طالبان: د نړۍوالو د بمونو په پایله کې د معلول شويو کسانو ژوند له خورا ننګونو سره مخامخ دی
د طالبانو تر واک لاندې د تخنیکي او مسلکي زدهکړو ادارې مرستیال وايي، د نړۍوالو د بمباریو په پایله کې معلول شوي کسان باید له نړۍوالو هېر نه شي.
د طالبانو تر واک لاندې د تخنیکي او مسلکي زدهکړو ادارې مرستیال وايي، د نړۍوالو د بمباریو په پایله کې معلول شوي کسان باید له نړۍوالو هېر نه شي.
نوموړی وايي، د معلولیت لرونکو کسانو لپاره د زدهکړو د امکاناتو برابرولو په موخه یې تېرې دوه ورځې د ناروې او اندونیزیا سره یو لړ هوکړو ته رسېدلي دي.
د طالبانو تر واک لاندې د تخنیکي او مسلکي زدهکړو ادارې مرستیال غلام سعید احساس وايي، په تېرو څو کلونو کې نړۍوالو “اشغالګرو” په افغانستان کې بېلابېل بمونه کارولي، چې په پایله کې یې ډېر کسان معلول شوي دي.
نوموړی وايي، اوس د نړۍ مسوولیت دی چې د معلولینو سره مرسته او همکاري وکړي.
نوموړی وايي، دمګړۍ په افغانستان کې د معلولو کسانو ژوند له ګواښ سره مخ دی.
ښاغلی احساس د معلولو وګړو د زدهکړو، هوساینې او کار په برخه کې له نړۍوالو څخه د همکارۍ غوښتنه کوي.
نوموړی وايي، نړۍوال دې د افغانستان د معلولینو لپاره د امکاناتو د برابرولو مسله له سیاسته بېله کړي او په دې برخه کې دې خپل مسوولیت ادا کړي.
خو نوموړي دا په ډاګه نه کړه، چې دمګړۍ په افغانستان کې د معلولینو شمېر څومره دی.
په افغانستان کې د معلولیت لرونکو کسانو لپاره د زدهکړو، کار او نورو برخو کې د امکاناتو برابرولو په برخه کې تېرې دوه ورځې د ناروې کمېټې، اندونیزیا او طالبانو ترمنځ درې اړخیز سمپوزیم جوړ شوی و.
په افغانستان کې د ناروې کمیټې عمومي رییس تاریا واتر دال چې نن پج شنبه یې د طالبانو د تخنیکي او مسلکي زدهکړو د ادارې له مرستیال سره په ګډ خبري کنفرانس کې معلومات وړاندې کول وویل، په یاد سمپوزیوم کې د افغانستان د معلولیت لرونکو کسانو لپاره د امکاناتو برابرولو لپاره د ناروې او اندونیزیا په ګډون د شاوخوا سلو هېوادونو، نړۍوالو او سیمهییزو مرستندو ادارو ګډون کړی دی.
نوموړي وویل، د دغه سمپوزیوم پر مهال د معلولیت لرونکو کسانو لپاره د زدهکړو په برخه کې د امکانانو برابرولو په موخه یو لړ ژمنې هم وشوې.
نوموړي وویل، په دغه سمپوزیم کې په دې هوکړه وشوه، چې ټول لندمهالي او اوږد مهالي بشري او تلپاتې پراختیایي پروګرامونه به معلوملیت لرونکي، ماشومان، ښځې او ټولو کسانو ته په خپله غیږ کې ځای ورکړي.
همدارنګه نوموړې زیاته کړه:«موږ هوکړه وکړه، چې د طالبانو د اقتصاد وزارت چې، کله د پراختیايي پرواګرامونو پروژې تاییدوي باید د معلوملیت لرونکو کسانو د ونډې شتهوالی هم تضمین کړي. معلولیت لرونکي کسان باید د دغه ډول پروګرامونو په ټولو برخو کې ونډه ولري.»
نوموړي همدارنګه وویل، چې د طالبانو د تخیکي او مسلکي زدهکړو له ادارې سره یې د معلولیت لرونکو ماشومانو د زدهکړو لپاره د برېل لیک لرونکي کتابونو د چاپ او د نصاب په برخه کې هم هوکړه کړې ده.
په افغانستان کې د ناروې کمېټې عمومي رییس وايي، دغه دوه ورځنی سمپوزیم به د افغان معلولیت لرونکو لپاره د غوره اقداماتو لپاره روښانه لاره پرانیزي.
