د قطر امیرشیخ تمیم بن حمد ال ثاني نن د یکشنبې پر ورځ ایټالیا او جرمني ته د سفر په موخه د اروپايي هېوادونو په دوره وځي. قطر اعلان وکړ، شیخ تمیم، چې ددغه هېواد د بهرنیو چارو وزیر شیخ محمد بن عبدالرحمن الثاني یې ملتیا کوي، لومړی ايټالیا ته ځي او له هغه وروسته به جرمني ته سفر کوي.
دوه اړخیزې اړیکې او همکارۍ ددغه سفر هدف ګڼل شوی.
د قطر امیري دیوان اعلان وکړ، چې نوموړی به د دواړو هېوادونو له مشرانو سره د دوه اړخیزو اړیکو پر رغولو او سیمه ییزو او نړۍ والو مسایلو خبرې اترې وکړي.
د قطر امیر تېرکال هم په همدې میاشت کې ایټاليا او جرمني ته سفر کړی و، چې د اسراییل او حماس ترمنځ د اوربند په اړه خبرې وکړي.
شیخ تمیم بن حمد ال ثاني تېره اونۍ اعلان وکړ چې په غزه کې باید سملاسي اوربند رامنځته شي.
