د امریکا ټاکنې: په څلورو وروستیو ټولپوښتنو کې کمالا له ټرمپ مخکښه ده
د امریکا د ولسمشریزو ټاکنو په څلورو وروستیو ټولپوښتنو کې د ډېموکراټانو نومانده کمالا هرېس د جمهوري غوښتونکو له نوماند ډونالډ ټرمپ څخه مخکښه ده.
د امریکا د ولسمشریزو ټاکنو په څلورو وروستیو ټولپوښتنو کې د ډېموکراټانو نومانده کمالا هرېس د جمهوري غوښتونکو له نوماند ډونالډ ټرمپ څخه مخکښه ده.
د سې شنبې په سهار د ډېموکراټانو نومانده د مشورتي اونیزې په ټولپوښتنه کې له ټرمپ څخه مخکښه ده.
د ټولپوښتنې له مخې، کمالا له ۴۶ څخه تر ۵۰ سلنې پورې د امریکا د احتمالي رایه ورکوونکو ملاتړ له ځانه سره لري، چې دا ملاتړ په تېره اونۍ کې له ۴۵ څخه تر ۵۱ سلنې پورې و.
د رویټرز او ای پوسس تازه ټولپوښتنه چې نن سې شنبه خپره شوې، پکې کمالا له ۴۳ څخه تر ۴۶ سلنه پورې د ټولپوښتنې د ګډونوالو ملاتړ له ځانه سره لري او له ټرمپ مخکښه ده.
بل خوا د فاکس نیوز په ټولپوښتنه کې چې د تېرې چهار شنبې په ورځ خپره شوې ده، ټرمپ له له ۴۸ څخه تر ۵۰ سلنه د احتمالي رایه ورکوونکو ملاتړ له ځانه سره لري او له کمالا څخه مخکښ دی.
همدا راز د هیل مجلې د نظرپوښتنې له مخې، د متحده ایالاتو پخوانی ولسمشر ډونالډ ټرمپ اوس د دې هېواد د اوسنۍ مرستیالې کمالا هرېس په پرتله لوړ چانس لري، چې د ۲۰۲۴ کال د نومبر په ۵ د ولسمشرۍ ټاکنې وګټي.
د دغې نظر پوښتنې له مخې، ټرمپ اوس د ولسمشرۍ د ګټلو چانس ۵۲ سلنه لري، د هرېس لپاره بیا د اټکل له مخې د بریا چانس ۴۲ سلنه ټاکل شوی دی.
د ماریسټ کالج له خوا د شویو دوو ټولپوښتنو پر بنسټ کمالا هرېس له ټرمپ مخکښه ده، چې له مخې یې کمالا د احتمالي رایه ورکوونکو له ۴۷ څخه تر ۵۲ سلنه ملاتړ له ځانه سره لري.
ټاکل شوې، چې د امریکا د ولسمشرۍ ټاکنې د نومبر په ۵مه نېټه ترسره شي، چې د امریکا د ټاکنو په تاریخ کې د دویم ځل لپاره یوه مېرمن د ټولپوښتنو له مخې مخکښه ده.
په هرات کې د روغتيايي مرکزونو يو شمېر کارکوونکو د لړم پر لومړۍ نېټه افغانستان انټرنشنل ته وويل چې له څلورو مياشتو راهيسې يې معاشونه نه دي ترلاسه کړي.
د هرات د روغتونونو معترضو کارکوونکو د مکتوبونو په لاسلیکولو سره رسماً خپل اعتصاب اعلان کړ.
دغو روغتيايي کارکوونکو خبردارى ورکړ، چې د معاشونو تر ورکولو پورې به په روغتونونو کې روغتیايي خدمتونه وړاندې نه کړي.
دوی يادونه وکړه، چې که معاشونه يې ورنه کړل شي، د روغتون بېړنۍ څانګه به هم فلج شي.
افغانستان انټرنشنل ته رالېږل شوي اسناد ښيي، چې د ګذرې ولسوالۍ روغتون، د شینډنډ روغتون، سرچا، تورغونډۍ او کشک روغتیايي مرکزونو کارکوونکو د معاشونو د نه ورکولو له امله کار بند کړی دی.
طالبانو تر اوسه د هرات د ګذرې ولسوالۍ روغتون د کارکوونکو د کاربندیز او د دوی د معاشونو د نه ورکولو په اړه څه نه دي ویلي.
په هرات کې يو باخبره روغتيايي کارکوونکى وايي چې د دغو روغتيايي مرکزونو اصلي تمويل کوونکى د ملګرو ملتونو د ماشومانو وجهي صندوق (يونېسف) دى.
د دغې سرچينې په وينا، په دې وروستيو مياشتو کې د يونېسف د پروژو د پليتابه موسسې بدلې شوې او هېڅ يوه مسوول بنسټ د دغو روغتيايي مرکزونو معاشونه او لګښتونه پر غاړه نه دي اخيستي.
سرچينه زياتوي، چې له کاربندیز وړاندې په هرات کې د روغتيايي مرکزونو کارکوونکو د خپلو معاشونو د ستونزې پر هواري څو ځله له چارواکو سره ناستې کړې، خو کومې پايلې ته نه دي رسېدلي.
دا لومړی ځل نه دی، چې په افغانستان کې دولتي کارکوونکي د معاشونو د کمښت او نه ورکړې له امله اعتصاب کوي.
له دې وړاندې په کابل کې د ښوونځیو یو شمېر ښځینه ښوونکو او د ځینو روغتیايي مرکزونو ښځینه کارکوونکو د معاشونو د کموالي له امله اعتصاب کړی و.
دا په داسې حال کې ده، چې د افغانستان په لرې پرتو سیمو کې روغتیايي خدمتونو ته د خلکو لاسرسی خورا کم دی او ډېری ناروغان د کمو مالي سرچینو له امله دولتي روغتونونو ته له تګ پرته بله چاره نه لري.
کله چې طالبان په افغانستان کې واک ته ورسېدل، د روغتیا او پوهنې په څانګو کې یې د ښځو کار محدود کړ او د ډېرو دولتي کارکوونکو معاشونه یې کم کړل.
په تېرو دریو کلونو کې یوشمېر ملکي مامورینو د معاشونو د کموالي ترڅنګ د دوی د معاشونو د ځنډېدو شکایتونه هم کړي دي.
