د پاکستان د دفاع وزير خواجه اصف وایي، کابل ته د سفر پرمهال افغان طالبانو ورته وړاندیز کړی و چې پاکستاني طالبان به له سرحدي سيمو نورو ځايونو ته انتقال کړي او د دغه کار لپاره یې ترې د پیسو غوښتنه هم کړې وه.
هغه وایي:« که پاکستان د دغه کار لپاره پيسې هم ورکړي؛ نو څوک به د دې ضمانت ورکړي، چې پاکستاني وسلهوال به پاکستان کې بريدونه نه کوي؟ او بیا به سرحدي سیمو ته نه راځي.»
د هغه په وینا، په دغه معامله کې ځیني شکونه شته.
ښاغلي اصف تېرکال د اکټوبر په میاشت کې کابل ته سفر کړی و؛ خو تر دې وړاندې یې په دې اړه څه نه و ویلي.
هغه په دغې مرکه کې ویلي، پاکستان کې د وينې د تویېدو او تباهۍ لپاره په افغانستان کې د (ټيټيپي) لهخوا ترهګر روزل کېږي او بیا پاکستان ته رالېږل کېږي.
د هغه په وینا:« د ترهګرۍ په معامله کې افغان طالبانو سره زموږ اختلافات شته او دا ډېر جدي اختلافات دي.»
هغه دا رنګه ویلي، چې ټيټيپي په افغانستان کې پټنځایونه لري او افغان طالبان یې کوربهتوب کوي.
هغه له افغان طالبانو غوښتي، چې په پاکستان کې مېشت بې اسناده افغان کډوال دې په خپل هېواد کې ځای پر ځای کړي.
د سیمه ییزو چارواکو په خبره، د یادې ولسوالۍ د مشرانو په مرسته د قبایلي اولس په ملاتړ سپين بيرغونه لګول شوي او په ډېریو سيمو کي د اوربند هڅې هم روانې دي.
د سیمې قومي مشرانو ویلي، چې سره له دې چې دوی د سولې په ټینګښت او اوربند کې په بشپړ ډول همکاري کوي، خو د اوربند له اعلان سره سم د شلوزان او لقمان خېلو له غرنیو سیمو توغندي توغول شوي، چې پر وړاندې یې د سمدستي او سختو اقداماتو اړتیا ده.
دا په داسې حال کې ده، چې تېره ورځ پاکستاني رسنیو راپور ورکړ، چې په پاړه چنار کې د سني او شیعه مذهبو ترمنځ جګړو کې وسله والو افغانانو هم برخه اخیستې ده.
په راپور کې همداراز راغلي، چې افغان وسله وال په پاکستان کې له قومي جګړو وروسته کورمې ته ننوتلي دي.
پاکستاني رسنیو ویلي، چې قبايلو په دغو قومي شخړو کې د سيمه ييزو او د افغان وسله والو په جګړو خواشيني څرګنده کړې او د پاکستان له حکومته یې غوښتي، چې د خلکو د ژوند او مال د ساتنې لپاره دې اقداماتو وکړي.
له یادې سیمې څخه د نورو سیمو او پېښور تر منځ د تلو راتلو ټولې لارې بندې شوې هم دي.
تېره اونۍ د خیبرپښتونخوا د کورمې ولسوالۍ په پاړه چنار سیمه کې د سني او شیعه مذهبو ترمنځ نښته پیل شوه، چې تر اوسه هم روانه ده.
تر دې مهاله د پاکستان حکومت د دغه دوو ډلو ترمنځ د وسلهوالې نښتې په مهارولو کې پاتې راغلی.
وړمه ورځ یو شمېر سرچینو افغانستان انټرنشنل ته ویلي وو، چې په کورمه کې له دواړو خواو سره هغه درنې وسلې دي، کومې چې د پاکستان پوځ کاروي.