د تركيې د كورنيو چارو وزير ویلي، چې سږ كال په ټول هېواد كې ۳۹۲۴ تنه د انسان د قاچاق په تور نيول شوي دي. علي یارلیکایا زیاته کړه، چې دغه کسان په ترکیه کې له شپږو زرو څخه د زیاتو عملیاتو په ترڅ کې پیژندل شوي او نیول شوي دي.
نوموړي د جمعې په ورځ (د لړم ۱۸مه) پر اېکس خواله رسنۍ لیکلي، چې د هېواد په ۴۱ښارونو کې د کډوالو پر ضد د دغه هېواد د ځواکونو په عملیاتو کې ۲۵۷د انسان قاچاق وړونکې نیول شوي دي.
هغه تاييد کړه، چې د دغو کسانو له ډلې د ١٦٩٣ کسانو په اړه د محاکمې حکم صادر شوى دى. ترکيې د انسان قاچاق وړونکو د هويت په اړه جزیيات نه دي ورکړي.
علي یارلیکایا وویل، چې د ناقانونه کډوالۍ د مخنیوي لپاره د ترکي ځواکونو ګډ عملیات په ټول هیواد کې دوام لري.
ترکي رسنیو خبر ورکړی، چې په تېره میاشت کې ۳۳تنه افغان کډوال په ایرزورم ښار کې نیول شوي او د اخراج لپاره توقیف ځایونو ته لېږدول شوي دي.
په وروستیو میاشتو کې، ترکیې د کډوالو د پیژندلو، توقیفولو او شړلو او د قاچاقبرانو د محاکمه کولو بهیر ګړندی کړی دی.
