له کورمې ولسوالۍ څخه سرچینې وايي، په پاړه چنار کې د سوني او شیعه مذهبو ترمنځ جګړو کې تر دې مهاله ۳۶ تنه وژل شوي او تر ۸۰ ډېر نور ټپیان شوي دي. له یادې سیمې څخه د نورو سیمو او پېښور تر منځ د تلو راتلو ټولې لارې بندې پاتې دي.
شپږ ورځې وړاندې د خیبرپښتونخوا د کورمې ولسوالۍ په پاړه چنار سیمه کې د سوني او شیعه مذهبو ترمنځ نښته پیل شوه.
د یادې نښتې په شپږمه ورځ هم شپږ کسان وژل شوي او تر لسو ډېر ټپیان شوي دي.
تردې مهاله په یاده نښته کې له دواړو ډلو ۳۶ تنه وژل شوي او تر ۸۰ ډېر ټپیان شوي دي.
ځايي خبریالانو د پولیسو له قوله ویلي، په یاده ولسوالۍ کې د ټولو ښوونیزو مرکزونو ترمنځ د پاړه چنارـ پېښور او د افغانستان او پاکستان ترمنځ د خرلاڅي لاره هم د تګ راتګ لپاره بنده ده.
په یو شمېر ويډیوګانو کې چې د شیعه مذهبو له لارې خپرې شوې، لیدل کېږي چې په جګړه کې له ډېرو درنو وسلو کار اخیستل کېږي.
تردې مهاله د پاکستان حکومت د دغه دوو ډلو ترمنځ د وسلهوالې نښتې په مهارولو کې پاتې راغلی.
په پاړه چنار کې د سوني او شیعه مذهبو ترمنځ د اوربند لپاره څو ځلې د قومي مشرانو په منځګړیتوب هم جرګې شوې؛ خو د قومي مشرانو یادې هڅې هم تردې مهاله بې پایلې وې.
لومړۍ جګړه د پاړه چنار اپر کورمه په سیمه کې د دوو کورنیو تر منځ د وسلهوالې شخړې له امله رامنځته شوه، چې وروسته شخړه پيواړ، تري منګل، کنج علیزي او خارکلي ته وغځېدله او لا هم جګړه دوام لري.
له کلونو راهیسې په یاده سیمه کې د سوني او شیعه مذبو ترمنځ وسلهوالې نښتې رامنځته کېږي؛ خو پوښتنه داده چې یادې ډلې په دومره شمېر کې درنې وسلې له کومه ترلاسه کوي او د پاکستان حکومت ولې په یاده سیمه کې عام وګړي نه بې وسلې کوي؟
