د ایران د بهرنیو چارو وزیر بیروت ته ورسید

د حسن نصرالله له وژل کېدو وروسته لبنان ته دا د یوه لوړ پوړي ایراني چارواکي لومړی سفر دی.
له بلې خوا اسراییل پر لبنان خپلو بریدونو ته دوام ورکړی دی.
په تېرو ۲۴ ساعتونو کې د اسراییل په بریدونو کې ۳۷ تنه لبنانیان وژل شوي او ۱۵۱ تنه نور ټپیان شوي دي.
په لبنان کې امنیتی سرچینې وایي، چې اسراییلي پوځیانو د بیروت په سویل کې د حزب الله په مرستندویه کارکوونکو برید کړی چې له امله یې د حزب الله درې مرستندویه کارکونکی ژوبل شوي دي.
له بل پلوه د اسراییل پوځ وايي، د اسراییل هوايي ځواکونو د لبنان په پلازمېنه بیروت کې بمباري کړې ده.
د اسراییلي پوځ په وینا، د دغه برید موخه د حزب الله یو جګپوړی مشر هاشم صفي الدین و.
تر دې وړاندې داسې راپورونه خپرېدل، چې هاشم صفي الدین به د حسن نصرالله ځای ناستی شي.
حزب الله لا تر اوسه د اسراییل د دغې ادعا په اړه څه نه دي ویلي.