د طالبان د رییس الوزرا ادارې مرستیال عبدالسلام حنفي وايي، چې د نشه یې توکو له شر څخه د افغانستان، ګاونډيانو او نړۍ د خلاصون يوازینۍ لار له افغان کروندګرو سره د بديل کښت په برخه کې مرسته کول دي. نوموړي له نړۍ څخه وغوښتل، چې د افغانستان کنګل شوې سرمايه دې ورته وسپاري.
د طالبانو د رییس الوزرا ادارې مرستیال عبدالسلام حنفي د سرې میاشتې د ځانګړې اونۍ په غونډه کې وويل، چې نړۍ بايد د افغان کروندګرو سره بديلې مرستې او د معتادينو په درملنې کې همکاري وکړي.
حنفي ویلي، چې ځوانانو ته د کاري زمينې برابرولو او د جبري کډوالۍ د مخنيوي لپاره باید نړۍ د افغانستان کنګل شوې سرمايه ورکړي، تر څو دوی خپلې اړتياوې په پوره کړي.
نوموړي د «افغانستان کنګل شوې سرمايه د نړۍ ظالمانه کړنه» یاده کړه.
نړۍ او ګاونډيانو په بېلابېلو ناستو او غونډو کې په افغانستان کې د ترهګرو ډلو پر شتون او د نشه يي توکو پر کښت او قاچاق د اندېښنې په ډول خبري کړي او له افغانستان څخه یې نورو هېوادونو ته د خطر د زياتوالي په معنا ياد کړي.
