د طالبانو تر واک لاندې ملي ټلویزیون وایي، چې د پنجشېر ولایت ۵۰۱۴ قیراطه زمرد په ۲۴۵۵۰ امریکايي ډالرو پلورل شوي دي. ویل کیږي، یاده اندازه زمرد د ازادې بولۍ له لارې پلورل شوي دي.
د طالبانو تر واک لاندې ملي ټلویزیون د پنجشیر ولایت د طالب چارواکو له قوله تېره ورځ سې شنبه د (لړم ۱۵مه) په خپله ایکس پاڼه لیکلي چې، د پنجشېر ولایت ۵۰۱۴ قیراطه زمرد یې په ۲۴۵ زره او ۵۰ امریکايي ډالرو پلورل شوي.طالبان وايي، چې په دغو لاسته راغلو ډالرو کې ۱۰ سلنه ونډه دوی اخیستې. خو پر طالبانو نیوکې دي چې د ۱۰ سلنې خبره یوازې د رسنیو په مخکې کوي او د پردې تر شا کیسه بل ډول ده.د طالبانو د کانونو او پټروليم وزارت چارواکو تر دې وړاندې ویلي وو، چې په پنجشېر کې د زمردو ٧٥٠ کانونه ثبت شوي چې اوسمهال یې یوازې ٥٠٠ فعال دي.د نړۍوالو مرستو کمښت د دې لامل شوی، چې طالبان د خپلو مالي اړتیاوو د پوره کولو لپاره د افغانستان د کانونو کېندنې ته مخه کړي.تر ډیره بریده پر طالبانو نیوکې کیږي چې، دغه کانونه په نامسلکي توګه را اېستل کېږي چې تر ډېره د کانونو اصلي زېرمو ته زیان اړوي.طالبانو واک ته له رسیدو سره سم په افغانستان کې، د تېلو، ګازو، ډبرو سکرو او قیمتي ډبرو د کانونو اېستلو ته ډیره پاملرنه کړې ده.دغې ډلې په تېرو درېیو کلونو کې د افغانستان د بېلابېلو کانې زیرمو اېستلو قرادادونه د چین او یو شمېر نورو هېوادونو په ګډون کورنیو شرکتونه ته هم ورکړي دي.په دغې ډلې تور دی، چې د افغانستان د کانې زیرمو په ایستلو کې پراخ فساد کوي او کانونه هم په نا معیاري ډول سپړي.دا په داسې حال کې ده، چې څه موده وړاندې طالبانو د کانونو او پټرولیم وزیر شهاب الدین دلاور د فساد په تور له دندې ګوښه کړ.تېر کال د افغانستان پخواني ولسمشر محمد اشرف غني هم د کانونو کېندنه ناقانونه بللې وه او زیاته کړې یې وه، دا مهال روښانه نه ده چې د دغو کانونو څخه تر لاسه شوې پیسې چېرته او په څه لګول کیږي.د طالبانو د کانونو او پټرولیم وزارت وایي، چې تېر کال د څه باندې ۵.۵ مېلیونه امریکايي ډالرو په ارزښت ۷۸ زره قیراطه زمرد د داوطلبۍ له لارې پر کورنیو او بهرنیو پانګهوالو پلورل شوي دي.په پنجشیر کې د طالبانو د کانونو او پټرولیم ریاست د تلې ۲۹مه ویلي و، چې د روان کال په لومړیو شپږو میاشتو کې یې په ۱۱ پړاوونو کې ۳۵ زره او ۸۷۴ قیراطه زمرد د یو میلیون او ۶۱۴ زره ډالرو په ارزښت پلورلي دي.
