د طالبانو د پوهنې وزارت وایي، په ټول هېواد کې ۲۱ زره ۲۵۷ «د اسلامي زدکړو» مرکزونه فعالیت کوي. د دغه وزارت چارواکو په یوه خبري غونډه کې وویل، چې په دغو مرکزونو کې ټولټال درې ميليون ۶۸۷ زره ۲۰۰ زدکوونکي په زدکړو بوخت دي.
طالبانو اعلان کړی، چې د دولتي او خصوصي ښوونځیو ټول شمېر ۱۸ زره ۳۳۷ دی.
دوی وویل، چې د اسلامي زدکړو په مرکزونو کې ۱۶۶۹ديني مدرسې، ۱۲۰۷ دارالحفاظ، ۱۱۵ دارالعلوم او ۳۹ دارالایتام شامل دي.
طالب چارواکو دا ونه ويل، چې دغه دیني مرکزونه په تېرو دریو کلونو کې د دغې ډلې له خوا جوړ شوي او که دا ټول هغه دیني مدرسې دي، چې په تېر حکومت کې جوړي شوې وې.
د طالبانو د پوهنې وزارت چارواکو د چهارشنبې په ورځ (د وږي ۲۱ مه) د دغه وزارت یو کلن راپور وړاندې کړ.
دوی وايي، د اسلامي زدکړو په څانګو کې د سل زره بستونو لپاره د استخدام پروسه روانه ده.
د طالبانو د پوهنې وزارت د هېواد په رسمي او خصوصي تعلیمي مرکزونو کې د زدکوونکو شمېر ۱۰ ميليونه ۹۱۴ زره ۳۸ تنه ښودلی.
دغه زدکوونکي په ۱۸ زره ۳۳۷ دولتي او خصوصي ښوونځیو کې په زدکړو بوخت دي.
طالب چارواکو هم د دغه وزارت د تشکیل شمېر ۳۸۹ زره ۲۰۰ تنه اعلان کړی او ویلي یې دي، چې ۲۴۱ زره ۱۲۱ تنه یې ښوونکي او پاتې نور یې اداري او خدماتي کارکوونکي دي.
دوی وویل، دغه وزارت د کوچیانو لپاره ۱۲۳ښوونځي او ۱۵۹ سیمه ییز ښوونیز مرکزونه جوړ کړي او په دغو مرکزونو کې ۴۱ زره ۸۲۴ کوچي ماشومان په زده کړو پوخت دي .
طالب چارواکو په دې غونډه کې د نجونو د ښوونځیو د تړلو په اړه وضاحت ور نه کړ.
