د پاکستان لومړي وزیر د کنګل ویلې کېدو د مخنیوي لپاره د نړیوالې همکارۍ غوښتنه وکړه
د پاکستان لومړي وزیر د طبیعي یخچالونو د ویلې کېدو د مخنیوي لپاره د سملاسي نړیوال ګام اخیستو او همغږو هڅو غوښتنه وکړه.
د پاکستان لومړي وزیر د طبیعي یخچالونو د ویلې کېدو د مخنیوي لپاره د سملاسي نړیوال ګام اخیستو او همغږو هڅو غوښتنه وکړه.
شهباز شریف نن په باکو کې د اقلیمي بدلون نړیواله غونډه کې زیاته کړه چې پاکستان د دې ارزښتتاکو طبیعي زېرمو د خوندیتوب لپاره له نړیوالې ټولنې سره خپلې همکارۍ ته تیار دی.
د پاکستان دولتي رادیو د خبر له مخې، ښاغلي شریف دا غونډه د کنګلونو د ویلي کېدو د مخنیوي لپاره بې جوړې چانس وباله.
نوموړي طبیعي کنګلونه د انسان د پایښت او د اوبو امنیت او اقلیم خوندیتوب لپاره مهم وبلل.
شهباز شریف وايي، طبیعي یخجالونه د نړۍ ۷۰ سلنه خوږې اوبه برابروي او مهم ایکو سیستم خوندي کوي.
د اقلیمي بدلون په هکله غونډه نن د اذربایجان پلازمېنه باکو کې پیل شوه، چې د مالي مرستو ټولولو غونډه هم بلل کېږي.
په غونډه کې پر پاکه انرژي، له وچکالۍ سره مقابله کې کرنه او له بې وزله هېوادونو سره د بډایه هغو پر مرستو خبرې کېږي.
د ایران ولسمشر مسعود پزشکیان د امریکا د نوي ولسمشر ډونالډ ټرمپ له ټاکل کېدو یوه اونۍ وروسته وویل، چې تهران پر خپل سرسخته دښمن امریکا سترګې نه شي پټولی او باید په سړه سینه ورسره مخ شي.
پزشکیان چې منځلاری ایرانی سیاستوال ګڼل کیږي، وویل: « که وغواړو یا نه، په سیمه ییزو او نړیوالو مسایلو کې له متحده ایالتونو سره مخامخ کېږو، نو بیا ښه ده چې خپله دا اړیکه مدیریت کړو».
مسعود پزشکیان وايي، چې « موږ باید له خپلو ملګرو سره په سخاوت چلند وکړو او له دښمنانو سره په سړه سینه مخ شو».
واشنګټن په ۲۰۱۸ کال کې دډونالډ ټرمپ د ولسمشرۍ پرمهال د تهران د ۲۰۱۵ کال اتومي تړون څنګ ته کېښود او پر دغه هېواد یې بېرته سخت بندیزونه ولګول.
د رویټرز د رپوټ له مخې، سره له دې چې د تهران پر وړاندې د ټرمپ پالیسي تراوسه نه ده په ډاګه شوې، خو نوموړي په خپلو ټاکنیزو منډو ترړو کې وویل، چې نه غواړي ایران ته زیان ورسوي، خو اتومي وسلو درلودو ته یې هم نه پرېږدي.
پزشکیان د سه شنبې په ورځ د ایران د بهرنیو چارو د پخوانیو وزیرانو یوې ډلې ته په خبرو کې وویل، چې « موږ په لنډ وخت کې چې څوارلسم حکومت واک ته راغلی ډېرې هڅې کړې چې ځینې سیاسي ستونزې حل کړو. دمګړۍ له ګاونډیانو سره زموږ اړیکې ښې دي او په غونډو او ناستو کې مو هوکړې هم کړې دي».
د واشنګټن او تهران ترمنځ نامخامخ خبرې اترې د جوبایډن ادارې له خوا پیل شوې، خو زر بېرته له ماتې سره مخ شوې.
له دې وړاندې د ایران ددولت ویاندې فاطمه مهاجراني ددې پوښتنې په ځواب کې چې تهران به د ټرمپ له ادارې سره مخامخ خبرې اترې پیل کړي، که نه، وویل، چې څه د تهران په ګټه وي، هغه به کوي.
هغې دا هم وویل، چې وروستی تصمیم ددغه هېواد مذهبي مشر ایت الله خامنه يي او د ملي امنیت عالي شورا نیسي.
د کډوالو لپاره ملګرو ملتونو عالي کمېشنرۍ په خپل وروستي راپور کې ویلي، چې په ټوله نړۍ کې د ۱۲۰ مېلیون څخه ډېر کسان په زوره بې ځایه شوي، درې پر څلورمه برخه یې په هغو هېوادونو کې ژوند کوي چې د اقلیمي بدلون له امله خورا اغېزمن شوي.
د ملګرو ملتونو د کډوالو عالي کمېشنرۍ په اذربایجان کې د ملګرو ملتونو د اقلیمي بدلون د ۲۹م کنفرانس پر مهال په یوه خپاره کړي راپور کې لیکلي، چې په نړۍ کې د اقلیمي بدلون له امله هغه کسان ډېر له ګواښ سره مخ دي چې، د جګړې له امله بېځایه کېږي.
دغه راپور چې د سې شنبې په ورځ د (لړم ۲۲مه) د ملګرو ملتونو د کډوالو عالي کمېشنرۍ له لوري خپور شوی، په کې راغلي، چې دمګړۍ په ټوله نړۍ کې له ۱۲۰ مېلیونه څخه ډېر کسان په جبري توګه بېځایه شوي دي.
په راپور کې ویل شوي، له دغې ډلې نیمایي یې په هغو ځایونو کې دي چې د جګړو او جدي اقلیمي خطرونو دواړو څخه اغېزمن شوي هېوادونه دي؛ لکه اېتوپیا، هایټي، میانمار، سومالیا، سوډان او سوریه.
په دغه راپور کې ویل شوي، چې د هغو هېوادونو شمېر چې د اقلیم اړوند جدي خطرونو سره مخ دي تر ۲۰۴۰ کال پورې به له ۳ څخه ۶۵ ته لوړ شي او د لوی اکثریت د بېځایه شویو خلکو کوربهتوب به کوي.
همدارنګه اټکل کېږي، چې ډېری مېشت ځایونه او د کډوالو پنډغالي به تر ۲۰۵۰ کال پورې دوه برابره خطرناکې ګرمې ورځې تجربه کړي.
په دغه راپور کې د سوډان د ویجاړونکې جګړې څخه د مثال په توګه یادونه شوې او ویلي یې دي، چې له هغه ځایه د جګړې له امله په مېلیونونه کسان تېښتې ته اړ شوي او د ۷۰۰۰۰۰ کسان په ګډون ګڼ شمېر د سوډان ګاونډ چاد ته تللي او د لسیزو راهیسې هلته میشت دي او کوربه هېواد هم د اقلیمي بدلون له امله یو له زیانمنو شویو هېوادونو څخه ګڼل کېږي.
راپور کې ویل شوي، چې په ورته ډول د میانمار په سلو کې ۷۲ کډوال بنګله دېش ته د خوندیتوب په لټه کډوال شوي؛ خو هلته هم له خطرناکو طبیعي پېښو او توپانونو او سېلابونو څخه په امان کې نه دي.
راپور دا هم په ګوته کوي، چې د اقلیم تمویل په نازکو او جنګ ځپلو هېوادونو کې کډوالو، کوربه ټولنو او نورو ته په رسېدو کې پاتې راغلی؛ نو د اقلیم د بدلون اغېزو سره د تطبیق وړتیا په چټکۍ سره مخ په خرابېدو ده.
په دغه راپور کې ویل شوي، چې د ملګرو ملتونو د کډوالو عالي کمېشنرۍ د اقلیمي بدلون له امله ټولنو ته د مرستو په برخه کې د ډېر ملاتړ غوښتنه کړې.
د کډوالو دغه اداره له دولتونو هم غواړي، چې د هغو خلکو ساتنه وکړي چې په زوره بېځایه شوي او تر څنګ یې د اقلیم د ناورینونو له ګواښونو سره هم مخامخ شوي دي.
د ملګرو ملتونو سرمنشي انټونیو ګوترېش په اذربایجان کې د ملګرو ملتونو د اقلیمي بدلون ۲۹م کنفرانس ته په اشاره په خپلې اېکس پاڼه لیکلي، چې د غونډې ګډونوال باید د اقلیمي بدلون له امله د خلکو ستونزې هوارې او د هغوی هیلې پوره کړي.
ښاغلي ګوترېش دغه څرګندونې د سې شنبې په ورځ د (لړم ۲۲مه) پر خپلې اېکس پاڼې په داسې حال کې لیکلي، چې تېره ورځ د اذربایجان په پلازمېنه باکو کې د ملګرو ملتونو د اقلیم بدلون ۲۹م کنفرانس پیل شوی.
د ملګرو ملتونو سرمنشي په خپله اېکس پاڼه لیکلي، د اقلیم بدلون په ۲۹م کنفرانس کې نړۍوالو مشرانو ته مې پیغام دا دی، چې تاسو باید د اقلیم بحران له زیانونو څخه د خپلو خلکو د ساتنې لپاره ډېر څه وکړئ.
همدارنګه نوموړي زیاته کړې، چې یوازې تاسو کولی شئ چې د نړۍ د تودوخې د زیاتوالی ۱.۵ درجو ته محدود کړئ.
د مخ پر ودې هېوادونو لپاره د مالي مرستو راټولول د دغه کنفرانس اصلي موضوع ده.
د راپورونو له مخې، افغانستان د اقلیم د بدلون له امله د زیانمن شویو لسو هېوادونو له ډلې څخه شپږم زیانمن هېواد دی.
د ملګرو ملتونو د اقلیمي بدلون په کلنۍ غونډه کې د لومړي ځل لپاره د طالبانو د چاپېریال ساتنې د ادارې مشر مطیع الحق خالص ګډون کړی دی.
د خیبر پښتونخوا د ترهګرۍ ضد اداره (سيټيډي) وایي، د یو لړ استخباراتي راپورونو له مخې یې هغه پولیس افسر نیولی چې د ترهګرو ډلو لپاره یې د ترهګریزو بریدونو په ترسره کولو کې اسانتیاوې برابرولې.
د دغې ادارې لهخوا په خپره شوې خبرپاڼه کې چې د تورن کس عکس هم ورسره خپور شوی راغلي، محمد ولي چې په عمر مشهور دی په هغه ځانمرګي برید کې هم ښکېل و د رینګ روډ په جمیل چوک کې د پولیسو پر جومات شوی و او ګڼه مرګ ژوبله یې اړولې وه.
خبرپاڼه کې راغلي، نوموړي د پېښور د پولیسو په لیکو کې دنده لرله او د نیولو پر مهال له هغه څخه د ځانمرګو بریدونو دوه واسکټونه هم نیول شوي دي.
په اعلامیه دا دعوه هم شوې، چې دغه پولیس کارکوونکي په افغانستان کې له ترهګرو ډلو سره اړيکي لرل او له هغه ځایه به ورته د ځانمرګو بریدونو واسکټونه او نور چاودېدونکي توکي رسېدل.
خبرپاڼه دا رنګه وایي، دغه نیول شوي پولیس د جماعت الاحرار ډلې مهم غړی و او د ترهګریزو بریدونو په ترسره کولو کې یې لوی لاس لاره.
پر نوموړي د هغه برید تور هم پورې شوی، چې د ۲۰۲۳ کال د جنورۍ په میاشت کې د پېښور د پولیس لاینز پر جومات شوي و، چې له امله یې ۸۶ تنه پولیس وژل شوي او ۲۴۹ تنه نور په کې ټپیان شوي وو.
هغه مهال هم پاکستاني چارواکو ویلي و، چې په برید کې په افغانستان کې د واکمنو طالبانو لاس دی او ترهګرو ته په پناه ورکولو سره یې په پاکستان کې امنیت ګواښلی دی؛ خو دا او دې ورته تورونه تل د طالبانو لهخوا رد شوي دي.
د پاکستان ملي هوايي شرکت (پي ای اې) یوې الوتکې چې د سعودي عربستان له جدې ښار څخه کراچۍ ته رسېدلې د سلو مساپرو بکسونه او سامان ورک کړي. ویل کیږي، دغه سل تنه د عمرې حج له سفره راګرځېدلي حاجیان وو.
پاکستانۍ جنګ ورځپاڼې نن سې شنبه د (لړم ۲۲مه) راپور ورکړی چې د پاکستان ملي هوايي شرکت (پي ای اې) یوې الوتکې چې د سعودي عربستان له جدې ښار څخه کراچۍ ته رسېدلې د سلو هغو حاجیانو بکسونه او سامان ورک کړي چې د عمري حج له زیارت څخه راګرځېدلي وو.
په راپور کې راغلي چې دغه شرکت یوازې دغو حاجیانو ته د زم زم اوبه ورکړې او ورته ویلي یې دي چې نور بکسونه او سامان ترې په سعودي کې پاتې شوی.
هغه مساپر چې دغه شرکت یې سامانونه ورک کړي وايي له جدې څخه دغې الوتکې دوه ساعته ناوخته کراچۍ ته رسولي دي.
د ورځپاڼې په وینا، دغو سلو مساپرو حاجیانو د کراچۍ په هوايي ډګر کې د خپلو بکسونو د ور سپارلو لپاره څو ساعته انتظار کړی او بیا د پي ای اې شرکت چارواکو ورته ویلي، چې سبا به یې بسکونه او سامان ور وسپاري.
د پاکستان ملي هوايي شرکت (پي ای اې) چې یو دولتي شرکت دی، په نړۍواله کچه تر نیوکو لاندې دی چې ټولې چارې یې د نړۍوالو اصولو خلاف روانې او مدیریت یې تر پوښتنې لاندې دی.
د مالي چارو کارپوهانو ویلي، چې دغه شرکت له ۱۹۸۷ کاله تر اوسه پورې یوازې په ۲۰۰۶ او ۲۰۰۷ کلونو کې ګټه کړې وه او له هغه وروسته په تاوان روان دی او دا اټکل کیږي چې هېڅ پاکستانی حکومت په دې نه دی توانېدلی چې دغه شرکت په ښه توګه اداره کړي.
له مالي بحران سره مخ د پاکستان هوايي شرکت پي ای اې د روان کال په پیل کې پلان درلود چې پر نورو هیوادونو دغه شرکت وپلوري.
ویل کیږي سعودي ،عربي اماراتو او قطر یې اخیستلو ته زړه ښه کړی و خو بیا بیرته د ناڅرګندو دلایلو له امله دغه کاره په شا شول.