د طالبانو د کډوالو او راستنېدونکو چارو وزارت پر خپلې اېکس پاڼې لیکلي، چې یاد کسان په پاکستان کې له زندانونو تر راخوشي کېدو وروسته تېره ورځ د کندهار د سپین بولدک له لارې افغانستان ته ستانه کړل شوي دي.
د طالبانو د کډوالو او راستنېدونکو چارو وزارت د سې شنبې په ورځ د (وږي ۲۰مه) پر خپلې اېکس پاڼه لیکلي، چې دغه ۶۶ تنه افغانان چې د پاکستان د بلوچستان ایالت د کوټې ښار په زندان کې بندیان وو، راخوشې شول.
د طالبانو د کډوالو وزارت زیاته کړې، چې دغه افغانان په پاکستان کې د اوسېدو د قانوني اسنادو د نه لرلو په جرم بندیان شوي وو.
طالبانو ویلي، چې یاد ۶۶ کسان د کوټې ښار په زندان کې له ورځو تر یو کال پورې بندیان وو.
د طالبانو دغه وزارت د کندهار د سپین بولدک د سرحدي امریت له قوله ویلي، چې د کوټې له زندانه راخوشې شوي ۶۶ تنه افغانان تېره ورځ د سپین بولدک له لارې افغانستان ته ستانه کړل شوي او د مرستو ترلاسه کولو په موخه د کډوالو نړۍوال سازمان ته ورپېژندل شوي دي.
پاکستان د تېر کال راهیسې د افغان کډوالو د اېستلو لړۍ پیل کړې او تر دې مهاله یې زرګونه افغان کډوال په زور له خپل هېواده اېستي دي.
د راپورونو له مخې، پاکستاني پولیس په دغه هېواد کې د اوسېدو د قانوني اسنادو نه لرونکي افغانان نیسي او زندانونو کې یې اچوي.
