په امریکا کې یو افغان د ټاکنو په ورځ د برید د پلانولو په تور نیول شوی دی

رویټرز خبري اژانس راپور ورکړی، چې یو افغان د امریکا په اوکلاهاما ایالت کې د ټاکنو په ورځ د ترهګریز برید د پلانولو په تور نیول شوی دی.

رویټرز خبري اژانس راپور ورکړی، چې یو افغان د امریکا په اوکلاهاما ایالت کې د ټاکنو په ورځ د ترهګریز برید د پلانولو په تور نیول شوی دی.
د رویټرز په وینا د امریکا عدلیې وزارت ۲۷ کلن نصیر احمد توحیدي تورن کړی او ویلي یې دي، چې دغه افغان د (داعش) په نوم د یوه برید پلان لاره.
نصیر احمد توحیدي په ۲۰۲۱ کال کې د کډوالۍ په ځانګړې ویزه امریکا ته تللی و او د اوکلاهاما په ښار کې اوسېده.دغه افغان په واشنګټن ډي سي کې امنیتي کمرو ته د لاسرسي لپاره د انلاین معلوماتو په لټه کې تورن دی.په داسې حال کې چې اړوند کس د سپینې ماڼۍ او واشنګټن مونومینټ کمرې هم په انلاین بڼه څارلې وې.په دې قضیه کې د نصیر توحیدي ترڅنګ د هغه کشر اوښی هم شامل دی، چې د دوشنبې په ورځ د اېف بي ای لهخوا ونیول شو.نصیر توحیدي له نیول کېدو وروسته چارواکو ته وویل، چې هغه د خلکو د یوې لویې غونډې په ترڅ کې د برید پلان جوړ کړی و.د امریکا لوی څارنوال میرک ګارلنډ په یوه بیان کې ویلي:« موږ به د داعش او د هغې د ملاتړو لهخوا د امریکا ملي امنیت ته د ورپېښ ګواښ سره مبارزې ته دوام ورکړو او موږ به هغه کسان وپېژنو او محاکمه به یې کړو، چې د امریکا د خلکو د وژنې هڅه کوي.»


د طالبانو تر واک لاندې باختر خبري اژانس لیکلي، چې پرون سې شنبه د (تلې ۱۷مه) ۳۱۰ کورنۍ له دوه ګاونډیو هېوادونو څخه راستنې شوې. له ایران او پاکستانه ډېره برخه افغانې کورنۍ په زوره اېستل کېږي.
له ایران او پاکستانه د افغان کډوالو د اېستلو په دوام پرون ۳۵ کورنۍ د تورخم، ۳۸ د سپین بولدک، ۹۸ کورنۍ د ورېښمو پله او ۱۳۹ کورنۍ د اسلام کلا له لارې هېواد ته راستنې شوې دي.
په ایران او پاکستان کې پر افغان کډوالو د زیاتو فشارونو له امله افغانان په زور له یادو هېوادونو څخه اېستلو ته اړ اېستل کېږي.
طالبان وايي، تازه راستنو شویو یو شمېر کډوالو سره یې مرستې کړې او یو شمېر یې خپلو اصلي سیمو ته لېږدولي دي.
ایران هره ورځ سلګونه افغانان په زور له خپل هېواده باسي او هلته یې د افغانانو پر کار کولو هم سخت بندیزونه لګولي دي.
دغه هېواد وايي، په یوه کال کې به ۲ مېلیونه افغانان بېرته افغانستان ته واستوي.
بل خوا پاکستانیو رسنیو هم په خپلو ورستیو راپورونو کې ویلي، چې د سپټمبر له ۹مې نیټې څخه د اکټوبر تر ۷مې نیټې یې له دغه هېواده ۲۶۶۲۲ تنه افغان کډوال افغانستان ته استولي او دا لړۍ لا هم دوام لري.

د طالبانو د عامې روغتیا وزیر په افغانستان کې د یونیسف او خوړو نړۍوال سازمان له استازو سره په لیدنه کې ویلي، چې دغه ادارې دې د ماشومانو له کورنیو سره د نغدي مرستو د وېش په کار کې له طالبانو سره همغږي وکړي.
پر دغې ډلې تر دې وړاندې هم داسې تورونه پورې شوي وو، چې په افغانستان کې د بشري مرستو په وېش کې فساد کوي.
د طالبانو د عامې روغتیا وزارت د یوې خبرپاڼې په خپرولو سره ویلي، چې سرپرست وزیر مولوي نور جلال جلالي په افغانستان کې د ملګرو ملتونو د خوړو نړۍوال سازمان او د یونیسف ادارې له استازو سره د سې شنبې په ورځ د (تلې ۱۷مه) لیدنه کې له یادو ادارو غوښتي چې، د ماشومانو له کورنیو سره د نغدي مرستو وېش دې له دوی سره په همغږۍ ترسره شي.
د عامې روغتیا وزیر په افغانستان کې د ملګرو ملتونو د خوړو نړۍوال پرورګرام او د ماشومانو صندوق استازو ته ویلي، چې د ماشومانو له کورنیو سره د نغدي مرستو پرورګرام دې د دوه اړخیز تړون تر لاسلیک وروسته پیل شي.
دا په داسې حال کې ده، چې په افغانستان کې د یو شمېر مرستندویه سازمانونو بشري مرستې د طالبانو تر مستقیم څار لاندې ترسره کېږي.
تر دې وړاندې هم پر طالبانو داسې تورونه لګول شوي، چې د یادې ډلې تر څار لاندې د ملګرو ملتونو د بشري مرستو په وېش کې فساد کېږي.
د طالبانو له لوري د بشري مرستو د تالا ترغۍ کولو په دوام د تلې په درېیمه نېټه له هلمند څخه یو شمېر ښځو افغانستان انټرنشنل ـ پښتو ته شکایت کړی وو، چې د دغه ولایت په مرکز لښکرګاه کې بېوزلو، کونډو او یتیمانو ته د مرستې ورکولو پر مهال یو شمېر ځايي طالب قوماندانانو د خپلو خپلوانو نومونه د مستحقو کسانو پر ځای پر مرستندویانو په زوره لیکلي و او په دې توګه یې د درغلیو لپاره زمینه برابره کړې وه.

په ننګرهار ولایت کې د طالبانو د اطلاعاتو او کلتور امر صدیق الله قریشي سیمهییزو راډیوګانو ته سپارښتنه کړې، چې خپرونې یې باید د «اسلامي شریعت» او د دوی د شته نشراتي پالیسۍ سره سمې خپرې شي.
په ننګرهار ولایت کې د طالبانو د رسنیو دفتر پر اېکس پاڼه کاږلي، چې نوموړي دغه څرګندونې له سیمهییزو رسنیو څخه د لیدنې پرمهال کړې دي.
ښاغلي قریشي زیاته کړه، چې نړۍوالې رسنۍ د افغانستان اوسنی وضعیت ناسم تعبیروي او هڅه کوي افغانان په ذهني توګه نا ارامه کړي.
هغه دا رنګه ویلي:« دا د کورنیو رسنیو مسوولیت دی، چې د خپلو خپرونو له لارې حقایق او پرمختګونه خلکو ته ورسوي؛ چې د بهرنیو رسنیو ناسمه څېره څرګنده او خلک ذهني ارامتیا ومومي.»
نوموړي د دغې لیدنې پرمهال د ننګرهار د سیمهییزو راډیوګانو د سټوډیوګانو او خپرونو مهالوېش هم وڅېړه او ټینګار یې وکړ، چې رسنۍ دې ولسونو ته داسې خپرونې وړاندې کړي چې د «دنیا او اخرت» ګټې په کې وي.
تر دې وړاندې د طالبانو د اطلاعاتو او کلتور وزارت د خپرونو چارو معینیت چارسمبالي ضیاء الحق حقمل ویلي و، رسنۍ دې د هغو بهرنیو کسانو راپورونه نه را نقلوي چې د افغانستان په اړه ناسم تحلیلونه کوي.
خو ګڼ خبریالان او رسنوال وایي، چې طالبان هر څه ته له خپل لیدلوري ګوري.
د دغو خبریالانو په وینا، دغه واکمنه وسلهواله ډله داسې انګېري چې دوی کولای شي په وچ زور هر څه پر خلکو وتپي؛ په داسې حال کې چې په تېرو شلو کالو کې د افغانستان خلکو د بیان له ازادۍ سره ژوند تېر کړی او دغه بندیزونه نه شي کولای، چې خلک له واقیعتونو څخه په څنګ وساتي؛ خو د دوی په وینا طالبان دومره واکمن او ځواکمن نه دي، چې دغه کار دې وشي کړای.
د افغانستان د ازادو خبریالانو د ملاتړ ادارې مشر مجیب خلوتګر افغانستان انټرنشنل پښتو ته وویل: «سره له دې چې طالبانو په افغانستان کې د ټولو بهرنیو رسنیو په خپرونو بندیز لګولی او د ځینو بهرنیو انځوریزو رسنیو لکه د افغانستان انټرنشنل ټلویزیون په خپرونو یې له پرازیټونه هم کار واخیست؛ خو هغوی پر دې نه پوهېږي، چې ننۍ ټکنالوژي دومره غښتلې ده چې د دوی هیڅ ډول بندیز د دغو خپرونو مخه نه شي نیولای.»
ښاغلي خلوتګر زیاته کړه، طالبانو پر دغه شان کړنو نه یوازې په کور د ننه خپل باور له لاسه ورکړی؛ بلکې په نړۍواله کچه یې هم خپل اعتبار زیانمن کړی دی.
په تېرو درېیو کالو کې طالبانو پر مېرمنو او رسنیو سخت بندیزونه لګولي، چې له همدې امله یې د خلکو په منځ کې خپل اعتبار بایللی دی.
دغه ډله هڅه کوي، چې د دغو بندیزونو له لارې خپلې ټولې نادودې د خلکو له نظره لرې وساتي؛ خو لمر هیڅکله هم په دوو ګوتو نه دی پټ شوی.

د طالبانو تر کنټرول لاندې د باختر اژانس د سې شنبې په ورځ (د تلې ۱۷مه) راپور ورکړ، چې د طالبانو د هرات والي د ټاپي پروژې له عمومي مشر محمد میرات امانوف په مشرۍ له ترکمنستاني چارواکو سره لیدلي.
د طالبانو د هرات والي له ترکمنستاني چارواکو سره په کتنه کې د ټاپي پروژې د حقوقي او تخنیکي اړخونو پر اوسني حالت چې د انرژۍ د خوندیتوب په موخه جوړ شوی و، بحث وشو.
د غونډې په ترڅ کې ترکمنستاني پلاوي په هرات کې د اورګاډي د کنسرسیوم د دفتر د جوړولو په ګډون د لومړنیو کارونو د ملاتړ لپاره د لازمو اسانتیاو د رامنځته کولو اړتیا په ګوته کړه.
تر دې مخکې د ترکمسنتان د بهرنیو چارو وزیر رشید مرادوفوايي، په سیمه کې د امنیت لپاره تر ټولو مهم د افغانستان د خلکو ملاتړ او همکاري ده چې ور سره یې اقتصاد رغول کېږي او بشري ستونزې یې حل کېږي.
ترکمنستان د منځنۍ اسیا د ځینې نورو هېوادونو په څېر له طالبانو سره نږدې اړیکي لري.
د ټاپي پایپ لاین چې د ترکمنستان ګاز د افغانستان له لارې پاکستان او هند ته لېږدوي، یوه له سترو سیمه ییزو پروژو څخه ده.
دا پروژه ۱۸۲۱ کیلومتره اوږدوالی لري، د کلنۍ انتقال ظرفیت یې ۳۳ میلیارد متر مکعب دی او طالبانو ویلي، چې د دې پروژې له ټرانزیت څخه به د افغانستان کلنی عاید ۴۰۰میلیونه ډالره وي.

د طالبانو ادارې ته نږدې سرچینو په ناڅرګندو شرایطو کې د یو شخص اعتراف خپور کړی، چې پکې نوموړی ځان د پاکستان جاسوس معرفي کوي.
د طالبانو له خوا په خپرې شوې ویډیو کې یاد شخص وايي، چې پاکستان پلان درلود چې یو شمېر افغانان د طالبانو د ادارې پر ضد د بغاوت لپاره افغانستان ته واستوي.