حامد کرزي د کابل سینمای پامیر پرونۍ چاودنه غندلې ده
د افغانستان پخوانی ولسمشر حامد کرزي د کابل په سینمای پامیر کې پرونۍ چاودنه غندلې او هغه یې یوه «ترهګریزه» کړنه یاده کړې ده.
د افغانستان پخوانی ولسمشر حامد کرزي د کابل په سینمای پامیر کې پرونۍ چاودنه غندلې او هغه یې یوه «ترهګریزه» کړنه یاده کړې ده.
که څه هم لا تراوسه د دغې چاودنې له امله د وژل شویو کسانو په اړه ډېر کره مالومات نه دي ترلاسه شوي او طالبان هم رسنیو ته اجازه نه ورکوي، چې د دغه شان پېښو په تړاو کره شمېرې او مالومات خپاره کړي؛ خو ښاغلي کرزي په اېکس پاڼه کاږلي، د کابل په سینمای پامیر سیمه کې چاودنې چې ګڼ هېوادوال یې وژلي او ټپیان کړي یوه «ترهګریزه» کړنه ده او هغه یې غندنه کوي.
دغه چاودنه تېره ورځ د ماسپښین شاوخوا دوه بجې د سینمای پامیر د دویم لاس توکو په یوه پلورنځي کې شوې ده.
په کابل کې د اېمرجنسي روغتون وايي، چې د کابل ښار سېنمای پامیر سیمه کې د چهارشنبې ورځې د چاودنې له امله ۱۱ تنه ټپیان دغه روغتون ته لېږدول شوي دي.
د دغه روغتون لهخوا په یوې اعلامیه کې راغلي، چې په ټپیانو کې ښځې او ماشومان هم شامل دي.
لاتر اوسه د دغې چاودنې مسوولیت چا پرغاړه نه دی اخیستی.
د اېمرجنسي روغتون مرستیال سټیفانو جنارو سمیرنوف وايي، چې د ۱۱ ټپیانو په ډلې کې یوه درې کلنه نجلۍ، یو څلور کلن او یو ۱۶ کلن هلک، دوه ښځې او شپږ نارینه شامل دي، چې د یوه ټپي روغتیايي وضعیت د اندېښنې وړ دی.
