د چین د بهرنیو چارو وزیر وانګيي په افغانستان کې د ترهګرۍ د له منځه وړلو لپاره د شانګهای د همکاریو سازمان او د سیمې د هېوادونو ترمنځ د ګډې همکارۍ پر اړتیا ټینګار وکړ.
هغه وويل: «افغانستان بايد د نړۍوالو همکاريو په ډګر بدل شي، نه د جيوپوليټيکي سياليو په ډګر.»
هغه ټینګار وکړ چې موږ باید د ترهګرو خوځښتونه له نږدې وڅارو او د معلوماتو له تبادلې او شریکولو څخه ګټه پورته کړو.
وانګيي د جمعې په ورځ د روسيې او ايران د بهرنيو چارو له وزيرانو او د پاکستان د دفاع له وزير سره په کتنه کې د افغانستان د ګاونډیو او د شانګهای د همکاریو سازمان د هېوادونو د بهرنيو چارو د وزيرانو د همکارۍ سازمان د غونډې له ظرفیتونو د کار اخیستلو غوښتنه کړې، د نوموړي په خبره: «ترهګر باید له منځه ولاړشي.»
نوموړي له ترهګرۍ سره د مبارزې پر ارزښت د ټينګار تر څنګ د افغانستان له بيارغونې ملاتړ وکړ او د سيمه ييزو اقتصادي او سوداګريزو همکاريو د پياوړتيا او په سيمه کې يې په سترو پروژو کې د افغانستان شاملېدل مهم وبلل.
نوموړي دغه راز د افغانستان د وضعیت په ښه کولو کې د ملګرو ملتونو او د شانګهای د همکاریو سازمان رول مهم وباله.
د چین د بهرنیو چارو وزیر د افغانستان د مرکزي بانک د ذخیرو پر خلاصیدو ټینګار وکړ او ویې ویل: «موږ باید په درناوي سره د افغانستان چارواکو ته لارښوونه وکړو چې د ښځو او ماشومانو د حقونو د ساتنې د ښه والي او پیاوړتیا په برخه کې او د اسلامي هېوادونو په ځانګړي توګه د منځني ختیځ له تجربو ګټه واخلو او د افغانستان د عصري کولو په لاره کې ورڅخه ګټه واخلو.»
روسیه، چین، ایران او پاکستان د نورو هېوادونو په څېر طالبان په رسمیت نه پیژني، خو له طالبانو سره اقتصادي او ډیپلوماټیکې اړیکې لري.
سیمه ییزې سرچینې وايي، چې د دواړو خواوو ترمنځ یو ځل بیا جګړه پیل شوې او سختې نښتې روانې دي.
د ځايي سرچینو په وینا، طالبانو غوښتل د ګوشتې په انارګي غاښي کې پوسته جوړه کړي، خو پاکستاني پوځ یې مخالفت کړی او د همدې امله د دواړو خواوو ترمنځ په وار وار نښتې شوي دي.
له دې وړاندې د ننګرهار د ګوشتې او د کونړ د خاص کونړ ولسوالیو ځینو اوسېدونکو افغانستان انټرنشنل ته ویلي و، چې د پاکستان او طالبانو د پوله ساتو تر منځه د یوې پوستې د جوړېدو پر سر نښته شوې.
