د افغانستان د مقاومت جبهې د چهارشنبې په ورځ په يوې اعلاميه کې ویلي، چې تېره شپه يې د هرات ولایت د کرخ پر لار په یوه وسله وال بريد کې ۲ طالبان وژلي دي. دغه جبهې ويلي، چې په دې بريد کې د دوی کسانو ته زيان نه دی اوښتی.
د افغانستان د ملي مقاومت په نوم د طالبانو مخالفې وسله والې جبهې په خپله اعلاميه کې لیکلي، چې د طالبانو په وړاندي عمليات يې د هېواد په بېلابېلو سیمو کې دوام لري.
طالبانو تر اوسه د دغه بريد او دوی ته د اوښتي مرګ ژوبلي په اړه څه نه دي ويلي.
تر دې وړاندي هم د مقاومت جبهې د کابل په ګډون په ګڼو ولایتونو کې پر طالبانو د بريدونو او هغوی ته د مرګ ژوبلي اوښتلو خبرونه ورکړي وو.
په بلخ کې یو شمېر معلولینو د چهارشنبې په ورځ د طالبانو له خوا د پولیو واکسین د کمپاین د ځنډولو پر ضد لاریون وکړ او له دغې ډلې یې وغوښتل، چې په دې اړه وضاحت ورکړي. تر دې وړاندې د افغانستان د طالبانو روغتیا وزارت د پولیو د واکسین د کمپاین د بندیدو خبر رد کړی و.
معلولینو د ماشومانو د واکسین د کمپاین د بندېدو له خطرونو اندېښنه څرګنده کړې او خبرداری یې ورکړی، چې د دغه بهیر درول به د معلولیت لرونکو کسانو د شمېر د زیاتوالي لامل شي.
د معلولینو د حقونو یو فعال سید محمد یزدان پرست ټینګار وکړ، چې هېڅ اقدام باید په افغانستان کې د پولیو د واکسین د کمپاین د دوام مخه ونه نیسي.
دا خبر په داسې حال کې د طالبانو چارواکو رد کړی، چې تر دې وړاندې اسوشېټېډ پرېس د ملګرو ملتونو په حواله راپور ورکړی و، چې طالبانو د پولیو واکسین کمپاین بند کړی دی.
د پولیو د واکسین کمپاین چارواکو ګارډین ته ویلي، چې طالبانو په ټول افغانستان کې د ښځو د شتون او امنیتي اندېښنو له امله د پولیو کمپاین وځنډاوه.
د طالبانو د کورنیو چارو وزارت مرستیال په خوست کې غونډې ته وویل، د دې ډلې حکومت له ستونزو سره مخ دی او د حل لپاره د خلکو مشورې ته اړتیا لري. نبي عمري وویل: «ځینې ستونزې شته، موږ اولياء او پېغمبران نه يو او موږ ته وحې نه راځي، موږ د خلکو رایو او مشورو ته اړتیا لرو.»
د طالبانو له بندیزونو سره د هیواد د خلکو د خپګان په دوام د خوست په يوه غونډه کې د دې ډلې لوړپوړي چارواکي له خلګو د مشورو غوښتنه وکړه او د حکومت د ستونزو د هواري لپاره یې د دوی د رایې پر اړتیا ټینګار وکړ.
د کورنیو چارو وزارت مرستیال هم د خوست له اوسېدونکو وغوښتل، چې د دغې ډلې له خوا وضع شوي اصول او مقررات مراعات کړي.
طالبانو د جګړې له لارې واک ترلاسه کړی او په منتخب حکومت او د خلکو په رایو باور نه لري.
دغه طالب چارواکی په داسې حال کې پر رایې او له خلکو سره پر سلا مشورو ټینګار کوي، چې دغې ډلې په څه کم درې کلونو کې د نجونو د زدکړې او د ښځو پر کار بندیز لګولو ته پام نه دی کړی.
د طالبانو د کډوالو او ستنېدونکو چارو وزير په افغانستان کې د پاکستان له سفير سره په ليدنه کې له هغه غوښتي، چې افغان کډوال دې په جبري توګه نه ستنوي او نه دې يې هم ځوروي. خلیل رحمان حقاني له پاکستان د افغان کډوالو اړوند د يوې ګډې تګلارې د جوړېدو غوښتنه هم وکړه.
د طالبانو د کډوالو او ستنېدونکو چارو وزارت نن په اعلاميه کې د خلیل رحمان حقاني او په افغانستان کې د پاکستان د سفير عبیدلرحمان نظاماني د لیدنې خبر ورکړی.
اعلاميه زیاتوي، چې حقاني په دې ليدنه کې په پاکستان کې د افغان کډوالو د ځوروني ترڅنګ دتګ راتګ پر مهال د ځينو ستونزو یادونه وکړه او له دغه هېواد یې وغوښتل، چې په دې برخه کې د ګاونډيتوب اصل په پام کې ونيسي.
حقاني له پاکستاني سفيره غوښتي، چې کډوال دې د سیاستونو نه قرباني کوي.
«د پاکستان څخه د مهاجرینو په هکله د یوې ګډې او جامع تګلارې غوښتنه کوو، ترڅو د مهاجرینو راتلونکی روښانه او په اړه یې دقیق تصمیمونه ونیول شي.»
په اعلاميه کې د پاکستاني سفير له قوله لیکل شوي، چې «مسایل باید د خبرو او ګډو ناستو له لارې حل کړو.»
په اعلاميه کې نظاماني د کډوالو د ستونزو حل خپل اخلاقي مسوليت بللی او ويلي یې دي، چې له رهبرۍ سره به یې پر حل کار وکړي.
د طالبانو بهرنیو چارو وزیر امير خان متقي بېګاه په کابل کې د بهرنيو هېوادونو له سفيرانو او استازو سره په ناسته کې وويل، له ټولو هېوادونو په تېره له ایران او پاکستان یې تمه دا ده، چې د افغان کډوالو په ستنولو کې له زغم او احتیاط کار واخلي.
متقي د پاکستان او یران یادولو سره هیله وکړه، چې افغان کډوالو ته پکې تکلیف ونه رسېږي او په خپله خوښه ستنېدو ته پرېښودل شي.
د طالبانو چارواکو د څرګندونو سره هممهاله په پاکستان او ایران کې د افغان کډوالو د ځورولو او په زور افغانستان ته د ستنولو راپورونه ډېر شوي دی.
د احمدشاه ابدالي لومړۍ درجه د اووم پړاو کرېکټ سیاليو په لومړۍ لوبه کې ماهيپر ستورو لوبډلې د ۱۰ ويکټو په توپير هندوکش سټرايکرز ته ماتې ورکړه. د دې سياليو په دوهمه لوبه کې ميوند اتلانو د يوې پاڼۍ او ۷۴ منډو په لوی توپير د پامير ليجنډز لوبډله ماته کړه.
د احمدشاه ابدالي لومړۍ درجه د اووم پړاو کرېکټ سياليو د لومړۍ لوبې پچه ماهيپر ستورو لوبډلې وګټله او لومړی يې هندوکش سټرايکرز لوبډلې ته د توپوهنې بلنه ورکړه.
هندوکش د لوبي په لومړۍ برخه کې د ټولو لوبغاړو په سوځېدو ۱۹۶ منډې جوړکړې.
بهيرشاه محبوب د ۴۲ او حزب الله دراني د ۴۰ منډو سره تر نورو لوبغاړو ډېري منډې وکړې.
د ماهيپر لوبډلې په توپ اچونه کې محمدګل عليزي ۵ او ظاهر شهزاد ۳ لوبغاړي وسوځول.
ماهيپر د هندوکش د ۱۹۶ منډو په جواب کې ۲۸۰ مندې جوړې کړې.
په دوی کې علي احمد ناصر ۵۵ او اعجاز احمد ازاد ۴۶ تر نورو ډېرې منډې وکړې.
ضياء الرحمان شريفي او طاهر عادل درې درې لوبغاړي وسوځول.
د هندوکس سټرايکرز د سيالۍ په دويمه برخه کې يوازي ۱۴۱ منډې جوړې کړې او ماهيپر ستورو لوبډلې په اسانۍ د ۵۸ منډو هدف پوره کړ.
د احمدشاه ابدالي لومړۍ درجه څلور ورځنیو لوبو اووم پړاو د ننګرهار په کوربتوب پیل شوی.
د احمدشاه ابدالي لومړۍ درجه اووم پړاو لوبو په لړ کې به راتلونکې یکشنبه میوند اتلان د ماهیپر ستوري لوبډلې سره د ننګرهار په غازي امان الله خا او پامیر لیجنډز د هندوکش سټرایکرز لوبډلې پر وړاندې په نجیب الله تره کي کرېکټ لوبغالو کې د سياليو ډګر ته ښکته شي.
د منځنۍ اسیا د هېوادونو څو مشرانو د جرمني له لومړي وزیر وغوښتل چې په افغانستان کې د طالبانو له حکومت سره خپل اړیکي عادي کړي. دغو مشرانو پرون د قزاقستان په پلازمېنه استانه کې د منځنۍ اسیا د پنځو هېوادونو او جرمني په ګډه سرمشریزه کې له اولف شولتز دا غوښتنه وکړه.
ښاغلی شولتز دې سرمشریزه کې د ګډون لپاره استانا ته تللی چې پکې د منځنۍ اسیا پنځه هېوادونه ګډون لري او له دوی ترکمنستان، ازبکستان او تاجکستان له افغانستان سره پوله لري.
د جرمني خبري اژانس یا ډي پي اې د راپور له مخې، ښاغلی شولتز د دې غوښتنې په ځواب کې د افغانستان په هکله څرګندونو کې محتاط و او په دغه هېواد کې یې د طالبانو له خوا پر ښځو پراخو بندیزونو ته اشاره وکړه.
هغه زیاته کړه. په افغانستان کې چې څه پېښېږي د زغملو نه دي. دا هم موږ ته روښانه ده چې په دغه هېواد کې حکومت مشروعیت یا رواتوب نه لري او په افغانستان کې اوس ډېری پرمختیاوې ډېرې مایوسوونکې دي.
جرمن خبري اژانس د منځنۍ اسیا هېوادونو د هغو مشرانو یادونه نه ده کړې چې له ښاغلي شولتز یې له طالبانو سره د اړیکو عادي کولو غوښتنه یې کړې ده.
خو باختر خبري اژانس وايي، په دغه غوڼډه کې د ترکمنستان ولسمشر له افغانستان سره د نړیوالې همکارۍ او مرستې پر اړتیا ټینګار وکړ.
د طالبانو بیا واکمنېدو سره د منځنۍ اسیا هېوادونو کې ترکمنستان او ازبکستان له طالبانو سره نږدې اړیکي لري او قزاقستان هم دې وروستیو کې دا ډله د ترهګرو له نوملړ اېستلې ده.
ترکمنستان روانه اونۍ له طالبانو سره د ټاپي پروژې د پیل پرانیسته وکړه او همدارنګه ازبکستان هم تېرو اونیو کې خپل سرحدي ښار ترمذ کې له افغانستان سره ګډ بازار پرانیست.
ازبکستان وړمه ورځ له برلین سره هم دغه هېواد ته د مسلکي کارګرو د لېږلو او په بدل کې له دغه هېواد د اېستل کېدونکو افغان کډوالو د منلو هوکړه کړې ده.
جرمني د طالبانو لومړنۍ واکمنۍ کې د دې توندلارې ډلې د سیاست سخت مخالف و او د امریکا په مشرۍ یې د دې ډلې د ځپلو لپاره نږدې شل کاله په افغانستان کې سرتېري درلودل.
خو اوس داسې راپورونه هم شته چې جرمن چارواکي په خپل هېواد کې له افغان ډيپلوماټانو له طالبانو سره تعامل غواړي.