د ملا هبتالله له لوري پر پولیو کمپاین تر بندیزونو یو میاشت وروسته د طالبانو د عامې روغتیا وزیر نور جلال جلالي د پولیو واکسین په کلنۍ غونډه کې ویلي، چې په جوماتونو کې د پولیو څاڅکو کمپاین به روان ساتي.
هغه د افغانستان په ټولو سیمو کې د معیاري روغتیایي خدمتونو پر وړاندې کولو هم تینګار وکړ.
د طالبانو د مشر ملا هبتالله له لوري پر پولیو واکسین تر بندیزونو یو میاشت وروسته د دغې ډلې د عامې روغتیا وزیر نور جلال جلالي نن سې شنبه د (تلې ۲۴مه) په کابل کې د پولیو واکسین په کلنۍ غونډه کې ویلي، چې په جوماتونو کې د پولیو څاڅکو کمپاین روان ساتي.
هغه وايي، په پام کې لري چې د پولیو څاڅکي د افغانستان هر ګوډ ته ورسوي او د جوماتونو له لارې به یې تر پنځو کلونو پر کم عمره ماشومانو تطبیق کړي.
ټیک یوه میاشت وړاندې د طالبانو مشر ملا هبتالله د پولیو پر کمپاین بندیز ولګاوه او طالبانو یې دلیل دا ښودلی و چې د سوېلي ولایتونو دیني عالمانو او قومي مشرانو ترې د دغه واکسین د بندیدو غوښتنه کړې خو طالبان وايي له کور په کور څخه به دغه کمپاین جومات په جومات کړي.
د طالبانو عامې روغتیا وزارت د معلوماتو له مخې دا مهال په ټول افغانستان کې پر پولیو د اخته ماشومانو شمېر ۲۲ رسېدلی دی.
لا هم نه ده څرګنده چې د دغه واکسین کمپاین به بیا کله پیل شي، خو د طالبانو عامې روغتیا وزیر وايي هڅه یې دا ده چې جومات په جومات دغه واکسین بېرته پیل کړي.
تر ډیره بریده پر طالبانو په کور دننه او بهر نیوکې دي چې جومات په جومات د پولیو کمپاین ښايي هغه ډول سمې پایلې ونه لري لکه څنګه چې یې کور په کور پایلې لرلې.
پر پولیو واکسین د طالبانو تر بندیز وروسته یو شمېر سرچینو ګارډین ورځپاڼې ته ویلي وو، چې په کندهار کې طالب مشران له دې وېرې چې د هغوی د استوګنې سیمې افشا نه شي او ګواښ ورته پېښ نه شي دغه کمپاین یې ځنډولی دی.
ځینو سرچېنو تر هغه وړاندې افغانستان انټرنشنل ته ویلي و، چې طالبانو مېرمنې نه وې پرېښې چې د پولیو واکسین د کمپاین پر مهال دې کور په کور وګرځي او په دغه کمپاین کې دې برخه واخلي.
طالبان لا هم غوڅه خبره نه کوي چې د پولیو څاڅکو کمپاین به بیرته کله پیلیږي او ایا دوی به وکولای شي چې د جوماتونو له لارې ټولو په شرایطو برابرو ماشومانو ته دغه واکسین ورسیږي.
