افغان کرېکټ بورډ وايي، د نومبر میاشتې په شپږمه، نهمه او ۱۱مه نېټه د افغانستان په کوربه توب له بنګله دېش سره د یو ورځنیو لوبو لړۍ په محتده عربي اماراتو کې ترسره کیږي. افغان کرېکټ بورډ د یکشنبې په ورځ له بنګله دېش سره د نړۍوالو یو ورځنیو لوبو لړۍ نېټه اعلان کړه.
کرېکټ بورډ وايي، یادې درې نړۍوالې یو ورځنۍ سیالۍ د متحده عربي اماراتو په شارجه نړۍوال کرېکټ لوبغالي کې ترسره کیږي.
د کرېکټ بورډ له لوري په خپره شوې خبرپاڼه کې ویل شوي، چې یادې سیالۍ به په ۲۰۲۵م کال کې د ترسره کېدونکي چمپینز ټرافي لپاره ښه چمتوالی وي.
افغان کرېکټ بورډ ویلي، چې له بنګله دېش سره د یو ورځنیو نړۍوالو لوبو لوبلړۍ د افغانستان په کوربه توب ترسره کيږي.
د کریکټ بورډ د خبرپاڼې له مخې، په ۲۰۲۵ کال کې په پاکستان کې له ترسره کېدونکي چمپینز ټرافي څخه وړاندې د روان کال په ډیسمبر میاشت کې له زمبابوې سره د ټېسټ، یو ورځنیو او شل اوریزو لوبو لړۍ ترسره کوي.
همدارنګه کرېکټ بورډ ویلي، چې افغان کرېکت ملي لوبډله به له ویسټ اینډیز سره هم د یو ورځنیو سیالیو د لوبلړۍ د ترسراوي په موخه خبرې اترې روانې کړې دي، خو تر اوسه پورې له ویسټ اینډيز سره د لوبلړۍ نېټه نه ده څرګنده.
د افغانستان کرېکټ بورډ چارواکو د افغانستان د راتلونکو لوبو په اړه خوښي ښودلې او وايي، افغان لوبډله باید د چمپینز ټرافي سیالیو لپاره بشپړه چمتو و اوسي چې د پلان له مخې ورته په پرلهپسې ډول لوبلړۍ تنظیم شوې دي.
تر دې وړاندې (د وږي په ۱۹مه) کرېکټ بورډ ویلي و، چې ابراهیم ځدراڼ (د وږي په ۱۸مه) د تمرین پر مهال ټپي شوی او د نیوزیلنډ تر څنګ له سوېلي افریقا سره هم په لوبلړۍ کې نه شي لوبېدی.
کرېکت بورډ زیاته کړې وه، چې د ملي لوبډلې پيلیز توپ وهونکی ابراهیم ځدراڼ له نیوزیلنډ سره د ټېسټ لوبې د چمتووالي او تمرین پر مهال په پښه ټپي شوی و.
کرېکټ بورډ هغه مهال د ملي لوبډلې فزیوتراپیسټ او ډاکټر له قوله ویلي و، چې د ابراهیم ځدراڼ ښنګرکي یو څه سخته ضربه لیدلې او د ډاکټرانو له لوري ورته د استراحت سپارښتنه شوې.