د ممبیي پولیسو هغه کس نیولی، چې شاهرخ خان یې په مرګ ګواښلی و

د ممبیي پولیسو دغه تورن کس نن د سې شنبې په ورځ د چتیس ګړ په رایپور کې نیولی دی.
پولیسو په چتیس ګړ کې د فیضان خان په نوم یو وکیل د دغې پېښې په تړاو نیولی دی.
دغه کس بیا وایي، چې مبایل یې ورک شوی و او کوم بل کس شاهرخ خان ګواښلی دی.
شاهرخ خان تېره اونۍ د یوې ټلیفوني اړیکې له لارې په مرګ ګواښل شوی و او د ۵۰ لکو هندي کلدارو غوښتنه ترې شوې وه.
فیضان رسنیو ته ویلي، چې د ده د ټیلیفون له لارې شوی ګواښ د ده پر ضد د یوې دسیسې برخه وه.
هغه رسنیو ته وویل:« زما ټیلیفون د نومبر په دویمه غلا شو او ما په دې اړه یې پولیسو ته شکایت هم وکړ.»
فیضان خان تر دې وړاندې یو ځل د شاه رخ خان خلاف یو شکایت هم درج کړی و.
دغه فلمي ستوري ته د تېر کال په اکټوبر میاشت کې هم د مرګ ګواښ شوی و.
تر دې وړاندې بیا سلمان خان هم د لارنس بشنوی له‌خوا په ځلونو په مرګ ګواښل شوی دی.