په سپین بولدک کې د ۱۶۹ بېلابېلو تاریخي او لرغونو کتابونو او اثارو د قاچاق مخنیوی شوی
په کندهار کې د طالبانو د اطلاعات او کلتور ریاست وايي، دغه تاریخي او لرغوني اثار په سپین بولدک ولسوالۍ کې پاکستان ته د قاچاقېدو پر مهال نیول شوي.
په کندهار کې د طالبانو د اطلاعات او کلتور ریاست وايي، دغه تاریخي او لرغوني اثار په سپین بولدک ولسوالۍ کې پاکستان ته د قاچاقېدو پر مهال نیول شوي.
د کندهار د طالبانو د والي رسنیز دفتر له لوري په خپره شوې خبرپاڼه کې د دغه ولایت د اطلاعات او فرهنګ ریاست د هنر او فرهنګ د امر عبدالشکور څپاند له قوله لیکلي، چې په سپین بولدک ولسوالۍ کې په نیول شویو اثارو کې ۱۵۶ نوي او تاریخي قلمي او چاپي کتابونه او ۱۳ بېلابېل فلزي اثار شامل دي.
په خبرپاڼه کې ویل شوي، چې یاد اثار په سپین بولدک ولسوالۍ کې د طالبانو د کمیسارۍ د مسوولینو له لوري نیول شوي.
ښاغلي څپاند ویلي، چې یاد اثار د کندهار موزیم ته سپارل شوي او تر ثبت، پېژندلو او ترمیم وروسته به په موزیم کې نندارې ته وړاندې شي.
د طالبانو د اطلاعات او کلتور وزارت ویاند خبیب غفران وايي:« یاد تاریخي اثار تېره ورځ نیول شوي او په تېرو درېیو کالو کې مو له ۱۵۰۰ څخه د ډېرو تاریخي اثارو د قاچاقو مخنیوی کړی دی.»
نوموړی زیاتوي، چې د تېرو دوو کالو پر تله سږکال د تاریخي اثارو د قاچاقو کچه ټیټه شوې ده.
په کندهار کې طالب چارواکو تر اوسه د یادو تاریخي اثارو د قاچاق په تور د کوم چا د نیول کېدو په اړه څه دي ویلي؛ خو تر دې وړاندې د طالبانو ډله د لرغون توکو په قاچاقو کې ښکېل ګڼل شوي وو.
