په پښتونخوا کې د پاکستان پر پوځ په دوو بريدونو کې ۱۹ سرتېري ټپيان شول
د پښتونخوا په سويلي وزيرستان او لکي مروت کې په دوو جلا پېښو کې د یوه افسر په ګډون د پاکستان ۱۹ سرتېري ټپيان شوي دي.
د پښتونخوا په سويلي وزيرستان او لکي مروت کې په دوو جلا پېښو کې د یوه افسر په ګډون د پاکستان ۱۹ سرتېري ټپيان شوي دي.
سرچینې وايي، لکي مروت کې پوځیانو د یورانیم فابریکې ته روان و، چې برید پرې وشو.
د دې پېښې ټپیان میاولې روغتون ته وړل شوي دي.
د سويلي وزیرستان په سرویکي سیمه کې هم پر پاکستاني ځواکونو نن برید شوی چې پکې ۱۶ امنیتي ځواکونه ټپیان شوي دي.
په ټپیانو کې د څلورو پوځیانو حالت نازک ښودل شوی دی.
تر اوسه د پيښي مسولیت چا په غاړه نه دی اخیستی او نه هم چارواکو د پيښي وروستي جزيات شریک کړي.
امنیتي ځواکونو په دواړو سیمو کې چاڼیز عملیات پیل کړي دي.
Tweet unavailable
د پاکستان سرپرست ولسمشر سید یوسف رضا ګېلاني او د دې هېواد لومړي وزیر شهباز شریف د بلوچستان په مستونګ کې د چاودنې غندلو سره د «ترهګرۍ» د ختمولو ژمنه بیا وکړه.
د پولیسو پر ګاډي د دې چاودنې له امله ۵ زدکوونکي، یو پولیس او یو ولسي وګړی وژل شوي او د پولیسو په ګډون ۲۳ ټپیان شوي.
د پاکستان دولتي راډیو د خبر له مخې سرپرست ولسمشر او لومړي وزیر شهباز شریف په دوو جلا اعلامیو کې د دغه برید له امله د ماشومانو او یو پولیسږ پر وژل کېدو ژوره خواشیني څرګنده کړې ده.
د پاکستان سرپرست ولسمشر سید یوسف رضا ګېلاني په دې اعلامیه کې ترهګرۍ د له منځه وړلو هوډ یو ځل بیا تکرار کړ.
سید یوسف رضا ګېلاني وايي:« ترهګر د انسانيت دښمنان دي او ټول ملت د ترهګرۍ د له منځه وړلو لپاره د امنيتي ځواکونو او قانون پلي کوونکو ادارو ملاتړ کوي.»
د پاکستان لومړی وزیر شهباز شریف هم په اعلامیه کې د پاکستانه د ترهګرۍ تر ختمولو د جنګ جاري ساتلو ژمنه وکړه.
په سیمه کې د پاکستاني پولیسو یو افسر رویټرز ته ویلي چې د چاودنې هدف د پولیسو هغه ګاډی و چې د پولیو واکسیناتوران یې پورته کول.
نوموړی وايي، په دغه پېښه کې یو پولیس او پنځه ماشومان او یو ولسي وګړی وژل شوی دی.
هغه زیاتوي چې د چاودنې له امله د پولیسو په ګډون ۲۳ کسان ټپي شوي دي.
د بلوچستان په مستونګ سیمه کې یوې چاودنې د ښوونځي د ماشومانو په ګډون ۷ کسان وژلي او ۱۵ نور یې ټپیان کړي دي.
د پوليسو په وینا، د مستونګ ښار د نجونو یوې لېسې ته څېرمه هسپتال چوک کې بمي چاودنه شوې، چې په کې یو پولیس او پنڅه ماشومان او یو بل ولسي وګړی وژل شوي دي.
ځایي پولیس وایي، په دغې پېښه کې ۱۵ کسان ټپیان شوي او په ټپیانو کې ډېری یې د ښوونځي زدهکوونکي دي.
پوليس وايي، د چاودنې اصلي موخه د پوليسو د موټرو کتار و.
له بل پلوه د بلوچستان سر وزیر سرفراز بګټي دغه پېښه غندلې ده.
نوموړي په یوه بیان کې ویلي، چې ترهګر اوس بې ګناه ماشومان په نښه کوي او دوی به د دغو ماشومانو د وینې غچ واخلي.
د پاکستان بهرنیو چارو وزارت ویانده له ټي ټي پي یا د پاکستان طالبانو غورځنګ سره د خبرو لپاره هر ډول وړاندیز یا سپارښتنه ردوي.
ممتاز زهرا بلوڅ دا هم وايي چې طالبان په افغانستان کې د ټي ټي پي او نورو وسلوالو ډلو پرضد د ګام پورته کولو مسوولیت لري.
نوموړې نن په اسلام اباد کې خبري غونډې ته د تېر په څېر دا هم وویل، په دې تړاو یې افغان طالبانو ته شواهد هم سپارلي دي.
د طالبانو حکومت د پاکستان دا ادعا ردوي او وايي پاکستاني طالبان په افغانستان کې نشته. دوی وايي ټي ټي پي په پاکستان کې پر خاوره ولکه لري او اسلااباد دې و رسره خپل مشکل پخپله حل کړي.
خو ممتاز زهرا بلوڅ وايو پاکستان له هغو ترهګرو ډلو سره د خبرو لېوالتیا نه لري چې د ولسي وګړو او امنیتي ځواکونو د وژلو مسوول دي.
د نوموړې په خبره، له طالبانو سره د خبرو وړاندیز هغو خلکو ته سپکاوی دی چې د دې ډلې د فعالیتونو له امله یې د کورنیو غړي له لاسه ور کړي دي.
د پاکستان جمعیت علمای اسلام ګوند مشر مولانا فضل الرحمان وايي، پاکستان له ترهګرۍ سره د مبارزې لپاره اغېزمنه تګلاره نه لري. هغه تېره ورځ په ډېره اسماعیل خان کې د یوې غونډې پر مهال یو ځلې بیا د پاکستان پر حکومت نیوکې کړې دي.
د پاکستان جمعیت علمای اسلام ګوند مشر مولانا فضل الرحمان تېره ورځ چهارشنبه د (لړم نهمه) په خپل پلرني ټاټوبي ډېره اسماعیل خان کې یوې غونډې ته د وینا پر مهال ويلي، چې پاکستان له ترهګرۍ سره د مبارزې لپاره اغېزمنه تګلاره نه لري.
هغه وايي، هغه مهال پاکستان امن او ټیکاو راځي چې هره اداره خپل مسوولیت وپېژني او د نورو په چارو کې کار ونه لري.
د پاکستان حکومت د مولانا فضل الرحمان خبرو ته لا غبرګون نه دی ښودلی.
مولانا وايي، له څو کلونو راهیسې د پاکستان ولس له جګړې او بې امنۍ سره مخ دی خو په خبره یې چې پر حکومت یا پوځ نیوکې وکړې هغوی یې دوښمني ګڼي.
هغه وايي، د دې پر ځای چې د پاکستان امنیتي ادارې ترهګر وځپي، دوی دغه ترهګر د د ولس د ځپلو لپاره کاروي.
پاکستان دا مهال په سیاسي، امنیتي او اقتصادي بد وضعیت کې له ترهګرۍ سره لاس او ګریوان دی او حکومت یې په کور دننه د سیاسي ګوندونو له بې شمېره فشارونو سره مخ دی.
مولانا فضل الرحمان وايي، چې د پاکستان سوداګر او خلک د درنو مالیو په ورکولو سره هم په دغه هیواد کې امنیتي او اقتصادي خوندیتوب نه لري او ورځ تر بلې له پاکستانه په تېښته دي.
هغه وايي، په پاکستان کې د عامو وګړو امنیت لا خوندي نه دی خو وايي حکومت ورته یوازې ژمنې ورکوي چې دغه ستونزې به په نن سبا کې حل شي، خو مولانا وايي هسې هوايي ژمنې د خلکو درد نه شي دوا کولی.
مولانا فضل الرحمان داسې مهال د پاکستان پر پوځ او حکومت نیوکې کړي چې تېره ورځ د خیبرپښتونخوا بنو په بکاخیلو د پاکستاني پوځ په ځمکنیو او هوايي عملیاتو کې ولسي خلکو ته د سر او مال زیانونه اوښتي دي.
ویل کیږي، د پاکستان پوځ د ولسي خلکو پر کورونو توغندي ویشتي او تر نهو پورې ولسي کسانو ته یې مرګ ژوبله اړولې ده.
د پښتونخوا د بنو ولسوالۍ د غوړه بکاخېل په سردي خېلو سیمه کې د پاکستاني طالبانو او پوځ ترمنځ جګړه کې د الوتکو د بمبار له امله ملکي خلکو ته مرګ ژوبه اوښتې ده. په نښته کې د پاکستان د پوځ د یوه تورن په ګډون د دریو سرتېرو د وژل کېدو پخلی شوی.
د دواړو خواوو ترمنځ دغه نښته له تېرې شپې ناوخته راهیسې روانه ده، چې چورلکې، سپکې او درندې وسلې پکې کارول کیږي.
د سیمې خلک وايي، پاکستاني چورلکو د دوی د استوګنې په سیمه کې پر جنګیالیو بمباري کړې، چې له امله یې ملکي خلکو ته مرګ ژوبله اوښتې ده.
د پاکستان پوځ او حکومت د ملکي مرګ ژوبلې ادعاوې نه دي تایید کړې، خو د پوځ اړوند سرچینو په دې نښته کې د عاطف په نامه د یوه تورن او دوو نورو سرتېرو وژل کېدل تایید کړي.
یوې سرچینې افغانستان انټرنشنل ته وویل، چې «سهار ته نږدې وخت کې د پاکستان امنیتي ځواکونو په غوړه بکاخېل سردي خېلو کې د پاکستاني طالبانو د حافظ ګل بهادر ډلې محاصره کول غوښتل، خو په دې ترڅ کې یو پوځي افسر تورن عاطف او د هغه سرتیري د طالبانو تر محاصرې لاندې راغلل او پر موټرو یې بریدونه وشول، چې وروسته چورلکو د محاصرې ماتولو لپاره هوايي بریدونه پیل کړل».
سرچینه وايي، په پېښه کې ملکي خلکو ته مرګ ژوبله اوښتې او ځینو کورونو ته مالي زیان هم اوښتی، خو د ملکي مرګ ژوبلې کره شمېر لا څرګند نه دی.
په نښتو کې تر دې دمه د دوو طالبانو د وژل کېدو پخلی هم شوی.
د شمالي وزیرستان اوسیدونکي او د ملي ولسواک ګوند مشر محسن داوړ وايي، چې په غوړه بکاخېل کې خلک د پوځ او جنګیالیو ترمنځ په جګړه کې ایسار دي او له سیمې د وتلو لارې بندې دي.
داوړ وايي، چې « د خلکو د مرګ ژوبلې په اړه اندېښنې شته دي».
د سیمې خلک وايي، چې د پوځي افسر او سرتېرو له وژل کېدو وروسته له چورلکو پر کورونو سپکې او درندې وسلې کاریږي.
د پېښې عیني شاهدان وايي، چې د جګړې له امله سیمې ته د امبولانسونو خدمات نه دي رسېدلي او خلکو په زرنجو کې روغتونونو ته خپل ټپیان لیږدولي دي.
د بنو بکاخېل سیمه چې یو وخت د پاکستان تر ملاتړ لاندې طالبانو ارام ځای و او د وزیرستان ګڼ بېځایه شوي هم دلته اوسیږي، په دې وروستیو کې د پاکستان د طالبانو تحریک او حافظ ګل بهادر ډلې پکې نفوذ کړی.
دغه ولسوالي چې د امن پاڅونونو او پښتون ژغورنې د ملاتړ مهمه سیمه ګڼل کیږي، په وروستیو میاشتو کې د ناکراریو او امنیتي پېښو شاهده ده.