د پاکستان د پوځ لوی درستیز د سې شنبې په ورځ د دغه هېواد د ولسمشر اصف علي زرداري او د چین د لومړي وزیر لي کیانګ ترمنځ سهارنۍ ناسته کې له ګډون وروسته خبریالانو ته وویل، چې د شانګهای همکارۍ سازمان په سرمشریزه کې د دوی ټول تمرکز د پاکستان پر مسایلو او بریالیتوب دی.
کله چې یوه خبریال نوموړی د شانګهای له سرمشریزې نه د خپلو هېلو په تړاو وپوښت، جنرال اصف منیر وویل، « موږ یوازې پر پاکستان تمرکز کوو او موفقیت یې غواړو»
پاکستان نن د شانګهای سرمشریزې د ۲۳مې ناستې کوربه دی چې دوه ورځې به غځیږي.
ټاکل شوې د چین د لومړي وزیر ترڅنګ چې له غونډې وړاندې اسلام اباد ته تللی، د روسیې، ترکمنستان، او تاجکستان لومړي وزیران هم په دې غونډه کې ګډون وکړي.
د هند او کرغیزستان د بهرنیو چارو وزیران او د اوو نورو هېوادونو استازي هم په ناسته کې د ګډون لپاره اسلام اباد ته تللي دي.
د شانګهای سرمشریزه داسې مهال په اسلام اباد کې کیږي، چې په پلازمېنه او شاوخوا کې د احتمالي پېښو د مخنیوي لپاره ټینګ امنیتي تدابیر نیول شوي.
د چین لومړي وزیر لي کیانګ د همدې امنیتي ګواښونو له امله په ګوادر کې د پکینګ په مرسته جوړېدونکی هوايي ډګر له اسلام اباده انلاین پرانېست.
