد پلار ګارډین ته په خبرو کې ویلي، چې د بریتانیا د حکومت دغې پرېکړې سخت خپه کړی او د دغې پرېکړې تمه یې نه لرله.
هغه زیاته کړې، چې ټوله کورنۍ یې زوی یادوي او د هغه تشه په کور کې احساسېږي.
د احمد وکیلان هم وایي، چې احمد خپلې کورنۍ ته اړتیا لري او له خپلې کورنۍ څخه د لرې والي له امله په ژور خفګان اخته شوی او اروایي وضعیت یې د اندېښنې وړ دی.
د ایران د کورنیو چارو وزیر اسکندر مومني په ایران کې له مېشتو افغان کډوالو وغوښتل، چې «خپل هېواد ته ستانه شي او خپل هېواد ته دې کار وکړي او هغه ځای دې سمسور کړي.»
مومني په یوه ټلویزیوني پروګرام کې د «بهرنیو وګړو» په اړه وویل:« ایران نور دومره کډوال نه شي زغملای».
هغه د دوشنبې په ماښام زیاته کړه:« لومړیتوب د هغو کسانو دی، چې په ناقانونه توګه او له اجازې پرته ننوځي. دا په ټوله نړۍ کې یو معمول دی او کډوال باید د کوربه هېواد جوړښتونو او قانون ته درناوی وکړي.»
د ایران د کورنیو چارو وزیر په ایران کې د بې کارۍ د زیاتوالي پړه پر افغانانو واچوله او ویې ویل:« افغانانو ډېر کاري فرصتونه اخیستي دي.»
هغه زیاته کړه، تمه لري چې افغان کډوال بېرته خپل هېواد ته ستانه شي.
مومني څلور ورځې وړاندې اعلان وکړ، چې په ایران کې د افغانانو د تنظیم هر اړخیز پلان به ډېر ژر چمتو او عملي شي.
هغه وويل:« دغه هر اړخيز پلان به د يوه مناسب پروګرام او د سيمهييزو او ګاونډيو ملحوظاتو په پام کې نيولو سره پلی شي.»
مهر خبری اژانس وایي، د ایران د کورنیو چارو وزیر تېره پنجشنبه د شېراز ښار سنګ سیاه سیمې ته د سفر په ترڅ کې په ایران کې د افغانانو د منظمولو په ضرورت ټینګار وکړ.
مومني چې تازه د ایران د کورنیو چارو د وزیر په توګه ټاکل شوی، د ولسي جرګې په غونډه کې وویل چې د ده لومړی ګام به د ناقانونه او بې اسناده کډوالو اېستل وي.
نوموړي په ايران کې د افغانانو لپاره د هر اړخيز پلان په اړه جزیيات نه دي ورکړي.
خو مومني چې د زمري په میاشت کې لا د کورنیو چارو وزیر نه و، د ایران د اسلامي شورا د ملي امنیت او بهرني سیاست په کمېسیون کې ټینګار وکړ، چې د کډوالو د داخلېدو د مخنیوي حل لاره د سرحدونو تړل دي.
نوموړي ویلي، چې په دې اړه به یوه تګلاره جوړه کړي.
هغه په خپله یوه ټلویزیوني مرکه کې هم په یو اړخیز ډول د پولو د بندولو پر اړتیا ټینګار وکړ او د ایران د ټولو پولو د بندولو لپاره یې د وسلهوالو ځواکونو د کار د پیل خبره وکړه.
تر دې مخکې د ایران ولسمشر مسعود پزشکیان د خپل ټاکنیز کمپاین پر مهال له افغانستان سره د پولو پر تړلو ټینګار کړی و.
د افغانستان د پخواني حکومت له نسکورېدو وروسته د دغه هېواد سلګونه زره وګړي ګاونډيو هېوادونو په ځانګړې توګه ایران او پاکستان ته کډوال شول.
په تېرو درېیو کالو کې دواړو ګاونډيو هېوادونو سلګونه زره افغانان له خپلو هېوادونه په زوره اېستي دي.
د زمري په میاشت کې د شرق ورځپاڼې د ۱۰ او ۱۷ کلونو ترمنځ د یو شمېر افغان ځوانانو چې د اوسېدو قانوني اسناد یې هم لرل د نیول کېدو خبر ورکړ.
شارق په دې راپور کې د دماوند په ښار کې له یوه افغان کډوال «سید مهدي» سره د پولیسو د یوه افسر د ناوړه چلند په بیانولو سره په ایران کې له کډوالو سره د چلند موضوع لاپسې پېچلې کړه.
دغه راپور د ټولنیزو فعالانو په حواله لیکلي، که څه هم له ۱۸ کلونو د کم عمره ماشومانو او ښځو لپاره یوازې له هېواده اېستل نا قانونه کړنه ده؛ خو دا ډول پېښې رامنځ ته کېږي.
په دماوند ښار کې له «سید مهدي» سره د ایراني پولیسو د تاوتریخجن چلند ویډیو د زمري د میاشتې په ۱۷مه نېټه په افغانستان انټرنشنل کې هم خپره شوه.
دغې ویډیو د ټولنیزو رسنیو کاروونکو غبرګونونه راوپارول او دوی د دې ځوان پر غاړه د ایراني افسر د زنګون فشار په ۱۳۹۹ کال کې په امریکا کې د جورج فلویډ له مړینې سره پرتله کړ، چې په هغه هېواد کې د پراخو لاریونونو لامل هم شوی و.
د افغانستان د ښځو لپاره د امریکا استازې د طالبانو په اړه د ملګرو ملتونو د بشري حقونو د شورا انتقادي غونډې ته په اشارې سره پر هېوادونو غږ کړی چې له طالبانو سره دې د اړیکو له عادي کولو ډډه وکړي. رینا امیري وویل چې د طالبانو په چلند کې باید «ژور بدلون» راشي.
رینا امیري وویل، د جنسیت پر بنسټ د ځورونې ختمول او د افغانانو حقونو ته درناوی د افغانستان د راتلونکي ګډې موخې دي.
د افغانستان لپاره د امریکا ځانګړې استازې دغه څرګندونې د دوشنبې په ورځ د افغانستان د وضعیت په اړه د بشري حقونو د شورا د ۵۷مې غونډې په څنډه کې وکړې.
په دې ناسته کې هېوادونو د طالبانو د امربالمعروف پر قانون سختې نیوکې وکړې. د جرمني استازي وویل، په افغانستان کې د بشري حقونو وضعیت خراب دی او نه دی بدل شوی.
رینا امیري له دې مخکې ویلي و چې له طالبانو سره د اړیکو عادي کول به د ښځو پر وړاندې د دغې ډلې د افراطي تګلارو د پای ته رسولو په شرط وي.
هغې تېره اوونۍ هیل ورځپاڼې ته وویل چې د طالبانو د ښځو ضد تګلارې لکه د دغې ډلې د واکمنۍ د لومړۍ دورې په څېر به بالاخره د طالبانو د نسکورېدو لامل شي.
په دې وروستیو کې ځینو هیوادونو په ځانګړي ډول متحده عربي امارات چې په منځني ختیځ کې د امریکا ملګری دی، د طالبانو استازی د سفیر او د افغانستان سفارت د سرپرست په توګه منلی دی.
د امریکا د بهرنیو چارو وزارت د کانګرس د یو نوي راپور په غبرګون کې چې نوی ېې خپور کړی وايي، په ټولو ارزونو کې یې داسې وړاندوینه نه وه کړې چې د اشرف غني حکومت دې داسې ژر ړنګ شي.
د دغه وزارت په وینا، اشرف غني له سقوطه یوه ورځ مخکې بلېنکن ته ویلي و چې تر مرګه به جنګېږي.
په هغه وینا پاڼه کې چې د امریکا د بهرنیو چارو وزارت خپره کړې، راغلي چې د افغانستان له سقوطه یوه ورځ وړاندې د امریکا د بهرنیو جارو وزیر انتوني بلېنکن له اشرف غني سره په ټلیفون غږېدلی و.
ښاغلي غني ورته ویلي و، چې «تر مرګه» جګړې ته چمتو دی او نه پرېږدي چې افغانستان د طالبانو لاس ته ورشي؛ خو یوه ورځ وروسته له افغانستانه ووت.
په کانګرس کې جمهوري غوښتونکي وايي، پرته له کوم شرطه له افغانستانه د امریکايي ځواکونو وتلو دې ته لاره هواره کړه چې د افغانستان پخوانی رژیم ړنګ شي.
د بهرنیو اړیکو د کمېسیون مشر مایکل مکال تېره ورځ سي بي اېس شبکې ته ویلي و، چې د بایډن حکومت د افغانستان شرایطو ته په نه پاملرنې له هغه هېواده خپل ځواکونه واېستل.
د امریکا د بهرنیو چارو وزارت ویلي، چې د افغانستان حکومت د ۲۰۲۱ کال د اکسټ تر ۶مې ټول ولایتونه په خپل واک کې لرل؛ خو د یوې اونۍ په ترڅ کې ټول ولایتونه سقوط شول او (د اګست په ۱۵مه) د اشرف غني له وتو سره سم طالبان کابل ته د ورننه شول.
د امریکا د بهرنیو چارو وزارت د کانګرس له راپور سره همغږی دی، چې د دوحې تړون د طالبانو له بري سره مرسته وکړه.
د بهرنیو چارو وزارت هم دغه تړون نیمګړی بولي، ځکه د افغانانو تر منځ یې خبرې اترې ګډې وډې کړې او «طالبانو یې دومره ځواکمن کړل، چې په تېرو ۲۰ کالو کې هومره نه و ځواکمن شوي.»
د امریکا د بهرنیو چارو وزارت د سنتکام د قوماندان جنرال مکنزی له قوله ویلي، چې «د دوحې تړون لاسلیکولو د افغانستان پر دولت او د هغه هېواد پر ځواکونو ډېر منفی اغېز پرئویستی و.»
دغه وزارت له افغانستانه د امریکایي ځواکونو وتلو او اغېزو ته اشاره کړې او ویلي یې دي، چې له افغانستانه د ځواکونو وتل «اسانه» چاره نه وه او دغه څه د ټرامپ له حکومته بایډن ته په میراث پاتې شوي و.
د امریکا کانګرس بایډن په دې تورنوي، چې د پوځي کارپوهانو او د امریکا له نورو بنسټونو سره یې له سلا مشورو پرته په ځانته سر له افغانستانه د ځواکونو د اېستو پریکړه کړې وه؛ خو د امریکا د بهرنیو چارو وزارت بیا ټینګار کوي، چې ولسمشر بایډن د امریکا د خلکو ګټو ته په کتو، د امریکا ډېره اوږده جګړه پای ته ورسوله.
دغه وزارت د امریکا د استازو جرګې د بهرنیو اړیکو کمېټه د ناسمو اطلاعاتو په خپرولو تورنوي او وايي:« دغه ناسم اطلاعات د دې لامل شول، چې د امریکا د بهرنیو چارو وزارت د غیر سیاسي کارکوونکو شهرت او نوم ته زیان ورسوي.»
د ملګرو ملتونو د بشري حقونو په شورا کې د افغانستان استازي د دوشنبې په ورځ وویل چې طالبانو په افغانستان کې د جبر او جنسیتي توپیر پر بنسټ یو رژیم جوړ کړی. نصیر اندېشه وویل، طالبانو د منځنیو پیړیو په قوانینو سره افغانستان له نړۍوالې ټولنې جلا کړی.
په جنیوا کې د افغانستان سفیر نصیر اندېشه د ملګرو ملتونو د بشري حقونو شورا استازو ته وویل چې طالبانو په تېرو درېیو کلونو کې د دوحې د هوکړې برعکس خپلې ژمنې نه دي عملي کړې.
اندېشه زیاته کړه، «طالبانو په عمل کې وښوده چې افغانستان ته یې د ملګرو ملتونو ځانګړي راپور ورکوونکي د ورتګ په مخنیوي او د امربالمعروف وزارت د منځنیو پیړیو قوانینو په رڼا کې هېواد له نړۍوالې ټولنې جلا کړی دی.»
د اګسټ په وروستیو کې طالبانو د افغانستان لپاره د ملګرو ملتونو ځانګړی استازی ریچارډ بېنیټ دغه هېواد ته له ورتګ منعه کړ.
اندېشه په دې باور دی چې د طالبانو د حساب ورکولو او د دوحې تړون ته د هغوی د ژمنتیا لپاره د نړۍوالې ټولنې د تګلارې لومړی پړاو بې ګټې و او «طالبانو د هر ډول جوړجاړي او د شرایطو د ښه والي لپاره لاره تړلې ده.»
افغان استازي ویلي، چې د طالبانو له خوا د بشري حقونو له سختو سرغړونو سره، سره دغې ډلې په خوندي توګه خپلو فعالیتونو ته دوام ورکړی دی.
اندېشه د دوحې درېيمې غونډې او په دې سرمشريزه کې د ښځو او مدني ټولنې نه ګډون ته په اشارې سره وويل: «افغان ولس د افغانستان د حالاتو په اړه د نړۍوالې ټولنې د بې غورۍ په اړه ژوره اندېښنه لري. »
افغانستان انټرنشنل ته يوه ويډيو رسېدلې، چې د تخار ولایت په ینګي قلعه ولسوالۍ کې د طالبانو د قوماندانۍ جنایي امر قاري سمیع الله اعتراف کوي، چې له واده پرته یې له یوې ښځې سره يې جنسي اړیکې لرلې. په یوه جلا ویډیو کې د دغه طالب چارواکي له یوې ښځې سره د جنسي اړیکو شېبې لیدل کېږي.
دغه طالب چارواکی په اعترافي ويډيو کې وايي، چې د ينګي قلعه اوسېدونکی او د دې ولسوالۍ د امنيه قوماندانۍ جنايي امر دی.
هغه وايي، چې له يوې نيمې مياشتې راهيسې له دغې ښځې سره اړيکې لري او درې ځلې يې په فرخار کې ور سره ليدلي دي.
هغه د یو کس د پوښتنې په ځواب کې چې ترې څېړنې کوي، وايي سهار شاوخوا اته بجې يې ورته زنګ وواهه او د ملاقات وخت يې ورکړ.
دغه طالب چارواکي زیاته کړه، چې له هغې او یوې بلې ښځې سره یې په داسې ځای کې ډوډۍ خوړله چې نه پوهېده یو رستورانت دی او بیا یې له هغې سره «زنا» او «شونډې ښکلول» کړې دي.
دغه ويډيو، چې د ځايي اوسېدونکو له خوا په پټه اخیستل شوې لیدل کېږي، چې دغه سیمه ییز طالب چارواکی د کوکچه رستورانت بهر په یوه ځای کې یوه ځوانه ښځه په غېږ کې نیسي او بیا «زنا» ورسره کوي.
د تخار ولایت اوسېدونکو افغانستان انټرنشنل ته وویل، چې قاري سمیع الله د چهارشنبې په ورځ د وږي د میاشتې په اوومه نېټه د فرخار ولسوالۍ په کوکچه رستورانت کې د ځايي خلکو له خوا له يوې ښځې سره د لیدنې پرمهال ونیول شو.
د سرچينې د معلوماتو له مخې؛ د طالبانو دغه سيمه ييز مسوول اوس د دې پېښې په تړاو له دوو مېرمنو سره د يادې ډلې په زندان کې دى.
د تخار ولایت اوسېدونکي وايي، طالب چارواکو له خپل دولتي واک او شتمنۍ څخه ناوړه ګټه پورته کړې او دوی ډېرو ودونو او له واده بهر غيرې قانوني اړيکو ته يې لاره هواره کړې ده.
په همدې حال کې د طالبانو د امربالمعروف وزارت د افغانستان پر اتباعو په پراخه کچه سخت بندیزونه لګولي دي.
دا وزارت د سختو او افراطي قوانینو په پلي کولو سره د خلکو ټولنیز او شخصي ژوند په کلکه کنټرولوي.
تر دې مخکې هم پر طالب چارواکو تورونه وو، چې په ځوانو ښځو او هلکانو جنسي تېري کوي.
د دغو چارواکو له ډلې څخه ځینې یې له محاکمې او حساب ورکولو پرته په دولتي تاسیساتو کې ژوند کوي؛ خو د طالبانو ستره محکمه هره ورځ د افغان اتباعو د مجازاتو په اړه په بېلا بېلو تورونو، د وهلو او لنډ، منځني او اوږدمهاله بند په اړه خبرونه خپروي.