د افغانستان لپاره د ایران د ولسمشر ځانګړي استازي ویلي، چې افغانستان له دوه لسیزو اشغال وروسته د بیارغونې لپاره چمتو دی. حسن کاظمي قمي په کابل کې د یو نندارتون په څنډه کې وویل، چې ایران چمتو دی چې د طالبانو تر کنټرول لاندې افغانستان کې د بنسټیزو برخو په پراختیا کې مرسته وکړي.
د ایراني رسنیو د راپور له مخې، ښاغلي قمي چې په کابل کې د ایران د اسلامي جمهوریت سفیر هم دی، وویل: "د دغه نندارتون جوړېدل د دې ښکارندويي کوي، چې په افغانستان کې داسې وضعیت رامنځته شوی چې د جوړیدو او بیارغونې دورې ته چمتو دی." د ابوحنیفه نندارتون په دې وروستیو کې په کابل کې پرانیستل شوی او د افغان سوداګرو او بزګرانو ترڅنګ د سیمې یو شمېر هېوادونو هم خپل محصولات او توکي په کې نندارې ته وړاندې کړي دي. د ايران د ولسمشر ځانګړي استازي چې له دغه نندارتون څخه ليدنه کړې، وويل< چې هېوادونه د افغانستان له بازار سره لېوالتيا لري. ښاغلي قمي په افغانستان کې د نړیوالو ځواکونو شتون چې د امنیت شورا په اجازې سره افغانستان ته راغلی وو، اشغال وباله او ویې ویل: له دوو لسیزو نیواک وروسته افغانستان په تدریجي ډول د دې لپاره شرایط رامینځته کوي چې خپله د جوړولو دوره پیل کړي. په کابل کې د ایران سفیر وویل، چې د ایران اسلامي جمهوریت او د دغه هېواد خلک د افغانستان د سولې او ثبات په برخه کې د همکارۍ ته لېوالتیا لري. کاظمي قومي د كابل نندارتون ته په اشارې سره وويل، چې تر ټولو زيات توکي د ايران له اسلامي جمهوريت څخه راغليو شركتونو پورې اړه لري او د هغه په وينا، وړاندې شوي توکي د افغانستان د واقعي اړتياوو په چوكاټ كې وو. هغه وويل: "په حقيقت کې په دغه نندارتون کې ګډون کول به ايراني شرکتونو ته اجازه ورکړي چې له افغان چارواکو او شرکتونو سره اشنا شي او د خبرو اترو لاره پرانستل شي، نو دغه نندارتون به ګټور تمام شي." په کابل کې د ایران سفیر وویل، چې د ایران اسلامي جمهوریت چمتو دی، چې د تخنیکي او انجینرۍ په برخه کې د افغانستان په زیربنایې سره مرسته وکړي. هغه د طالبانو د چارواکو او د افغانستان د خصوصي سکټور غړو ته ښه راغلاست وايي او ویې ویل، چې همکاري کولای شي د دواړو هېوادونو ترمنځ د اقتصادي اړیکو په پراختیا او په افغانستان کې د زیربناوو او اقتصادي وضعیت په ښه کولو کې اغېزمن تمام شی. د طالبانو تر کنټرول لاندې د ارګ اېکس پاڼې لیکلي، چې د امام ابوحنیفه په دریم نندارتون کې د صنعتي تولیداتو او کرنیزو محصولاتو ۷۰۰ غرفې نندارې ته وړاندې شوې او ۲۰۰ غرفې بهرنیو شرکتونو ته ځانګړې شوې وې. طالبانو ویلي، چې د دغه نندارتون د پرانیستې په مراسمو کې د ایران، ترکیې، قطر او پاکستان هېوادونو ډیپلوماټانو او سوداګرو هم ګډون کړی و. کاظمي قمي دا څرګندونې په داسې حال کې کړي چې د طالبانو د اقتصاد مرستیال وزیر د یکشنبې په ورځ د نندارتون د پرانستلو له مراسمو څخه ځکه ووت چې د هغه په باور دغه مراسم "ملي نه و." د سرچینو په وینا، عبداللطیف نظري په دې باور دی چې د نندارتون د محصولاتو په معرفي کولو کې "قومي توازن" په پام کې نه دی نیول شوی. د طالبانو دغه چارواکي په دې باور دي چې دا نندارتون "په ځانګړې توګه هزاره ګانو ته دا فرصت نه ورکوي چې د مرکزي افغانستان محصولات معرفي کړي." یوې باخبرې سرچینې ویلي، چې نظري فکر کوي چې په نندارتون کې د هزاره جاتو د تولیداتو او پانګونې ونډه ډېره کمه ده.
د سوېلي زون فوټبال سيالۍ، چې د هلمند په کوربتوب پيل شوي په لومړۍ لوبه کې د هملند هارون پوپل لوبډلې ۴ د صفر په مقابل کې د ارزګان میوند لوبډلې ته او په دويمه لوبه کې د کندهار استقلال الفت لوبډلې ۴ د ۲ په مقابل کې د غزنې شهادت لوبډلو ته ماتې ورکړي.
د شمال ختيځ زون فوټبال سيالۍ بیا د کندز په کوربتوب پيل شوي دي.
د سياليو په لومړۍ ورځ د بغلان شاهين فوټبال لوبډلې ۳ پر ۱ د بامیان ځوانانو لوبډلې ته او په دويمه لوبه کې د بدخشان عقاب پامير لوبډلې ۴ پر يو د تخار شيوا لوبډلو ته ماتې ورکړه.
د لوېديځ زون فوټبال سیالۍ د هرات په کوربتوب شروع شوي دي.
د سياليو په لومړۍ لوبه کې د نيمروز نورزاد لوبدلې ۲ پر ۱ د بادغيس اتحاد لوبدله ماته کړه او په دويمه سيالۍ کې بيا د هرات صرافان فوټبال لوبډلې ۲ پر صفر د فراه معارف لوبډلې ته ماتې ورکړه.
